2 Timote 4:1-22
4 Ndza ku laya mahlweni ka Nungungulu ni ka Kristu Jesu, loyi a to lamula a vahanyako ni vafileko, hi kuwonekeliswa kakwe ni Mufumo wakwe, ndziku:
2 Chumayela a mhaka, u maha lezvo hi cihatla ka zvikhati zva zvi nene ni ka zvikhati zvo nonoha; kawuka, u laya, u khongotela hi lihlazva-mbilu lontlhe kota mugondzisi a zvi tivako ku gondzisa khwatsi.
3 Hakuva ku ta chikela a cikhati leci va to kala va nga ha lavi kuzwa nchumu hi gondzo yi hanyisako,* kanilezvi va ta ti lavela vagondzisi va ku va nyangalatela tindleve* kasi ku xurisa a kunavela kabye.
4 Va ta fularela lisine va ya ingisela a tikaringani.
5 Kanilezvi wena tirisa khwatsi a kupima ka wena zvilweni zvontlhe, u timisela zvikarato, u maha ntiro wa muvhangeli,* u maha ntiro wa wena hi kumbhelela.
6 Hakuva ndzi sina ndzi chululiwa a ku khwatsi ndzi munyikelo wa vhinyo, niku a cikhati ca lezvaku ndzi tlhatlhiswa ci chikele.
7 Ndzi lwile a yimpi ya yi nene, ndzi tsutsumile kala magumo, ndzi tlhela ndzi hlayisa a kukholwa.
8 Kusukela lezvi, ndzi vekelwe a cidlodlo* ca kululama, leci a Hosi, yi nga mulamuli wo lulama, yi to ndzi nyika kota nchachazelo wa mina sikwini lego; yi nga ta nyika mina ndzoce, kanilezvi yi ta nyika ni vontlhe lava va nga randza a kuwonekeliswa kakwe.
9 Hatlisa uta ka mina zvezvi,
10 hakuva Dhemasi i ndzi tsikile hi kota ya ku randza tiko legi,* i yile Tesalonika; Kreseke i yile Galatiya, na Titusi i yile Dhalmatiya.
11 Ndzi no sala na Luka basi. Tana na Marku hakuva wa ndzi vhuna nguvhu ntirweni lowu.
12 Kanilezvi ndzi rumile Tikikusi aya Efesusi.
13 A cikhati leci u tota seno, tana ni bhaji* legi ndzi gi siyileko na Karpusi le Trowasi. Tana ni mabhuku kambe, nguvhunguvhu lawa ya mabhebhe.
14 Alexandro loyi wa munyekisi wa kobre i ndzi wonhele nguvhu. Jehovha i ta mu tlhelisela hi kuya hi mitiro yakwe.
15 Wenawu ti wonele ka inaloye, hakuva i kanetile nguvhu a mahungu ya hina.
16 Laha ndzi nga ti hlamulela hi khati go sangula i hava a nga ta yima na mina, vontlhe va no ndzi tsika ndzoce — hambulezvo va nga hlayelwi nandzu hi kota ya lezvo.
17 Kanilezvi a Hosi yi no ta yima kusuhani na mina yi ndzi nyika ntamu, kasi a ntiro wa kuchumayela wu mahiwa hi kumbhelela ha mina, ni lezvaku a matiko wontlhe mazwa a mahungu ya ma nene; ndzi no tlhatlhisiwa non’wini wa nghala.
18 A Hosi yi ta ndzi tlhatlhisa ka mitiro yontlhe yo biha, niku yi ta ndzi ponisa kasi ndzi nghena Mufun’weni wakwe wa matilo. A wudzundzo a give ka yena kala kupindzuka ni kupindzuka. Amen.
19 Rungula Priska na Akwila ni va ka Oniseferusi.
20 Erastusi i sele Korinte, kanilezvi Trofimusi ndzi mu siyile Miletu hi ku babya.
21 Hatlisa uta na ci nga se sangula a cirami.
Ewubhulusi wa ku rungula. Pudhensi na Linusi na Klaudhya ni vamakabye vontlhe vonawu va ku rungula.
22 A Hosi a yive zvin’we ni moya lowu u wu kombisako. A tipswalo takwe a tive zvin’we na wena.
Mitlhamuselo ya lahasi
^ Kutani: “yi nene”.
^ Kutani: “va ku va byela lezvi zvi va tsakisako”.
^ Kutani: “u simama ku chumayela mahungu ya ma nene”.
^ Kutani: “korowa”.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “jasi”.
