2 Va Le Korinte 12:1-21
12 Mina ndzi ta ti dzundza, hambu loku zvi nga vhuni nchumu. Ndzi ta wulawula hi miwoniso ni kuvhululelwa zvi tako hi ka Hosi.
2 Ndza tiva munhu a nga zvin’we na Kristu, loyi ka 14 wa malembe ma hundzileko a tekilweko a yisiwa ka tilo ga wunharu — kani i wa hi mirini, kutani i wa hi handle ka miri, a ndzi zvi tivi; Nungungulu wa zvi tiva.
3 Ina, ndza mu tiva munhu loye — kani i wa hi mirini, kutani i wa hi handle ka miri, a ndzi zvi tivi; Nungungulu wa zvi tiva —
4 loyi a tekilweko a yisiwa paradhiseni a tlhela azwa magezu ma nga wulekiko ne ma nga faneliko ku wuliwa hi munhu.
5 Ndzi ta ti dzundza hi munhu loye, kanilezvi ndzi nga ta ti dzundza hi zva mina wutsumbu, ndzi to ti dzundza hi zva gome ga mina basi.
6 Hi ku hambu loku ndzo ti dzundza, ndzi nga ta maha cipumbu, hakuva ndzi ta wula lisine. Kanilezvi ndza ti khoma ndzi nga mahi lezvo, kasi ku ngavi na munhu a ndzi nyikako wudzundzo go hundza lezvi a zvi wonako ka mina kutani ku zvizwa ka mina,
7 hi lezvi ntsena ndzi amukeleko a kuvhululelwa ka hombe ko kota loku.
Kanilezvi kasi ndzi nga ti tlakusi ku hundza mpimo, ndzi no nyikwa muzwa nyameni, ku nga ngilozi ya Sathani, yi tshamako hi ku ndzi tshakatela* kasi ndzi nga ti tlakusi ku hundza mpimo.
8 Ndzi khongotele Hosi makhati manharu lezvaku yi susa a muzwa lowo ka mina.
9 Kanilezvi yi no ndzi hlamula yiku: “A tipswalo ta mina ka wena ti enele, hakuva a ntamu wa mina wu maha wa hombe nguvhu a cikhati leci wena u rerekileko.” Hikwalaho, ndzi ta ti dzundza na ndzi tsakile nguvhu gomeni ga mina kasi a ntamu wa Kristu wu tshama hehla ka mina kota tenda.
10 Hi cigelo leco, ndza xalala loku ndzi rerekile, ni loku ndzi rukatelwa, ni loku ndzi hi kuvhumaleni, ni loku ndzi xanisiwa ni ku karateka hi kota ya Kristu. Hakuva loku ndzi rerekile, hi kona ndzi nga ni ntamu.
11 Makunu ndzi mahile cipumbu hi ku ti dzundza na ndzi kurumetiwa hi n’wina, kasi lezvo hi n’wina mu nga fanele ku ndzi dzundza. Hakuva a vapostoli va n’wina lava va ti mahako vamasasani a va ndzi pali hi nchumu, hambu loku ndzi nga hi wa nchumu.
12 Kunene, a zvikombiso zva lezvaku ndzi mupostoli zvi wonekile cikari ka n’wina hi kutimisela ka hombe, ni zviwoniso, ni zvihlamaliso, ni mitiro ya ntamu.
13 Mu ma pala hi yini a mabandla lawa man’wani, ahandle ka lezvi ndzi nga kala ku mu bindzisela ke? Ndzi tsetseleleni a cihoxo leci.
14 Legi i khati ga wunharu ndzi longileko kuta ka n’wina, kanilezvi ndzi nga ta mu bindzisela. Hakuva a ndzi lavi zvilo zva n’wina, ndzi lava n’wina. Hakuva a ku rindzelwi lezvaku a vana va vekela tshomba a vapswali vabye, kanilezvi a vapswali hi vona va faneleko ku vekela tshomba a vana vabye.
15 Hakuva mina ndzi ta nyikela zvontlhe zva mina, ni ku nyikelwa wutsumbu ga mina hi kota ya n’wina na ndzi tsakile nguvhu. Loku mina ndzi mu randza nguvhu, ahati n’wina mu fanele ku ndzi randza kutsongwani ke?
16 Kanilezvi hambu loku zvi no tshamisa kuyini, a ndzi mu bindziselangi. Hambulezvo mu ngalo: “I tirisile tipulani kasi a hi phasa hi mano”.
17 A ndzi mu gelangi nchumu hi ku tirisa lava ndzi va rumeleko ka n’wina, ndzo hemba ke?
18 Ndzi no khongotela Titusi lezvaku ata ka n’wina, ndzi mu rumela ni makabye mun’wani. Titusi a nga mu gelangi nchumu. A hi zvona ke? Kasi a hi fambangi hi kupima kun’we, hi tlhela hi maha zvilo hi mahela gin’we ke?
19 A cikhati contlhe leci mu wa alakanya lezvaku ho ti yimelela mahlweni ka n’wina ke? Ahihi. Kota valandzeli va Kristu, hi wulawula lisine mahlweni ka Nungungulu. Kanilezvi varandzekako, zvontlhe lezvi hi mahako hi zvi mahela ku vhuna n’wina.
20 Hakuva ndza chava lezvaku loku ndzita ka n’wina, ndzi nga tshuka ndzi ta mu kuma na mu nga tshamisangi lezvi ndzi nga xuva ku mu kumisa zvona, na minawu na ndzi nga tshamisangi lezvi mu nga xuva ku ndzi wonisa zvona. Kanilezvi ndzi nga tshuka ndzi ta kuma a kuholova, ni ciluse, ni zanga, ni kuhambana kupima, ni kulumbetana, ni mahlevo, ni kutikukumukisa, ni woyonga.
21 Ku nga taku loku ndzita kambe ka n’wina, a Nungungulu wa mina a ndzi tsongahata mahlweni ka n’wina, ndziza ndzi xanisekela votala lava va nga wonha kale va nga ti soli ka kungahlazveki kabye, ni ka wubhayi,* ni ka mahanyela yabye ya tingana.*
Mitlhamuselo ya lahasi
^ Kutani: “bungutela”.
^ Hi ciGreki: porneía. Wona Tlhamuselo wa magezu ya Bhibhiliya.
^ Hi ciGreki: asélgeia. Wona Tlhamuselo wa magezu ya Bhibhiliya.
