2 Va Le Korinte 10:1-18
10 Makunu mina Pawule, ndza mu khongotela hi kurula ni wunene ga Kristu, mina loyi ndzi nga hava ntamu loku ndzi hi cikari ka n’wina, kanilezvi ndzi nga ni ntamu loku ndzi hi kule na n’wina.
2 Ndzi khongelela lezvaku loku ndzita ka n’wina, ndzi ngati ndzi ta va kawuka hi ntamu lava va hi wonisako ku khwatsi hi famba hi ka nyama.
3 Hakuva hambu lezvi hi fambako hi ka nyama, a hilwi hi ka nyama.
4 Hakuva a matlhari ya hina a hi ya nyama, kanilezvi matlhari ya ntamu hi nyikilweko hi Nungungulu kasi ku khungumulela a makhokhola.
5 Hakuva hi hahlulela a maalakanyo ni zvontlhe lezvi zvi tlakukileko zvi vhalelako vanhu a ku tiva Nungungulu, hi hlula* maalakanyo wontlhe hi ma maha zvibochwa zva ku ingisa Kristu;
6 ni loku a kuingisa ka n’wina ku mbhelele, hi tava hi longile ku tsayisa a kungaingisi kontlhe.
7 Mu cuwuka zvilo kota lezvi zvi wonekisako zvona matihlweni. Loku munhu a kholwa lezvaku wa Kristu, i wa ehlekete kambe hi mhaka leyi yaku: A ku fana ni lezvi yena a nga wa Kristu, hinawu hi va Kristu.
8 Hakuva hambu loku ndzi wo ti dzundza ndzi hundzeletanyana hi kota ya ntamu lowu a Hosi yi hi nyikileko lezvaku hi mu aka hi wona, na ku nga hi ku mu hahlula, ndzi wa nga ta wisiwa tingana.
9 Hakuva a ndzi lavi lezvaku mu alakanya ku ndzi wo lava ku mu dzukisela hi mapapilo ya mina.
10 Hakuva ve ngalo: “A mapapilo yakwe ma tshinga niku ma na ni ntamu, kanilezvi loku ku hi yena wutsumbu a nga cikari ka hina a nga na ntamu, ni lezvi a wulawulako zva hlamukisa.”
11 Loyi a wulako lezvo, i wa zvi tive lezvaku lezvi hi wulako hi mapapilo na hi nga hi kona, hi zvalezvi hi to maha loku hita.
12 Hakuva a hi tiyi ku ti hlaya zvin’we kutani ku ti ringanisa ni vokari va ti dzundzako ha voce. Kanilezvi a vanhu lavo a va tivi, hakuva va ti hlola hi mahlolela yabye ni ku ti ringanisa na vona venyi.
13 Hambulezvo hi nga ta ti dzundza a ku hundza mpimo, kanilezvi hi ta ti dzundza ndzeni ka mbhingano lowu Nungungulu a hi tsemeleko,* lowu wu fambako kala seyo n’wina mu nga kona.
14 Phela a hi tsemakanyi* a mimbhingano ya hina a ku khwatsi hi loku n’wina mu hi handle, hakuva kuve hina vo ranga ku mu chikelela ni mahungu ya ma nene xungetano hi Kristu.
15 A hi ti dzundzi ku hundza mpimo hi ntiro wa mun’wani munhu, kanilezvi hi tsumba lezvaku laha a kukholwa ka n’wina ku simamako ku kula, lezvi hi zvi mahileko zvonawu zvi ta andza cikari ka n’wina. Makunu hinawu hi ta simama ku andza,
16 kasi hi fela ku kanela mahungu ya ma nene matikweni ya ku hundza seyo mu nga kona, lezvaku hi nga ti dzundzi hi ntiro lowu wu sinako wu mahilwe cipandzeni ca mun’wani munhu.
17 “Kanilezvi loyi a ti dzundzako, i wa ti dzundze hi Jehovha.”
18 Hakuva loyi a ti dzundzako ha yece a hi yena a amukelekako, saseka loyi a dzundziwako hi Jehovha.
