2 Va Le Korinte 8:1-24
8 Makunu vamakabye, lezvi hi lava lezvaku mu tiva a tipswalo leti Nungungulu a ti kombisileko ka mabandla ya le Makedhoniya.
2 Hambu lezvi va nga hi ciringweni ca kuxaniseka ka hombe va wa tsaka nguvhu, ni lomu wusiwaneni ga hombe va no komba lezvaku va ganyile hi ka moya hi ku nyika na va tsakile.
3 Ndza va kustumunyela lezvaku va nyikele lezvi va nga hi nazvo, ina, va nyikele ni zvo hundza lezvi va nga hi nazvo.
4 Hi kuzvirandza kabye, va no hi khongotela nguvhu kasi vonawu vava ni thomo ga ku humesa hlengo kasi va hlengela ntirweni wa ku vhunetela vobasa.
5 Va mahile zvo hundza lezvi hi nga zvi alakanya, hakuva a kuranga va no ti nyikela ka Hosi ni ka hinawu hi kuya hi kurandza ka Nungungulu.
6 Hikwalaho hi no kombela Titusi lezvaku a mbhetisa a ntiro lowu cikari ka n’wina, kota lezvi ku nga yena a nga wu sangula.
7 Hambulezvo, kota lezvi mu ganyileko zvilweni zvontlhe: hi kukholwa, ni kuwulawula, ni kutiva, ni kutitsitsirita kontlhe, ni ka lirandzo leli hi nga nalo hi n’wina, n’winawu hanani ka hlengo lowu.
8 A ndzi mu byeli timhaka leti hi ku fela ku mu kurumeta, kanilezvi ndzi wulela ku mu alakanyisa hi kutikarata ka van’wani, ni ku ringa a lirandzo la n’wina.
9 Hakuva ma ti tiva a tipswalo ta Hosi ya hina Jesu Kristu, lezvaku hambu lezvi a nga ganyile, i no maha cisiwana hi kota ya n’wina, kasi n’wina mu ganya hi wusiwana gakwe.
10 Hi mawonela ya mina, ndzi alakanya ku a ntiro lowu wu ta mu vhuna, hakuva ka hundza lembe na mu wu sangulile ni ku komba lezvaku ma xuva ku wu maha.
11 Hikwalaho mbhetisani lezvi mu nga zvi sangula, kasi lezvi mu longileko ku maha zvi chikela magumo hi kuya hi lezvi mu nga nazvo.
12 Hakuva loku a munhu a longile ku nyika, a cinyikiwo leco ca amukeleka nguvhunguvhu loku a nyikela lezvi a nga nazvo, na ku nga hi lezvi a nga hava.
13 Hakuva a ndzi lavi ku vevukisela van’wani, ndzi bindzisela n’wina;
14 kanilezvi ndzi mahela ku kuva ni kuringana, kasi lezvi zvi mu taleleko ka cikhati leci zvi fela ku va vhuna laha va kiyelelwako kona, ni lezvi vonawu zvi va taleleko zvi fela ku mu vhuna laha mu kiyelelwako kona, kasi kuva ni kuringana;
15 khwatsi hi lezvi ku tsalilweko ku: “Loyi a nga hi ni zvotala a nga vangi ni zvotala nguvhu, ni loyi a nga hi ni zva zvitsongwani a nga vangi ni zva zvitsongwani nguvhu.”
16 I wa bongiwe Nungungulu loyi a nyikileko Titusi a mbilu ya ku mu xanisekela yo fana ni leyi hinawu hi nga nayo hi n’wina,
17 hakuva laha hi nga mu kombela, i no vhumela, niku kota lezvi a zvi xuvako nguvhu, wata ka n’wina hi kurandza kakwe.
18 Ha mu rumela zvin’we ni makabye mun’wani, loyi a dzundziwako mabandleni wontlhe hi kota ya ntiro wakwe wa ku chumayela mahungu ya ma nene.
19 Ahandle ka lezvo, i yimisilwe hi mabandla lezvaku a fambafamba na hina hi hlayisa a hlengo lowu wu dhumisako Hosi ni ku komba lezvaku hi longile a ku vhunetela.
20 Hikwalaho, hi maha zvontlhe kasi hi nga soliwi hi munhu ka hlengo lowu wa hombe hi wu hlayisako.
21 Hakuva ‘hi maha zvontlhe hi kutsumbeka, na ku nga hi mahlweni ka Jehovha yece, kanilezvi ni mahlweni ka vanhu kambe’.
22 Hi va rumela ni mun’wani makabye kambe, loyi hi mu hlolileko hi wona lezvaku munhu wa zvigingi timhakeni to tala, kanilezvi ka cikhati leci i na ni zvigingi nguvhu hi kota ya lezvi a nga ni kutsumba ka hombe ha n’wina.
23 Loku ku hi ni kukanakana ko kari xungetano hi Titusi, ndza mu tlhatlha ndziku: Munghana wa mina ni citiri-kulori kasi ku vhuna n’wina. Loku a hi kona a kanakanelako vamakabye va hina, ndza mu tlhatlha ndziku: Vapostoli va mabandla ni wudzundzo ga Kristu.
24 Hikwalaho, kombani zviku dlunya lezvaku ma va randza, mu tlhela mu komba mabandla lezvi zvi hi mahako hi ti dzundza ha n’wina.
