2 Va Le Korinte 7:1-16
7 Hikwalaho varandzekako, kota lezvi hi nga ni zvitsumbiso lezvi, a hi ti hlazveni ka zvontlhe zvi nyenyezisako a nyama ni moya, hi basa kala hi mbhelela, kota vanhu va chavako Nungungulu.
2 Hi vhululeleni wutshamu timbilwini ta n’wina. A hi gohelangi munhu, a hi kalavelangi munhu, ne a hi xololangi munhu.
3 A ndzi wuli lezvo kasi ku mu kona. Hakuva ndzi sina ndzi wulile lezvaku mu lomu timbilwini ta hina, kani hafa kani ha hanya.
4 Ndzi wulawula mahlweni ka n’wina hi kutiya ka hombe. Ndza ti dzundza nguvhu hi n’wina. Ndzi chavelelwe nguvhu; ndzi tele hi kutsaka kukaratekeni ka hina kontlhe.
5 Kunene, a cikhati leci hi nga chikela Makedhoniya, a nyama ya hina a yi rulangi; hi no simama ku xaniseka hi tindlela tontlhe — ku wa hi ni kulwa hi lahandle, ni kuchava hi lomu ndzeni.
6 Kanilezvi Nungungulu loyi a chavelelako lava va tshovekileko timbilu, i no hi chavelela hi kuta ka Titusi;
7 a hi chavelelwangi hi kuta kakwe basi, kanilezvi i hi chavelele kambe hi kuchavelela loku a ku kumileko ka n’wina, hakuva i no hi byela lezvaku ma zvi xuva nguvhu ku ndzi wona, a hi byela kambe hi kurila ka n’wina ni ku ndzi xanisekela ka n’wina ka hombe; hikwalaho, ndzi no tsaka nguvhu.
8 Hakuva hambu loku ndzi mu khunguvanyisile hi papilo ga mina, a ndzi ti layi. Hambu loku ndzi ti layile kusanguleni (hi ku wona lezvaku a papilo ga mina gi mu khunguvanyisile, hambu lezvi gi nga mu khunguvanyisa zva cikhatana),
9 zvezvi ndza tsaka. Hambulezvo a ndzi tsaki hi lezvi mu nga khunguvanyeka kanilezvi ndzi tsaka hi lezvi a kukhunguvanyeka ka n’wina ku nga mu maha mu ti sola. Hakuva mu khunguvanyekile hi ndlela yi tsakisako Nungungulu, hikwalaho a mu lahlekelwangi hi nchumu hi kota ya hina.
10 Hakuva a kukhunguvanyeka loku ku tsakisako Nungungulu ku pswala a kutisola loku a munhu a nga ti layiko hi kona, hakuva ku yisa kuhanyisweni; kanilezvi a kukhunguvanyeka ka tiko ku pswala kufa.
11 Zva dlunyateka lezvaku mu khunguvanyekile hi ndlela yi tsakisako Nungungulu. Hikwalaho mu ti karatile mu maha lezvi zvi nga zvi nene. Mu ti basisile, mu ti laya ka zvigoho lezvi mu zvi mahileko, mu chava Nungungulu, mu ti sola, mu tirela Nungungulu hi mbilu yontlhe, mu tlhela mu lulamisa zvigoho zva n’wina. Mu mahile zvontlhe hi nayo wa kona kasi ku lulamisa cikarato leci.
12 Hambu lezvi ndzi nga mu tsalela, a ndzi mahangi lezvo hi kota ya loyi a nga goha, ne hambu hi kota ya loyi a nga gohelwa. Kanilezvi ndzi mu tsalele kasi mu kombisa mahlweni ka Nungungulu lezvaku ma hi ingisa.
13 Lezvo hi zvona zvi nga hi chavelela.
Ahandle ka kuchavelelwa loko, hi no tsaka nguvhu hi kota ya kutsaka ka Titusi, hakuva n’wina n’wentlhe mu tangalisile a moya wakwe.
14 Hakuva hambu loku ndzi ti dzundzile mahlweni kakwe ha n’wina, a ndzi wisiwangi tingana. A ku fana ni lezvi a zvilo zvontlhe hi mu byelileko zvi nga lisine, lezvi hi nga ti dzundza hi zvona mahlweni ka Titusi zvonawu lisine.
15 Ahandle ka lezvo, a lirandzo lakwe ka n’wina la kula nguvhu, loku a alakanya a kuingisa ka n’wina n’wentlhe, ni lezvi mu nga mu amukelisa zvona hi cichavo ni kururumela.
16 Ndza tsaka hakuva ndza mu tsumba zvilweni zvontlhe.
