2 Pedro 3:1-18
3 Varandzekako, legi makunu i papilo ga wumbiri ndzi mu tsalelako. A ku fana ni ka papilo ga mina go sangula, ndzi lava ku vhuxa a kupima ka n’wina hi ku mu alakanyisa lezvaku mu pimisa khwatsi,
2 kasi mu alakanya lezvi zvi sinako zvi wulilwe hi vaphrofeti vo basa ni nayo wa Hosi tlhelo Muhanyisi, lowu a wu nyikileko hi ku tirisa vapostoli va n’wina.
3 A kusangula, tivani lezvaku a masikwini yo gumesa ku tata a vatseketseli va ta tseketsela, va landzela a kunavela kabye wutsumbu,
4 vaku: “Ku kwihi a kuvakona kakwe cikari ka hina loku ku tsumbisilweko ke? Phela cima a vakokwani va hina va etlela kufeni, a zvilo zva ha tshamisile zvalezvi zvi nga tshamisile zvona kusukela kuvangiweni ka tiko.”
5 Hakuva va kanyisa ha womu a mhaka leyi ya ku a kale ku wa hi ni matilo ni misava yi nga wumbilwe yi huma matini, na yi hi cikari ka mati hi gezu ga Nungungulu.
6 A tiko ga cikhati leco gi no loviswa hi zvilo lezvi laha gi nga talelwa hi mati.
7 Kanilezvi hi gezu galegi ga gin’we a matilo lawa ma nga kona zvezvi ni misava ya kona, zvi longiselelwe ndzilo, zvi vekiwa kala sikwini ga kulamulwa ni kuloviswa ka vanhu lava va nga chaviko Nungungulu.
8 Kanilezvi, varandzekako, mu nga rivali a mhaka leyi ya ku a siku gin’we ka Jehovha gi fana ni 1000 wa malembe, ni 1000 wa malembe ma fana ni siku gin’we.
9 Jehovha a nga hlweli ku tatisa a citsumbiso cakwe, kota lezvi a vokari va alakanyako lezvaku wa hlwela. Yena i timisela ha n’wina hakuva a nga lavi lezvaku ku lova ni mun’we, kanilezvi i lava lezvaku vontlhe va hundzuluka.
10 Kanilezvi a siku ga Jehovha gi ta tisa ku khwatsi i khamba; hi siku lego, a matilo ma ta hundza hi guwa ga hombe, a zvilo zva le tilweni ni zva laha misaveni zvi ta nyeka hi kota ya kuhisa ka hombe, a misava ni mitiro yi nga ka yona zvi taswa zvi mbhela.*
11 Kota lezvi zvontlhe lezvi zvi to nyekisa lezvi, wonani lezvaku mu fanele kuva vanhu vo tshamisa kuyini. Mu fanele kuva ni mahanyela yo basa, mu kombisa hi mitiro lezvaku mu khozela Nungungulu,
12 laha mu rindzelako ni ku alakanya* a kuta ka siku ga Jehovha, legi a matilo ma to lovisiwa hi ndzilo, a zvilo zva le tilweni ni zva laha misaveni zvi nyeka hi kuhisa ka hombe.
13 Kanilezvi hi kota ya citsumbiso cakwe, hina hi rindzela a matilo maswa ni misava yiswa lomu a kululama ku to tshama kona.
14 Hikwalaho, varandzekako, kota lezvi mu rindzelako a zvilo lezvi, ti tsitsiriteni kasi a ta mu kuma na mu nga hi na noda, ne cisolo, kanilezvi na mu hi ni kurula.
15 Ahandle ka lezvo, wonani a lihlazva-mbilu la Hosi ya hina kota kuhanyiswa, a ku khwatsi hi lezvi Pawule, a makabye wa hina wo randzeka, yenawu a mu tsaleleko hi wutlhari legi a nyikilweko,
16 a wulawula hi zvilo lezvi kota lezvi a mahako ka mapapilo yakwe wontlhe. Hambulezvo a timhaka to kari ta mapapilo lawo ta karata ku ti zwisisa, niku hi taleti lava va nga gondzangiko ni lava va nga tiyangiko va ti soholotako, ku nga zvalezvi va mahako kambe hi Mitsalo yin’wani, va ti kokela kuloviswa.
17 Kanilezvi, n’wina varandzekako, kota lezvi mu byelilweko a zvilo lezvi na zvi nga se maheka, ti woneleni kasi mu nga hambukisiwi zvin’we navo hi kuwonha ka vahambunyeti va nayo, mu retemuka muwa hambu lezvi mu tiyileko.
18 Kanilezvi simamani ku kula tipswalweni ni ka ku tiva Jesu Kristu, loyi a nga Hosi tlhelo Muhanyisi wa hina. A wudzundzo a give ka yena nyamutlha ni kala kupindzuka. Amen.
