1 Va Le Tesalonika 2:1-20
2 Vamakabye, n’wina ma zvi tiva khwatsi lezvaku a hi mu endzelangi mahala.
2 Hakuva hambu lezvi hi nga ranga hi ku xaniseka ni ku mahelwa xapi le Filipi, kota lezvi mu zvi tivako, Nungungulu i no hi tiyisa hlana kasi hi chumayela mahungu ya ma nene cikari ka n’wina hi kulwa ka hombe.
3 Hakuva a wusungukati legi hi nga mu nyika, a hi mu nyikangi hi kuphazama, kutani hi ku mu xuvela zvakubiha ne a hi mu nyikangi hi ku lava ku mu kanganyisa.
4 Kanilezvi, a ku fana ni lezvi Nungungulu a hi wonileko na hi ringanelwa hi ku nyikiwa a ntiro wa ku kanela a mahungu ya ma nene, ha wulawula kasi ku tsakisa Nungungulu loyi a hlolako timbilu ta hina, na ku nga hi ku fela ku tsakisa vanhu.
5 Ma zvi tiva lezvaku a hi zangi hi mu kalavela hi magezu yo nandziha, ne ku ti maha va va nene kasi hi wuyelwa. Nungungulu i kustumunyu wa hina ka mhaka leyi!
6 A hi zangi hi ti lavela wudzundzo ga vanhu, ne ku dzundziwa hi n’wina kutani hi vanhu van’wani, hambu lezvi hi nga wa tava hi mu rwexile ndzhwalo wa ku hi hlayisa kota lezvi hi nga vapostoli va Kristu.
7 Kanilezvi, hi nova vanhu va va nene cikari ka n’wina, a ku fana ni mamani a an’wisako ni ku hlayisa khwatsi* a vanana vakwe.
8 Makunu kota lezvi hi mu randzako nguvhu, hi wa longile ku mu nyika mahungu ya ma nene ya Nungungulu, na ku nga hi wona woce, kanilezvi ni ku ti nyikela wutsumbu ga hina hi kota ya n’wina hakuva ha mu randza nguvhu.
9 Vamakabye, hakunene ma zvi alakanya lezvaku hina hi tirile yi nga chayi. Hi wa tira wusiku ni mumu kasi hi nga rwexi ne mun’we wa n’wina a ndzhwalo wa ku hi hlayisa a cikhati leci hi nga mu chumayela a mahungu ya ma nene ya Nungungulu.
10 N’wina mu vakustumunyu va lezvo, Nungungulu yenawu wa kustumunya lezvaku hi hanyile cikari ka n’wina vamakabye kota vanhu vo tsumbeka, ni vo lulama, ni vo kala nandzu.
11 Ma zvi tiva kambe lezvaku a hi tsikangi ku mu nyika wusungukati, ni ku mu chavelela, ni ku gondzisa a mun’we ni mun’wani wa n’wina, a ku fana ni lezvi a papayi a mahako ka vana vakwe,
12 kasi mu simama ku famba hi ndlela yi fanelako Nungungulu, loyi a mu vitanelako Mufun’weni wakwe ni kungangameleni kakwe.
13 Hi kota ya lezvo, a hi tsiki ku bonga Nungungulu, hakuva a cikhati leci mu nga amukela a mhaka ya Nungungulu leyi mu nga yizwa ka hina, a mu yi amukelangi kota mhaka ya vanhu, kanilezvi mu no amukela a mhaka ya Nungungulu kota lezvi hakunene yi nga yona, ku nga mhaka leyi yi tirako cikari ka n’wina lava mu kholwako.
14 Hakuva n’wina vamakabye mu mahile vapimanyisi va mabandla ya Nungungulu lawa ma nga ka Kristu Jesu le Judhiya, hi lezvi mu nga xaniseka mandleni ya va ka n’wina, a ku fana ni lezvi vonawu va xanisekisako zvona mandleni ya vaJudha,
15 lava va ngaza va daya Hosi Jesu ni vaphrofeti va tlhela va xanisa na hinawu. A vanhu lavo a va tsakisi Nungungulu, kanilezvi va vhukela vanhu vontlhe,
16 hi ku hi betela ku wulawula ni vanhu va matiko kasi va ponisiwa. Laha va mahako lezvo, vo engetela a zviwonho zvabye. Kanilezvi a zanga ya Nungungulu yi sina yi hi hehla kabye.
17 Kanilezvi a cikhati leci hi nga tsawukanisiwa na n’wina vamakabye zva cikhatana (hi le mirini, na ku nga hi lomu mbilwini), hi no zama hi tindlela tontlhe a ku tlhela hi wonana na n’wina nghohe ni nghohe hakuva hi wa mu xuva nguvhu.
18 Hikwalaho, hi no xuva ku mu endzela, nguvhunguvhu mina Pawule, a hi khati gin’we basi ndzi nga zama, kanilezvi mave mambiri; hambulezvo Sathani i no hi vhalela ndlela.
19 Hakuva a cikhati leci Hosi ya hina Jesu a tova kona cikari ka hina, himani a tova kutsumba ka hina, ni litsako la hina, ni cidlodlo* ca hina mahlweni kakwe? A hi n’wina ke?
20 Kunene hi n’wina mu nga wudzundzo ga hina ni litsako la hina.
