1 Va Le Tesalonika 3:1-13
3 Hikwalaho, laha hi nga kala hi nga ha gwenti a ku tshama na hi ngazwi mahungu ya n’wina, hi no zvi wona na zvi hi chukwana a ku sala hoce laha Atensi,
2 hi ruma Timote, a makabye wa hina tlhelo nandza ga Nungungulu* ga ku chumayela mahungu ya ma nene xungetano hi Kristu, lezvaku ata ka n’wina a ta mu tiyisa ni ku mu chavelela kukholweni ka n’wina,
3 kasi ne ni mun’we wa n’wina a nga tsekatsekiswi hi tixanisa leti. Hakuva ma zvi tiva lezvaku a hi na ndlela ya ku vhika tixanisa leto.*
4 A cikhati leci hi nga ha hi zvin’we na n’wina, hi wa tshamela ku mu tlharihisa hiku hi ta welwa hi tixanisa, niku hi zvalezvo zvi humelelako kota lezvi n’winawu mu zvi wonako.
5 Hikwalaho, laha ndzi nga kala ndzi nga ha gwenti ku rindzela, ndzi no ruma Timote ata ka n’wina kasi a ta tiva a kutsumbeka ka n’wina, hakuva ndzi wa chava ku kuzvilava mu ngava na mu ringilwe hi Muringi, makunu a ntiro wa hina wuva wa mahala.
6 Kanilezvi Timote wa ha hi ku wuya hi seyo ka n’wina. I hi hlawutele mahungu ya ma nene xungetano hi kutsumbeka ka n’wina ni lirandzo la n’wina, ni lezvaku ma hi alakanya contlhe cikhati niku ma xuva ku hi wona a ku fana ni lezvi hinawu hi mu xuvako.
7 Hikwalaho vamakabye, ha chavelelwa kukaratekeni* ni kuxanisekeni ka hina kontlhe hi kota ya n’wina ni kutsumbeka ka n’wina.
8 Hakuva hina ha kuma ntamu* loku n’wina mu tiya mu ku nde Hosini.
9 Makunu, hi ta mu bongisa kuyini Nungungulu hi kota ya n’wina ni hi kota ya kutsaka ka hombe loku hi nga nako mahlweni ka Nungungulu wa hina hi kota ya n’wina ke?
10 Wusiku ni mumu ha kombela ni ku khongotela Nungungulu lezvaku hi zvi kota ku wonana na n’wina nghohe ni nghohe kasi hi mu nyika lezvi zva ha kiyelako kukholweni ka n’wina.
11 Makunu, hi khongelela lezvaku Nungungulu wa hina tlhelo Papayi, ni Hosi ya hina Jesu, va hi vhululela ndlela ya ku hita ka n’wina.
12 Ahandle ka lezvo, hi xuva lezvaku a Hosi yi engetela lirandzo la n’wina, mu simama ku randzana nguvhu, ni ku randza vanhu vontlhe, kota lezvi hinawu hi mu randzako,
13 kasi yi fela ku tiyisa a timbilu ta n’wina, ti basa ti nga hi na kusoleka mahlweni ka Nungungulu wa hina tlhelo Papayi, cikhatini leci a Hosi ya hina Jesu a tova cikari ka hina zvin’we ni vobasa vakwe vontlhe.
Mitlhamuselo ya lahasi
^ Zvi nga ha wula ku: “citiri-kulobye na Nungungulu”.
^ Kutani: “lezvaku hi yimelwe hi zvilo lezvo”.
^ Hi kukongoma: “kuvhumaleni”.
^ Hi kukongoma: “ha hanya”.
