2 Pedro 1:1-21
1 Mina Simoni Pedro, ndzi nga nandza ni mupostoli wa Jesu Kristu, ndza tsalela lava va kumileko a kukholwa ka lisima ko fana ni loku ka hina hi kota ya kululama ka Nungungulu wa hina ni ka Jesu Kristu, a Muhanyisi wa hina, ndziku:
2 A tipswalo ni kurula a zvi andze cikari ka n’wina, hi kuva mu mu tiva khwatsi Nungungulu na Jesu, a Hosi ya hina.
3 Hakuva a ntamu wakwe wu hi nyikile* a zvilo zvontlhe zvi hi vhunako ku hanya na hi chava Nungungulu, hi kota ya lezvi hi mu tivako khwatsi Loyi a hi vitanileko hi kungangamela kakwe ni wunene.
4 Hi zvilo lezvi, i hi nyikile* a zvitsumbiso zva hombe ni zvo tsakisa kasi hi kota ya zvona mu hlengela a kungangamela ka Nungungulu kota zvivangwa zva moya zvi ponileko a kuhina* ka tiko ku vangiwako hi kunavela ko biha.
5 Hi kota ya lezvo, ti tsitsiriteni kasi muva ni wunene kukholweni ka n’wina, ni wuneneni ga n’wina muva ni kutiva,
6 ni kutiveni ka n’wina muva ni kutikhoma, ni kutikhomeni ka n’wina muva ni kutimisela, ni kutimiseleni ka n’wina mu chava Nungungulu,
7 ni kuchaveni ka n’wina Nungungulu mu randza vamakabye, ni kurandzeni ka n’wina vamakabye muva ni lirandzo.
8 Hakuva loku a zvilo lezvi zvi hi kona cikari ka n’wina zvi tlhela zvi tala zvi halakela, mu nga ta loloha, kutani ku nga pswali mihandzu mhakeni ya ku yi tiva khwatsi a Hosi ya hina Jesu Kristu.
9 Hakuva ni wihi a nga hava zvilo lezvi cikhumu, i ti vhala matihlo kasi a nga woni a kuwonekela* a tlhela a rivala ku a zviwonho zvakwe zva kale zvi basisilwe.
10 Hikwalaho, vamakabye, ti tsitsiriteni kasi mu tiyisa a kuvitanwa ni kuhlawulwa ka n’wina hakuva loku mu simama ku maha zvilo lezvi, mu nga ta tshuka mu hambuka kukholweni.
11 Kunene, loku mu maha lezvo, mu ta kuma thomo ga ku nghena Mufun’weni wa pindzukelwa wa Hosi ni Muhanyisi wa hina Jesu Kristu.
12 Hi cigelo leco, contlhe cikhati ndzi xuva ku mu alakanyisa a zvilo lezvi, hambu lezvi mu sinako mu zvi tiva ni lezvi mu tiyileko khwatsi lisineni leli mu li gondzileko.
13 Kanilezvi, na ndza ha hi ka tabhernakeli* legi, ndzi alakanya ku zvi lulamile a ku mu alakanyisa kasi mu fela ku vhuka.
14 Hakuva ndza zvi tiva lezvaku zvalezvanyana a tabhernakeli ga mina gi ta susiwa, kota lezvi a Hosi ya hina Jesu Kristu a ndzi tlhamuseleko.
15 Contlhe cikhati ndza ti tsitsirita kasi loku ndzi sukile, mu fela ku sala mu alakanya* a zvilo lezvi ha n’wece.
16 Hakuva laha hi nga mu tivisa hi ntamu wa Hosi ya hina Jesu Kristu ni cikhati leci a tova kona cikari ka hina, a hi landzelangi a tikaringani ti phaphilweko hi vanhu, kanilezvi hi wonile a wukulu gakwe hi mahlo ya hina wutsumbu.
17 Hakuva Nungungulu, a Papayi, i mu nyikile a wudzundzo ni wudhumo a cikhati leci ku nga zwala gezu kakwe na gi huma kungangameleni ka hombe, giku: “Loyi hi yena N’wana wa mina ndzi mu randzako, loyi ndzi xalalako hi yena.”
18 Kunene, a magezu lawa ma zwele na mata hi le tilweni a cikhati leci hi nga hi zvin’we naye citsungeni co basa.
19 Hikwalaho, a mhaka ya kuphrofeta yi tiyisilwe nguvhu ka hina, makunu mu maha khwatsi loku mu chela kota hi yona a ku khwatsi i kandiya yi woningako munyameni (kala gica, ku woneka mahlahle*) lomu timbilwini ta n’wina.
20 A kuranga tivani lezvaku a ku na kuphrofeta lomu Mitsalweni ku tako hi ka vanhu.
21 Hakuva a ku na kuphrofeta ku tshukileko kuta hi kurandza ka munhu, kanilezvi a vanhu va no kanela lezvi va nyikilweko hi Nungungulu, na va susumetwa* hi moya wo basa.
Mitlhamuselo ya lahasi
^ Kutani: “nyikile mahala”.
^ Kutani: “nyikile mahala”.
^ Kutani: “kubola”.
^ Zvi nga ha wula ku: “cikhumu, i wona zva laha kusuhani basi”.
^ Kutani: “tenda”, ku nga miri wakwe wa laha misaveni.
^ Kutani: “mu kumbuka”.
^ Kutani: “nyezani”.
^ Kutani: “rangelwa”.
