2 Johani 1:1-13
1 Mina wanuna a kulileko* ndza tsalela a wasati a hlawulilweko, ni vana vakwe, lava ndzi va randzako nguvhu, na ku nga hi mina basi kanilezvi ni vontlhe lava va tivako lisine,
2 hi kota ya lisine li nga ka hina leli li tova ka hina kala kupindzuka.
3 A tipswalo ni wuxinji ni kurula zvi tako hi ka Nungungulu tlhelo Papayi, ni ka Jesu Kristu, a N’wana wa Papayi, zvin’we ni lisine ni lirandzo, zvi tava na hina.
4 Ndza tsaka nguvhu hi ku tiva lezvaku a vokari va vana va wena va famba lisineni, kota lezvi Papayi a hi layileko.
5 Makunu, wasati, ndza ku kombela lezvaku u hlayisa a nayo, na ku nga hi nayo wuswa, kanilezvi lowu hi nyikilweko kusanguleni, wa kuva hi randzana.
6 A lirandzo ku famba hi milayo yakwe. Lowu hi wona a nayo lowu mu wu zwileko kusukela kusanguleni waku: Fambani hi lirandzo.
7 Hakuva lomu tikweni ku na ni vakanganyisi vo tala lava va kanetako lezvaku Jesu Kristu i tile hi ka nyama. Lava hi vona va nga mukanganyisi tlhelo mukaneti wa Kristu.
8 Ti woneleni kasi mu nga luzi zvilo lezvi hi zvi tirileko, kanilezvi mu fela ku kuma nchachazelo wo mbhelela.
9 Ni wihi loyi a nga simamiko ka gondzo ya Kristu, a gondzisa zvo hambana, a nga na Nungungulu. Loyi a nga na Papayi ni N’wana hi loyi a simamako ka gondzo leyi.
10 Loku kuta munhu na a nga gondzisi a gondzo leyi, mu nga mu amukeli mitini ya n’wina ne ku mu losa.
11 Hakuva loyi a mu losako i hlengela naye mitirweni yakwe yo biha.
12 Hambu lezvi ndzi nga ni timhaka to tala ta ku mu byela, a ndzi lavi ku mu tsalela tona hi phepha ni tinta, ndzi alakanya ku ndzi ta mu endzela zvalezvanyana lezvaku hi ta wulawula nghohe ni nghohe, kasi mu fela ku tsaka nguvhu.
13 A vana va makabye wa wena, loyi a hlawulilweko, va ku rungula.
Mitlhamuselo ya lahasi
^ Kutani: “Mina dhota”.
