2 Va Le Korinte 2:1-17
2 Hakuva ndzi tiyisile mbilwini ya mina lezvaku ka khati legi ndzi to tlhela ndzi mu endzela, ndzi nga ta hata ndzi ta mu kwatisa.
2 Hakuva loku ndzi mu kwatisa, himani a to ndzi tsakisa loku ku nga hi yaloyi ndzi nga mu kwatisa ke?
3 Ndzi tsalile lezvi ndzi nga tsala kasi loku ndzi chikela ndzi nga kwatisiwi hi lava va nga fanele ku ndzi tsakisa, hakuva ndza tsumba lezvaku lezvi zvi ndzi tsakisako, hi zvona zvi tsakisako na n’winawu n’wentlhe.
4 Hakuva ndzi no mu tsalela na ndzi xaniseka nguvhu ni ku bayiseka mbilwini ya mina zvin’we ni mihloti yo tala, na ndzi nga maheli ku mu kwatisa, kanilezvi kasi ku mu komba lezvaku ndza mu randza nguvhu.
5 Makunu loku a hi kona a nga mu kwatisa, a nga kwatisangi mina, kanilezvi i kwatisile n’wina n’wentlhe — a ndzi lavi ku tshingisa a mhaka leyi.
6 Lezvi a wanuna loye a nga kawukiwa hi votala zvi ringene.
7 Makunu mu fanele ku mu tsetselela ni ku mu chavelela kasi a nga reriwi hi kubayiseka kakwe ka hombe.
8 Hikwalaho, ndza mu khongotela lezvaku mu tlhela mu mu komba ku ma mu randza.
9 Hi cona ci ndzi mahako ndzi mu tsalela, kasi ndzi wona lezvaku ma ingisa zvilweni zvontlhe ke.
10 Loyi n’wina mu mu tsetselelako, minawu ndza mu tsetselela. Kunene, ni cihi leci ndzi nga tsetselela (loku ci hi kona) ndzi zvi mahile hi kota ya n’wina mahlweni ka Kristu,
11 kasi hi nga hluliwi hi Sathani, hakuva ha ti tiva a tipulani takwe.*
12 A cikhati leci ndzi nga chikela Trowasi kasi ku kanela mahungu ya ma nene xungetano hi Kristu, hambu lezvi ndzi nga vhululelwe nyangwa ntirweni wa Hosi,
13 a moya wa mina a wu rulangi hi lezvi ndzi nga vhumala Titusi a makabye wa mina. Hikwalaho, ndzi no va salisa ndzi suka ndziya Makedhoniya.
14 Kanilezvi i wa bongiwe Nungungulu loyi contlhe cikhati a hi rangelako kuhluleni na hi hi zvin’we na Kristu, loyi kambe a tirisako hina kasi ku hangalasa* a masema ya lezvaku va fela ku mu tiva matshan’wini wontlhe!
15 Hakuva ka Nungungulu, hina hi masema yo nuhela ya Kristu cikari ka lava va ponisiwako ni cikari ka lava va lovako.
16 Ka lava va lovako, hi masema ya kufa ma yisako kufeni; ka lava va ponisiwako, hi masema ya wutomi ma yisako wutomini. Himani a ringanelwako hi zvilo lezvi?
17 Hi hina, hakuva hina a hi vaxavisi* va mhaka ya Nungungulu, a ku khwatsi hi lezvi a votala va mahako, kanilezvi hi wulawula lisine kota lava hi rumilweko hi Nungungulu; hi maha lezvo mahlweni ka Nungungulu na hi hi zvin’we na Kristu.
Mitlhamuselo ya lahasi
^ Kutani: “ha ma tiva a mano yakwe”.
^ Kutani: “zwata”.
^ Kutani: “vaxavisi va fambafambako”.
