2 Va Le Korinte 4:1-18
4 Hikwalaho, kota lezvi hi nga ni ntiro lowu hi kota ya tipswalo leti hi kombisilweko, a hi mbheli ntamu.
2 Kanilezvi hi tsikile a zvilo zva tingana lezvi zvi mahiwako kufihlaleni; a ha ha fambi hi kukanganyisa ne hambu ku bihisa a mhaka ya Nungungulu, kanilezvi hi tivekisa lisine hi kuva cikombiso ci nene ka livhalo la mun’we ni mun’wani mahlweni ka Nungungulu.
3 Kunene, loku ku hi lezvaku a mahungu ya ma nene lawa hi kanelako ma fihlele, ma fihlele ka lava va lovako,
4 hakuva a nungungulu wa tiko legi* i vhalile a kupima ka lava va nga kholwiko, kasi va nga woni a kuwonekela ka mahungu ya ma nene yo ngangamela ya Kristu, loyi a nga mufananiso wa Nungungulu.
5 Hakuva a hi chumayeli xungetano hi hina, kanilezvi hi chumayela lezvaku Jesu Kristu i Hosi, ni lezvaku hina hi malandza ya n’wina hi kota ya Jesu.
6 Hakuva Nungungulu loyi a ngaku ngalo: “A kuwonekela ku wa woninge munyameni”, hi yena a nga woninga timbilu ta hina kasi ku woningela vanhu lezvaku va tiva a kungangamela ka Nungungulu loku ku nga kona nghoheni ya Kristu.
7 Kanilezvi, a tshomba leyi hi nga nayo yi lomu ka zvibya zva wumba kasi zvi woneka lezvaku hi amukele ntamu wa hombe wo hundza wa munhu — wu nga ntamu wa Nungungulu, na wu nga hi wa hina.
8 Ha manyiwa matlhelweni wontlhe kanilezvi a hi manyiwi laha ka kuza hi tsandzeka ni ku ti hundzulusa; ha karateka nguvhu, kanilezvi a hi karateki laha ka kuza hi vhumala ni co maha;
9 ha xanisiwa, kanilezvi a hi tsikiwi hoce; ha tshakatelwa,* kanilezvi a hi dawi.
10 Contlhe cikhati ha timisela mirini wa hina a kuxaniseka ku yisako kufeni loku Jesu a nga xanisiwa hi kona, kasi hiva ni wutomi go fana ni legi ga Jesu.*
11 Hakuva hina hi hanyako, contlhe cikhati ha kumana ni kufa hi kota ya Jesu, kasi hiva ni wutomi go fana ni legi ga Jesu.*
12 Hikwalaho a kufa ku tira ka hina, kanilezvi a wutomi gi tira ka n’wina.
13 Hakuva khwatsi hi lezvi hi nga ni moya wa kukholwa ko fana ni loku ku tsalilweko kaku: “Ndza kholwa, hikwalaho ndza wulawula”, hinawu ha kholwa, hikwalaho ha wulawula,
14 na hi tiva lezvaku Loyi a vhuxileko Jesu i ta vhuxa na hinawu a ku fana na Jesu, a hi yisa mahlweni kakwe zvin’we na n’wina.
15 Hakuva a zvilo lezvi zvontlhe zvi maheka hi kota ya n’wina, kasi a tipswalo ta Nungungulu ti fela ku andza nguvhu ni lezvaku Nungungulu a dhumiswa hi kota ya mikhongelo ya votala ya kubonga.
16 Hikwalaho a hi rereki, hambu loku a munhu wa hina wa lahandle a hlakala, a munhu wa hina wa lomu ndzeni i mahiwa wa muswa siku ni siku.
17 Hakuva hambu lezvi a kuxaniseka* ku nga ka cikhatana ni lezvi ku vevukako, ku hi pswalela kungangamela ka hombe nguvhu ku nga hiko na kuringaniswa, ku nga kungangamela ka pindzukelwa;
18 na hi nga veki kupima ka hina zvilweni zvi wonekako, kanilezvi ka zvilo zvi nga wonekiko. Hakuva a zvilo zvi wonekako zva cikhatana basi, kanilezvi a zvilo zvi nga wonekiko zva kala kupindzuka.
Mitlhamuselo ya lahasi
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “bungutelwa”.
^ Hi kukongoma: “kasi a wutomi ga Jesu gi wonekeliswa mirini wa hina lowu wu fako”.
^ Hi kukongoma: “kasi a wutomi ga Jesu gi wonekeliswa mirini wa hina lowu wu fako”.
^ Kutani: “ciringo”.
