2 Va Le Korinte 11:1-33
11 Ndzi xuva lezvaku mu timisela ha mina hambu loku ndziku khwatsi ndzi cipumbu. Kunene, ma timisela ha mina!
2 Ndza lusa ha n’wina hi ciluse co fana ni leci ca Nungungulu, hakuva hi mina ndzi nga mu tsumbisa a ku chadha ni nuna mun’we ndziku ndzi ta mu nyikela ka Kristu kota nhwana* a basileko.
3 Kanilezvi ndza chava lezvaku a ku fana ni lezvi a nyoka yi nga kanganyisa Evha hi tipulani ta yona, a maalakanyo ya n’winawu ma nga tshuka ma gohiwa ma susiwa wuneneni ni kubaseni loku ku lumbako Kristu.
4 Hakuva loku kuta munhu ka n’wina, a ta kanela hi mun’wani Jesu wo hambana ni loyi hi mu kaneleko, kutani loku mu amukela wun’wani moya wo hambana ni lowu mu sinako mu wu amukele, kutani man’wani mahungu ya ma nene yo hambana ni lawa mu ma amukeleko, zva mu olovela a ku mu timisela.
5 Hakuva a vapostoli va n’wina lava va ti mahako vamasasani a va ndzi pali hi nchumu.
6 Kanilezvi hambu loku ndzi nga wulawuli khwatsi, ndza tiva; kunene, lezvo hi zvi kombisile zviku dlunya ka n’wina zvilweni zvontlhe ni hi tindlela tontlhe.
7 Mu alakanya ku ndzi no wonha hi lezvi ndzi nga ti koramisa kasi n’wina mu tlakuswa, hi ku kanela a mahungu ya ma nene ya Nungungulu ka n’wina na ndzi tsakile ndzi nga mu hakhelisi nchumu ke?
8 Ndzi phangile* man’wani mabandla hi ku ma tsika ma ndzi vhuna kasi ndzi fela ku tirela n’wina.
9 Hambulezvo, laha ndzi nga vhumala lezvi ndzi nga zvi lava a cikhati leci ndzi nga hi cikari ka n’wina, a ndzi bindziselangi munhu, hakuva a vamakabye lava va ngata hi le Makedhoniya va no ndzi nyika zvontlhe lezvi ndzi nga zvi vhumala. Hi tindlela tontlhe ndzi no zama ku nga mu bindziseli niku ndza ha ta simama ku maha lezvo.
10 Ndza hlambanya hi lisine la Kristu leli li nga ka mina, ndzi nga ta tsika ku wulawula hi wudzundzo legi matikweni ya Akaya.
11 Hikuyini? Ndzo kala ndzi nga mu randzi ke? Nungungulu wa zvi tiva lezvaku ndza mu randza.
12 Kanilezvi lezvi ndzi mahako ndzi ta simama ku maha, kasi ndzi fuvisa a malundza* ya lava va lavetelako zvilo zva ku ti fananisa na hina ka lezvi* va ti dzundzako hi zvona.
13 Hakuva a vanhu lavo vapostoli va mawunwa, ni vatiri va kanganyisako, va ti mahako ku khwatsi vapostoli va Kristu.
14 Lezvo a zvi hlamalisi, hakuva hambu Sathani wa ti cica a ku khwatsi i ngilozi ya kuwonekela.
15 Hikwalaho a zvi hlamalisi loku a malandza yakwe wonawu ma ti cica ma ku khwatsi malandza ya kululama. Kanilezvi a kugumesa kabye ku ta fana ni mitiro yabye.
16 Ndza engeta ndziku: Ku ngavi na munhu a alakanyako ku ndzi cipumbu. Kanilezvi hambu loku n’wina mu alakanya lezvo, ndzi amukeleni kota cipumbu, kasi minawu ndzi fela ku ti dzundzanyana.
17 Lezvi ndzi zvi wulako ka cikhati leci, a ndzi wuli na ndzi landza cikombiso ca Hosi, kanilezvi ndzi wula kota cipumbu ci ti tsumbako kutidzundzeni ka cona.
