2 Va Le Korinte 6:1-18
6 Kota zvitiri-kulori na Nungungulu, ha mu khongotela lezvaku mu nga amukeli a tipswalo ta Nungungulu mahala.
2 Hakuva i ngalo: “Ndzi ku zwile cikhatini ca ku ku mahela wuxinji, ndzi ku vhuna sikwini ga kuhanyiswa.” Makunu leci hi cona cikhati ca kuva Nungungulu a hi mahela wuxinji. Hakunene legi i siku ga kuhanyiswa.
3 A hi khunguvanyisi munhu hi nchumu kasi a ntiro wa hina wu nga soliwi.
4 Kanilezvi zvilweni zvontlhe, hi komba lezvaku hi malandza ya Nungungulu: Hi timisela mindzhingo yo tala, ni tixanisa tinyingi, ni zvikhati zva zvikarato ni makhombo.
5 Ha biwa, hi vhalelwa mapaxweni, hi vhukelwa hi citshungu, hi tira yi nga chayi, a masiku man’wani hi tsandzeka ni ku etlela, hi tshama ni ndlala.
6 Hi hanya wutomi go hlazveka, hi hanya hi wutivi ga lisine; hi na ni lihlazva-mbilu, hi vanhu va va nene, hi rangelwa hi moya wo basa wutomini ga hina, a lirandzo la hina a hi la ku fayelisela.
7 Hi wulawula lisine, hi tsumba ntamu wa Nungungulu, hi khoma matlhari ya kululama hi canja ga cinene* ni canja ga cibhabha.*
8 Ha dzundziwa ni ku chepetiwa, va hi sola ni ku wulawula zva zvi nene hi hina. A vanhu ve hi vakanganyisi, kanilezvi hina hi wulawula lisine.
9 A vanhu a va hi tivi, kanilezvi Nungungulu wa hi tiva; va hi wonisa ku khwatsi hi file* kuveni ha hanya; hi wonekisa ku khwatsi hi vanhu va tsayisiwako kanilezvi a hi dawi.
10 A vanhu va alakanya ku hi kwatile kuveni hi tshama na hi tsakile, ve hi zvisiwana kanilezvi ha ganyisa votala, va alakanya ku a hi na nchumu kuveni hi na ni zvilo zvontlhe.
11 Hi vhululile a nomu wa hina kasi ku wulawula* na n’wina va le Korinte, niku hi mu vhululele a mbilu ya hina yontlhe.
12 A hi mu alelangi a lirandzo la hina, kanilezvi n’wina ma hi alela a lirandzo la n’wina.
13 Makunu kasi mu hi tlhelisela, n’winawu vhululani timbilu ta n’wina tontlhe — ndzi wulawula na n’wina kota vana va mina.
14 Mu nga bohiwi kanga wun’we ni vangakholwiko. Hakuva kuzwanana muni ku nga kona cikari ka kululama ni kubiha ke? Kutani kuhlengela muni ku nga kona cikari ka kuwonekela ni munyama ke?
15 Kona kuzwanana muni a nga nako Kristu na Bheliyali* ke? Kuhlengela muni a nga nako loyi a kholwako ni loyi a nga kholwiko ke?
16 Kuzwanana muni loku a tempeli ya Nungungulu yi nga nako ni zvifananiso ke? Hakuva hina hi tempeli ya Nungungulu a hanyako, khwatsi hi lezvi Nungungulu a wulileko aku: “Ndzi ta tshama navo, ndzi fambafamba cikari kabye. Ndzi tava Nungungulu wabye, vona va tava vanhu va mina.”
17 “‘Hikwalaho, humani cikari kabye, mu ti hambanisa navo’, ku wula Jehovha, ‘mu nga henyi cilo co nyenyeza’”; “‘ndzi ta mu amukela’”.
18 “‘Ndzi tava papayi wa n’wina, n’wina mu tava vafana ni vanhanyana va mina’, ku wula Jehovha wa Ntamu Wontlhe.”
Mitlhamuselo ya lahasi
^ Kuzvilava kasi kulwa.
^ Kuzvilava kasi ku ti vhikela.
^ Kutani: “hi fanele kufa”.
^ Kutani: “Hi wulawulile zviku dlunya”.
^ Hi ciHebheru a gezu legi gi wula ku: “Ci nga vhuniko nchumu”. Gi wula Sathani.
