2 Timote 1:1-18
1 Mina Pawule, ndzi nga mupostoli wa Kristu Jesu hi kurandza ka Nungungulu, kasi ku kanela a citsumbiso ca wutomi legi gi nga ka Kristu Jesu,
2 ndza tsalela Timote, a n’wana a randzekako, ndziku:
A tipswalo, ni wuxinji, ni kurula zvi tako hi ka Nungungulu tlhelo Papayi ni ka Kristu Jesu a Hosi ya hina a zvive na wena.
3 Ndza bonga Nungungulu loyi ndzi mu tirelako hi livhalo li basileko a ku fana ni lezvi a vakokwani va mina va mahileko, na ndzi nga tsiki ku ku alakanya mikhongelweni ya mina wusiku ni mumu.
4 Laha ndzi alakanyako a mihloti ya wena, ndzi xuva nguvhu ku ku wona kasi ndzi fela ku tala hi kutsaka.
5 Hakuva ndza alakanya a kukholwa ka wena ko kala ku fayelisela, loku a kusangula ku nga hi ni kokwani wa wena Loyisi, ni mamani wa wena Eunike; ndza kholwa lezvaku wenawu u nako.
6 Hikwalaho, ndza ku alakanyisa lezvaku u hlanganyeta a cinyikiwo ca Nungungulu leci u ci kumileko hi lezvi ndzi nga ku tlhateka mandla.
7 Hakuva Nungungulu a nga hi nyikangi a moya wa wutoya, kanilezvi i hi nyikile a moya wa ntamu, ni wa lirandzo ni wa kupima ku nene.
8 Hikwalaho u ngavi na tingana a ku kustumunya hi Hosi ya hina, ne hambu kuva ni tingana hi mina ndzi nga cibochwa hi kota ya yona, kanilezvi xaniseka zvin’we na mina hi kota ya mahungu ya ma nene na u tsumba a ntamu wa Nungungulu.
9 Hi yena a nga hi ponisa ni ku hi vitana hi kuvitana ko basa; a nga mahangi lezvo hi kota ya mitiro ya hina, kanilezvi kuve hi kota ya kungo gakwe ni tipswalo takwe leti a hi kombisileko ha Kristu Jesu kusukela zvikhatini zva kaleloko.
10 Kanilezvi, makunu ti kombisilwe tiku dlunya hi kuwonekeliswa ka Muhanyisi wa hina, Kristu Jesu, loyi a fuvisileko kufa, a hi vhululela ndlela ya ku kuma wutomi ni kungahini* hi ku tirisa a mahungu ya ma nene,
11 lawa ndzi yimisilweko a kuva mukaneli, ni mupostoli, ni mugondzisi wa wona.
12 Hi kota ya lezvo, ndza xanisekawo hi zvilo lezvi, kanilezvi a ndzi na tingana. Hakuva ndza mu tiva Loyi ndzi kholwako kakwe, niku a ndzi kanakani lezvaku i na ni ntamu wa ku hlayisa lezvi ndzi zvi vekileko kakwe kala sikwini lego.
13 Khoma zvi tiya ka timhaka ti hanyisako,* leti u ti zwileko ka mina hi kukholwa ni lirandzo leli li nga ka Kristu Jesu.
14 A tshomba leyi u nyikilweko, yi hlayise hi moya wo basa lowu wu tshamako ka hina.
15 Wena wa zvi tiva lezvaku vontlhe le provhinsya ya Azia va ndzi tsikile, a ku patsa na Figelusi na Hermogenesi.
16 A Hosi yi wa va mahele wuxinji a va ngango wa Oniseferusi, hakuva yena i wa tala ku ndzi tangalisa, niku a nga vangi ni tingana hi machini* lawa ma ndzi bohileko.
17 Kanilezvi a cikhati leci a nga hi le Roma i no ndzi lavetela kala a ndzi kuma.
18 Ndzi xuva lezvaku Hosi Jehovha a mu mahela wuxinji sikwini lego. Wenawu wa zvi tiva khwatsi zvontlhe lezvi a nga ndzi mahela le Efesusi.