18 Kota lezvi a votala va ti dzundzako hi ka nyama, minawu ndzi ta ti dzundza.
19 Kota lezvi n’wina “mu tivako” nguvhu, ma timisela lava va zvipumbu na mu tsakile.
20 Kunene, mu timisela ni wihi a mu mahako tikhumbi, mu timisela ni wihi a mu phangako, mu timisela ni wihi a mu tekelako zvilo zva n’wina, mu timisela ni wihi a ti tlakusako cikari ka n’wina, ni ku timisela ni wihi a mu bako pama lomu nghoheni.
21 Zva hi wisa tingana a ku wula lezvi, hakuva zvi nga tshuka zvi mahisa ku khwatsi hi wa nga hi na ntamu.
Kanilezvi loku a van’wani va hi ni cixinya, minawu ndzi na ni cixinya — lezvo ndzi zvi wula kota cipumbu.
22 Vova maHebheru ke? Minawu ndzi muHebheru. Vova vaIzrayeli ke? Minawu ndzi muIzrayeli. Vova va pswalo* wa Abrahama ke? Minawu ndzi wa pswalo wakwe.
23 Vova malandza ya Kristu ke? Ndza hlamula na ndzi ku khwatsi ndzo hlanya, ndziku: Hi mina legi ga hombe ga kona: Mitirweni ndza va hundza, ndzi vhalelwe paxweni makhati yo tala, ndzi biwa timhika to tsandza ni ku hlaya, ndziva timhangweni ta kufa makhati yo tala.
24 Hi ntlhanu wa makhati, a vaJudha va ndzi bile a 39 wa timhika,
25 ndzi biwa hi tinhonga makhati manharu, khati gin’we ndzi gandliwa hi maribye, ndzi pandzekelwa hi citimela* lomu bimbini makhati manharu, ndzi mbheta siku gin’we ni wusiku ga kona na ndzi pepetseka lomu bimbini.
26 Makhati yo tala ndzi wa hi tipfhumbeni, ndziva ka timhango micongweni, ndziva timhangweni ta ku phangiwa, ndzi lava ku dawa hi va ka hina ni vamatiko, ndziva timhangweni lomu dhoropeni ni lomu ciwuleni, ndziva timhangweni lomu bimbini, ni kuva timhangweni ta vamakabye va mawunwa.
27 Ndzi tirile yi nga chayi, makhati yo tala ndzi pileka kala gica, ndzi tshama ni ndlala ni tora, ndzi vhumala zvakuga makhati yo tala, ndzi biwa hi cirami na ndzi vhumala ni co boha.
28 Ahandle ka zvilo lezvi zva lahandle, ku na ni leci ci ndzi gako* siku ni siku: ku nga ku karatekela mabandla wontlhe.
29 Himani a nga rereka mina ndzi nga rereki? Himani a hambukisilweko kukholweni mina ndzi ngaswi hi zanga ke?
30 Loku zvi lava ku ndzi ti dzundza, ndzi ta ti dzundza hi zva gome ga mina.
31 A Nungungulu tlhelo Papayi wa Hosi Jesu, ku nga yena a faneleko ku dhumiswa kala kupindzuka, wa zvi tiva ku a ndzi hembi.
32 Le Dhamasku, a govhernadhori loyi a nga fumelwa hi hosi Aretasi, i no lavelela a dhoropa ga vaDhamasku, kasi a ndzi khoma,
33 kanilezvi a vamakabye va no ndzi relelisa hi cindzala* hi laha janeleni ga khurisi ga dhoropa, ndzi ponisa lezvo mandleni yakwe.
Mitlhamuselo ya lahasi
^ A nhwana wasati a kalako a nga se hlengela masango ni wanuna.
^ Kutani: “yivele”.
^ Kutani: “matshandza”.
^ Kutani: “zvikhundla lezvi”.
^ Hi kukongoma: “mbewu”.
^ Kutani: “navhiyo; paketi”.
^ Kutani: “karatako”.
^ Kutani: “cirundzu”.
