1 Va Le Tesalonika 1:1-10
1 Mina Pawule, ndzi nga na Silvhanusi,* na Timote, ndza tsalela a bandla ga va le Tesalonika legi gi lumbako Nungungulu, a Papayi, na Jesu Kristu, a Hosi, ndziku:
A tipswalo ni kurula a zvive na n’wina.
2 Hina ha bonga Nungungulu contlhe cikhati hi kumbukako n’wina n’wentlhe mikhongelweni ya hina.
3 Hakuva contlhe cikhati ha alakanya a ntiro lowu mu wu mahako hi kutsumbeka, ni ntiro lowu mu wu mahako hi lirandzo, ni kutimisela ka n’wina hi kota ya kutsumba loku mu nga nako ka Hosi Jesu Kristu, mahlweni ka Nungungulu wa hina tlhelo Papayi.
4 N’wina vamakabye va randziwako hi Nungungulu, ha zvi tiva lezvaku mu hlawulilwe hi yena,
5 hakuva a mahungu ya ma nene lawa hi ma chumayeleko ka n’wina, a hi ma chumayelangi hi magezu basi, kanilezvi hi ma chumayele hi ntamu, ni moya wo basa, ni kukholwa ka hombe. N’wina ma zvi tiva lezvi hi nga hanyisa zvona cikari ka n’wina kasi mu vhuneka.
6 Mu no maha vapimanyisi va hina ni va Hosi, kota lezvi mu amukeleko a mhaka ya Nungungulu hi kutsaka ku tako hi ka moya wo basa, hambu lezvi mu xanisekileko nguvhu.
7 Hikwalaho mu nova cikombiso ka makholwa wontlhe ya le Makedhoniya ni le Akaya.
8 Hi kota ya kuchumayela ka n’wina, a mhaka ya Jehovha a yi zwalangi le Makedhoniya ni le Akaya koce, kanilezvi a kukholwa ka n’wina ku hangalakile matshan’wini wontlhe, laha ka ku a zva ha lavi ku hi wula nchumu.
9 A vanhu va matshamu lawo a va tsiki ku hlawutela lezvi hi nga tisa zvona ka n’wina hi khati go sangula, ni lezvi n’wina mu nga tsikisa zvona a zvifananiso zva n’wina mu hundzuluka muva malandza ya Nungungulu wa lisine a hanyako,
10 na mu rindzela a kuta ka N’wana wakwe hi le tilweni, loyi a nga mu vhuxa hi ka vafileko, ku nga Jesu, loyi a hi tlhatlhisako ka zanga leyi yi tako.
Mitlhamuselo ya lahasi
^ Loyi a gin’wani vito a nga Silasi.
