2 Timote 3:1-17
3 Kanilezvi tiva lezvaku masikwini yo gumesa ku tava ni zvikhati zva zvikarato.
2 Hakuva a vanhu va ta ti randza wutsumbu, va randza mali, va ti gwirisa, va ti kulisa, va hi va tihlamba, va nga ingisi vapswali vabye, va nga bongi, va nga tsumbeki,
3 va nga randzi maxaka yabye, va womelela ka mawonela yabye, va hi valumbeti, va nga ti khomi, va hi vo leva, va nga randzi zva zvi nene,
4 va hi vatokometi, va hi va kanu,* va tala hi matshandza, va randza ku ti tsakisa va tsika ku randza Nungungulu,
5 va wonekisa ku khwatsi va khozela Nungungulu kanilezvi na va kaneta a ntamu wa kona. Fularela a vanhu va matshamela lawo.
6 Cikari kabye, ku huma vavanuna lava va nyanimelako va nghena mingangweni va kanganyisa a vavasati lava va nga ni gome va bindziwako hi zviwonho, na va susumetwa hi kunavela ko tala.
7 A vavasati lava va gondza contlhe cikhati, kanilezvi a va se li tiva lisine.
8 A ku fana ni lezvi Janesi na Jambresi va nga vhukela Mosi, hi zvalezvo ni lava kambe, vonawu va vhukela lisine. A kupima ka vavanuna lava ku wonhekile hi kumbhelela, a va vhuni nchumu kukholweni.
9 Hambulezvo, va nga ta humelela, hakuva a wupumbu gabye gi ta woneka giku dlunya ka vanhu vontlhe, a ku fana ni lezvi zvi nga maheka ka vavanuna lavo va vambiri.
10 Kanilezvi wena u landzele khwatsi a gondzo ya mina, ni fambela ga mina, ni kungo ga mina, ni kukholwa ka mina, ni lihlazva-mbilu la mina, ni lirandzo la mina, ni kutimisela ka mina,
11 ni tixanisa, ni kuxaniseka loku ndzi nga kumana nako le Antiyokiya, ni le Ikoniyume, ni le Listra. Ndzi no timisela a tixanisa leto, a Hosi yi ndzi tlhatlhisa ka tona tontlhe.
12 Kunene, vontlhe lava va xuvako ku hanya hi kukholwa kota vapizani va Kristu Jesu va ta xanisiwa.
13 Kanilezvi a vakubiha ni vakanganyisi va taya mahlweni va biha nguvhu, va kanganyisa van’wani va tlhela va kanganyisiwa.
14 Hambulezvo, wena simama zvilweni lezvi u gondzileko, ni ka lezvi va ku tlhamuseleko kala u zvi kholwa, hakuva wa va tiva lava u gondzileko ka vona,
15 niku kusukela wun’wananeni* u tivile a mitsalo yo basa, leyi yi nga ni ntamu wa ku ku maha u tlhariha kasi u ponisiwa hi ku kholwa ka Kristu Jesu.
16 Yontlhelele Mitsalo yi pimisilwe hi Nungungulu niku ya vhuna kugondziseni, ni kukawukeni, ni kululameteni ka zvilo, ni kulayeni hi zva kululama;
17 kasi a munhu wa Nungungulu a fela ku mbhelela, na a longiselelwe khwatsi kasi ku maha a mitiro yontlhe yo saseka.
Mitlhamuselo ya lahasi
^ Kutani: “kani”.
^ A gezu ga ciGreki gi tirisilweko laha a kutala ka zvikhati gi wula a n’wanana a ha hiko ku pswaliwa.
