1 Va Le Tesalonika 5:1-28
5 Vamakabye, xungetano hi zvikhati ni tinguva, a zvizi zvi lava lezvaku mu tsalelwa nchumu ha zvona.
2 Hakuva ma zvi tiva khwatsi lezvaku a siku ga Jehovha gata a ku khwatsi i khamba ni wusiku.
3 Laha va to: “Ku rulile, a matiko ma etlele!”* zvalezvo a kuloviswa kabye ku ta va chikelela hi citshuketi a ku fana ni wasati wa nyimba a lun’wako. Va nga ta pona.
4 Kanilezvi n’wina, vamakabye, a mu lomu munyameni ko kala a siku lego gi mu juma a ku fana ni lezvi a kuwonekela ku jumako makhamba,
5 hakuva n’wina n’wentlhe mu vana va kuwonekela ni vana va hlikanhi. Hina a hi vana va wusiku ne va munyama.
6 Hikwalaho, hi nga etleli a ku fana ni lezvi a van’wani va mahako, kanilezvi a hi khindlimukeni, hi tirisa khwatsi kupima ka hina.
7 Hakuva lava va etlelako va etlela ni wusiku, ni lava va popiwako va popiwa ni wusiku.
8 Kanilezvi hina lava hi nga vana va hlikanhi, a hi tiriseni khwatsi a kupima ka hina, hi boha a cikatawu ca simbi ca kukholwa ni lirandzo, ni cihuko ca simbi ci nga kutsumba ka kuhanyiswa,
9 hakuva Nungungulu a nga hi hlawulelangi ku welwa hi zanga yakwe, kanilezvi i hi hlawulele ku hanyiswa ha Jesu Kristu, a Hosi ya hina,
10 loyi a nga hi fela lezvaku hambu loku hi hanyanya, kutani hi etlele,* hi hanya zvin’we naye.
11 Hikwalaho, simamani ku tiyisana* ni ku akana, zvi nga zvalezvi mu mahako.
12 Ha mu kombela vamakabye lezvaku mu kombisa cichavo ka lava va tirako hi kutikarata cikari ka n’wina, lava va mu rangelako Hosini, va tlhela va mu kawuka;
13 mu va dzundza nguvhu ni ku va randza hi kota ya ntiro wabye. Tshamani hi kurula cikari ka n’wina.
14 Ahandle ka lezvo, ha mu khongotela vamakabye lezvaku mu kawuka lava va vhilinganya, mu chavelela lava va tshovekileko timbilu, mu tiyisa lava va mbhelileko ntamu, muva ni lihlazva-mbilu ka vanhu vontlhe.
15 Ku ngavi na munhu a tlheliselako kubiha hi kubiha, kanilezvi contlhe cikhati mahani zva zvi nene ka mun’we ni mun’wani ni ka vanhu vontlhe.
16 Tsakani contlhe cikhati.
17 Khongelani mu nga tsiki.
18 Bongani hi kota ya zvilo zvontlhe, hakuva Nungungulu i randza lezvaku mu maha lezvo ha Kristu Jesu.
19 Mu nga timi a ndzilo wa moya.
20 Mu nga kanyisi a zviphrofeto.
21 Hlolani a zvilo zvontlhe; mu namarela ka lezvi zvi nga zvi nene.
22 Tsikani a kubiha kontlhe.
23 Nungungulu wa kurula i wa mu basise matlhelweni wontlhe, kasi a moya wa n’wina ni muhefemulo* ni miri, zvi hlayisiwa zvontlhe, zvi nga hi na kusoleka kala cikhatini leci a Hosi ya hina Jesu Kristu a tova cikari ka hina.
24 Loyi a mu vitanako i tsumbekile, niku i ta maha lezvo.
25 Vamakabye mu nga tsiki ku hi khongelela.
26 Losani vamakabye vontlhe hi kupswopswa ko basa.
27 Ndza mu khongotela vitweni ga Hosi lezvaku a papilo legi gi lerelwa vamakabye vontlhe.
28 A tipswalo ta Hosi ya hina Jesu Kristu a tive na n’wina.
Mitlhamuselo ya lahasi
^ Kutani: “a matiko cilele”.
^ Kutani: “hi etlele kufeni”.
^ Kutani: “chavelelana”.
^ Kutani: “wutomi”. Wona laha ka ku: “Muhefemulo” ka Tlhamuselo wa magezu ya Bhibhiliya.
