2 Va Le Korinte 13:1-14
13 Legi i khati ga wunharu ndzi longileko kuta ka n’wina. “Ni yihi mhaka yi fanele ku tiyiswa hi nomu wa vakustumunyu vambiri kutani vanharu.”
2 Hambu lezvi ndzi nga kule na n’wina, zvi wa mahise ku khwatsi ndzi cikari ka n’wina hi khati ga wumbiri. Ndza ranga ndzi tlharihisa lava va sinako va wonhile ni vontlhe lava van’wani, lezvaku loku ndzo tshuka ndzita kambe ka n’wina ndzi nga ta tsetsa munhu,
3 hi lezvi mu hlotako cikombiso ca lezvaku Kristu, loyi a nga hiko munhu wa gome ka n’wina kanilezvi a nga ni ntamu cikari ka n’wina, hi yena a wulawulako hi nomu wa mina.
4 Hakuva hambu lezvi a nga dawa mhandzeni hi kota ya kuva wa gome, makunu wa hanya hi kota ya ntamu wa Nungungulu. Kunene, hinawu hi na ni gome zvin’we naye, kanilezvi hi ta hanya zvin’we naye hi kota ya ntamu wa Nungungulu wu nga ka n’wina.
5 Tshamani hi ku ti hlola kasi mu wona lezvaku ma hi kona kukholweni ke; tshamani hi ku ti hlola kasi mu tiva ku mu vanhu va tshamela muni. Mo kala mu nga zvi tivi lezvaku Jesu Kristu i zvin’we na n’wina ke? Loku zvi hi tano, a mu amukeleki.
6 Ndza tsumba ku mu ta zvi tiva lezvaku hina ha amukeleka.
7 Makunu hi khongela ka Nungungulu lezvaku mu nga mahi zvakubiha. A hi maheli ku hina hi amukeleka, kanilezvi hi lava ku n’wina mu maha zva zvi nene, hambu loku hina hi nga amukeleki.
8 Hakuva a hi zvi koti ku maha nchumu wu lwako ni lisine, kanilezvi hi maha ntsena lezvi zvi yimelako lisine.
9 Hakunene ha tsaka loku hina hi hi ni gome kanilezvi n’wina na mu hi ni ntamu. Hi zvalezvo hi zvi khongelelako, ku nga lezvaku mu lulamisa kupima ka n’wina.
10 Hi kota ya lezvo, ndzi tsala a timhaka leti na ndzi hi kule, kasi loku ndzita ka n’wina, ndzi ngati ndzi ta mu hahlula hi ntamu lowu a Hosi yi ndzi nyikileko lezvaku ndzi mu aka hi wona.
11 Hi kugumesa vamakabye, simamani ku tsaka, mu lulamisa kupima ka n’wina, mu vhumela ku chavelelwa, muva ni kupima kun’we, mu hanya hi kurula. A Nungungulu wa lirandzo ni wa kurula i tava na n’wina.
12 Losanani hi kupswopswana ko basa.
13 A vobasa vontlhe va mu rungula.
14 A tipswalo ta Hosi Jesu Kristu, ni lirandzo la Nungungulu, ni moya wo basa lowu hina hontlhe hi nyikilweko, a zvive na n’wina n’wentlhe.
