2 Va Le Korinte 9:1-15
9 Xungetano hi ntiro wa ku vhunetela vobasa, a zvizi zvi lava ku ndzi mu tsalela,
2 hakuva ndza ku tiva a kuxuva ka n’wina loku ndzi ti dzundzako hi kona ka va le Makedhoniya, ndziku: Makunu ka hundza lembe a vamakabye va le Akaya na va longile, ni lezvaku a kutitsitsirita ka n’wina ku kucile votala.
3 Kanilezvi ndza rumela vamakabye kasi a kutidzundza ka hina ha n’wina mhakeni leyi ku ngavi ka mahala, ni lezvaku mu longa, kota lezvi ndzi va byelileko lezvaku mu sina mu longile.
4 Hakuva loku ndzita ni va le Makedhoniya hi ta mu kuma na mu nga longangi, hina na n’wina hi tawa tingana hi lezvi hi wulileko lezvaku ha mu tsumba.
5 Hikwalaho, ndzi zvi wonile zvi hi chukwana a ku kuca a vamakabye lezvaku va ranga vata ka n’wina na ka ha hi ni cikhati va ta longisela a cinyikiwo ca n’wina leci mu ci tsumbisileko, kasi ci tshama na ci longiselwe kota cinyikiwo mu ci nyikelako hi kuzvirandza, na mu nga kurumetiwi.
6 Kanilezvi xungetano hi lezvi ndzi nga wula, ndzi ngalo: Loyi a byalako kutsongwani i ta tshovela zvi tsongwani, ni loyi a byalako nguvhu i ta tshovela zvotala.
7 A mun’we ni mun’wani i wa nyike lezvi a xuvako mbilwini yakwe, na a nga nguranguri* kutani ku kurumetiwa, hakuva Nungungulu i randza loyi a nyikako na a tsakile.
8 Ahandle ka lezvo, Nungungulu wa zvi kota ku mu andzisela tipswalo takwe tontlhe kasi mu nga tshuki mu kiyelelwa hi nchumu, mu tlhela muva ni zvontlhe zvi lavekako kasi ku maha mitiro yontlhe yo saseka.
9 (Kota lezvi ku tsalilweko ku: “I avela na a nga feleli; a nyika zvisiwana. A kululama kakwe ku simama kala kupindzuka.”
10 Loyi a nyikako timbewu ka mubyali na a nga feleli, ni zvakuga ka mugi, i ta mu nyika a tlhela a andzisa a mbewu leyi mu to byala, a andzisa ni pfuno wa n’wina wa kululama.)
11 Zvilweni zvontlhe ma ganyiswa kasi mu hana hi tindlela tontlhe. A tshamela legi gi maha lezvaku a vanhu va bonga Nungungulu ha hina;
12 hakuva a ntiro lowu wa ku vhunetela vobasa a hi wa ku va vhuna ka lezvi va zvi vhumalako basi, kanilezvi wu tlhela wu andzisa a magezu ya ku bonga Nungungulu.
13 Va dhumisa Nungungulu hakuva a ntiro lowu wa ku va vhunetela wu komba lezvaku ma ingisa a mahungu ya ma nene lawa mu kanelako kubaseni xungetano hi Kristu, ni lezvaku ma hana ka hlengo lowu mu mahelako vobasa ni vanhu vontlhe.
14 A cikhati leci va mu kombelelako, va komba lezvaku va mu randza hi kota ya tipswalo ta hombe ta Nungungulu leti ti nga ka n’wina.
15 I wa bongiwe Nungungulu hi kota ya cinyikiwo cakwe ci nga wulekiko.
Mitlhamuselo ya lahasi
^ Kutani: “na a nga zvi mahi hi ku i ta kuyini”.
