2 Timote 2:1-26
2 Makunu wena n’wananga, simama ku kuma ntamu tipswalweni leti ti nga ka Kristu Jesu.
2 Hikwalaho, a timhaka leti u ti zwileko ka mina, ti tiyisilweko hi vakustumunyu vo tala, ti gondzise a vavanuna vo tsumbeka kasi vonawu va zvi kota ku gondzisa khwatsi van’wani.
3 Kota musochwa wa mu nene wa Kristu Jesu, xaniseka zvin’we na mina zvikaratweni.
4 A ku na musochwa a mahako yin’wani mitiro kasi a kuma mali, hakuva i lava ku tsakisa loyi a mu vitanileko wusochweni.
5 Ni lomu ka mihlakano konawu, loyi a nga ka mapalisana a nga bohisiwi cidlodlo* ahandle ka loku a chikele magumo hi ku landza zvileletelo.
6 A murimi loyi a tirako hi kutikarata hi yena a faneleko ku ranga aga a mihandzu ya kona.
7 Simama ku ehleketa hi lezvi ndzi ku byelako; a Hosi yi ta ku nyika kuzwisisa zvilweni zvontlhe.
8 U nga rivali lezvaku Jesu Kristu i vhuxilwe hi ka vafileko niku i wa hi wa pswalo wa Dhavhidha,* kota kuwula ka mahungu ya ma nene lawa ndzi ma chumayelako,
9 ni ku xaniseka hi kota ya wona, ndzi bohiwa a ku khwatsi ndzova cigevenga. Hambulezvo a mhaka ya Nungungulu a yi bohiwangi.
10 Hikwalaho, ndza timisela zvilo zvontlhe hi kota ya vahlawulilweko, kasi vonawu va fela ku kuma kuponisiwa loku ku tako ha Kristu Jesu, zvin’we ni kungangamela ka pindzukelwa.
11 Yi tsumbekile a mhaka leyi yaku: Loku hi file zvin’we naye, hakunene hi ta hanya zvin’we naye;
12 loku hi simama ku timisela, hi ta fuma naye; loku hi mu ala, yenawu i ta hi ala;
13 loku hina hi nga tsumbeki, yena i ta simama ku tsumbeka, hakuva a nga zvi koti ku ti ala.
14 Simama ku va alakanyisa a timhaka leti, u va gondzisa* mahlweni ka Nungungulu lezvaku va ngalwi hi kota ya magezu, zvi nga zvilo zvi nga vhuniko nchumu hakuva zvi hambukisa* lava va zvi zwako.
15 Maha zvontlhe zvi nga ntan’wini wa wena kasi u amukeleka mahlweni ka Nungungulu, u hi mutiri a nga hava nchumu wu mu wisako tingana, loyi a tirisako khwatsi a mhaka ya lisine.
16 Kanilezvi u nga ingiseli kuwulawula ku nga vhuniko nchumu loku ku nyenyezisako lezvi zvi basileko, hakuva a kuwulawula loko ku ta hambukisa vanhu vava kule nguvhu na Nungungulu.
17 A mhaka yabye yi ta hangalaka a ku fana ni cilondza ci simamako ku kula ci nga holi. A vokari vabye hi Himenewusi na Filetusi.
18 A vavanuna lava va hambukile lisineni, va wula lezvaku a kuvhuka ka vafileko ku sina ku mahekile, va daya kukholwa ka vokari.
19 Kanilezvi a ciseketelo co tiya ca Nungungulu ci simama ci yimile, na ci hi ni cifungo* leci: “Jehovha wa va tiva lava va nga vakwe”, niku: “Ni wihi a khongelako vitweni ga Jehovha i wa tsike kungalulami”.
20 Lomu ndlwini ya hombe a ku na zvibya zva ouro ni zva prata basi, kanilezvi ku na ni zvo vatliwa* ni zva wumba. A zvokari zvi na ni mitiro yo dzundzeka kanilezvi a zvin’wani zvi na ni mitiro yi nga dzundzekiko.
21 Hikwalaho, loku a munhu a tsawukana ni zvibya lezvi zvi nga ni mitiro yi nga dzundzekiko, i tava cibya ca ntiro wo dzundzeka, leci ci basisilweko, ci tirelako nguvhu a n’winyi wa cona, ci longiselweko ku maha mitiro yontlhe yo saseka.
22 Hi cigelo leco, fularela a kunavela ka lava vaswa, u hlota kululama, ni kukholwa, ni lirandzo, ni kurula, zvin’we ni lava va khongelako ka Hosi hi mbilu yi basileko.
23 Ahandle ka lezvo, u nga ti nghenisi ka kukanetisana hi timhaka ta wupumbu ti nga vhuniko nchumu, hakuva wa zvi tiva lezvaku ti vanga kulwa.
24 Hakuva a nandza ga Hosi a gi faneli kulwa, kanilezvi gi fanele kuva munhu wa mu nene ka vontlhe, a zvi tivako ku gondzisa, na a zvi kota ku ti khoma loku a wonhelwa.
25 I fanele ku zvi kota ku gondzisa hi kurula lava va kanetako. Kuzvilava Nungungulu i ta va nyika a kuhundzuluka* vaza va li tiva khwatsi a lisine.
26 Makunu va ta ti laya va chukula ntlhan’wini wa Sathani* kota lezvi a nga va phasile kasi va maha kurandza kakwe.
Mitlhamuselo ya lahasi
^ Kutani: “korowa”.
^ Hi kukongoma: “mbewu ya Dhavhidha”.
^ Hi kukongoma: “u va nyika wukustumunyu go mbhelela”.
^ Kutani: “hohlota”.
^ Kutani: “marka”.
^ Kutani: “zvo mahiwa hi sinya”.
^ Kutani: “i ta va tsika va cica maalakanyo”.
^ Hi ciGreki: di·á·bo·los, zvi wulako ku “mulumbeti”.
