1 Va Le Tesalonika 4:1-18
4 Hi kugumesa vamakabye, kota lezvi hi mu nyikileko zvileletelo zva lezvi mu faneleko ku fambisa zvona kasi mu tsakisa Nungungulu, ku nga zvalezvi mu zvi mahako, ha mu kombela ni ku mu khongotela hi vito ga Hosi Jesu lezvaku mu simama ku zvi maha hi kumbhelela.
2 Hakuva ma zvi tiva a zvileletelo* lezvi hi mu nyikileko ha Hosi Jesu.
3 Hakuva Nungungulu i randza lezvaku mu basa ni ku tsika wubhayi.*
4 A mun’we ni mun’wani wa n’wina i wa tive a ndlela ya ku fumela a miri* wakwe kasi wu simama wu basile ni ku dzundzeka,
5 na a nga vhuri hi kunavela ko nyenyeza ka masango, ku nga lezvi va mahako a vamatiko lava va nga mu tiviko Nungungulu.
6 Ku ngavi na munhu a tsemakanyako a mbhingano wa lezvi zvi faneleko a kalavela makabye wakwe mhakeni leyi, hakuva Jehovha i ta tsayisa vontlhe lava va mahako zvilo lezvi, kota lezvi hi sinako hi mu byelile ni ku mu tlharihisa.
7 Hakuva Nungungulu i hi vitanele zvakubasa, na ku nga hi zvilo zvo kala kuhlazveka.
8 Makunu loyi a kanyisako a mhaka leyi, a nga kanyisi munhu, kanilezvi i kanyisa Nungungulu loyi a mu nyikako a moya wakwe wo basa.
9 Kanilezvi, xungetano hi ku randza a vamakabye, a zvizi zvi lava ku hi mu tsalela, hakuva n’wina wutsumbu mu gondzisilwe hi Nungungulu lezvaku mu fanele ku randzana.
10 Kunene hi zvalezvi mu mahako ka vamakabye vontlhe va nga tikweni gontlhe ga Makedhoniya. Kanilezvi ha mu khongotela vamakabye, lezvaku mu simama ku andza lirandzweni lelo.
11 Ti karateleni ku hanya hi kurula; mu nga ngheneli a zvilo zva van’wani, kanilezvi tirani hi mandla ya n’wina kota lezvi hi mu layileko,
12 kasi mu famba hi kufaneleko kuwoneni ka vanhu va le handle mu nga vhumali nchumu.
13 Vamakabye, a hi lavi lezvaku mu kohlwa a mhaka ya lava va etleleko kufeni, kasi mu nga rilisi ku khwatsi hi lava va nga hava kutsumba.
14 Hakuva loku hi kholwa lezvaku Jesu i file a tlhela a vhuka, hizvalezvo ni lava va etleleko kufeni, Nungungulu i ta va vhuxa hi ku tirisa Jesu, a va wuyisa zvin’we naye.
15 Hakuva ha mu tivisa lezvi zvi wulilweko hi mhaka ya Jehovha hiku: Hina lava hi to kumiwa na ha ha hanya cikhatini leci a Hosi yi tova kona cikari ka hina hi nga ta va rangela lava va etleleko kufeni;
16 hakuva a Hosi yi ta relela hi le tilweni na yi kari yi vitana hi kulaya, hi gezu ga ngilozi ya hombe ni mpundzu wa Nungungulu. Lava va feleko ka Kristu hi vona va to ranga va vhuka.
17 Andzhako ka lezvo, hina lava hi to kumiwa na ha ha hanya, hi ta tekiwa zvin’we navo hi nghenisiwa marefini kasi hi ya tlhangana ni Hosi ndengelengeni; hi ndlela leyo, hi tava zvin’we ni Hosi contlhe cikhati.
18 Hikwalaho, simamani ku chavelelana hi magezu lawa.
Mitlhamuselo ya lahasi
^ Kutani: “milayo”.
^ Hi ciGreki: porneía. Wona Tlhamuselo wa magezu ya Bhibhiliya.
^ Hi kukongoma: “cibya”.
