2 Va Le Tesalonika 1:1-12
1 Mina Pawule, ndzi nga na Silvhanusi* na Timote, ndza tsalela a bandla ga va le Tesalonika legi gi nga ka Nungungulu a Papayi wa hina ni ka Hosi Jesu Kristu, ndziku:
2 A tipswalo ni kurula zvi tako hi ka Nungungulu tlhelo Papayi ni ka Hosi Jesu Kristu, a zvive na n’wina.
3 Contlhe cikhati ha kurumeteka ku bonga Nungungulu hi kota ya n’wina vamakabye. Kunene zva fanela hakuva a kukholwa ka n’wina ka kula nguvhu, ni kurandzana ka n’wina n’wentlhe ka endzeleka.
4 Hi kota ya lezvo, ha tizwa matshandza ha n’wina mabandleni ya Nungungulu hi kota ya kutimisela ni kukholwa ka n’wina kuxanisweni kontlhe ni mihlomulweni leyi yi mu welako.*
5 Zvontlhe lezvi zvi komba lezvaku a kulamula ka Nungungulu ku lulamile, kasi mu fela ku wuliwa lezvaku ma ringanelwa hi Mufumo wa Nungungulu, lowu mu xanisekako hi kota ya wona.
6 Hakuva zvi lulamile mahlweni ka Nungungulu a ku va tlhelisela hlomulo lava va mu xanisako.
7 Kanilezvi n’wina lava mu xanisekako, i ta mu nyika kuhumula zvin’we na hina cikhatini leci Hosi Jesu a to wonekeliswa hi le tilweni ni tingilozi takwe ta ntamu
8 ndzilweni wu vhurako, na a neha tsayiselelo ka lava va nga mu tiviko Nungungulu ni lava va nga ingisiko a mahungu ya ma nene ya Hosi ya hina Jesu.
9 A vanhu lavo va ta tsayisiwa hi ku lovisiwa kala kupindzuka, va fuvisiwa mahlweni ka Hosi va nga ha tshuki va wona a ntamu wakwe wo ngangamela.
10 Lezvo zvi ta maheka cikhatini leci a tota a ta dhumisiwa ni vobasa vakwe, ni kuva wo hlamalisa sikwini lego ka vontlhe lava va kholwako, hakuva mu kholwile a wukustumunyu legi hi mu nyikileko.
11 Hi cigelo leco, contlhe cikhati ha mu khongelela ka Nungungulu wa hina lezvaku a mu wona na mu ringanelwa hi kuva a mu vitana, ni lezvaku a maha mitiro yontlhe yo saseka a yi xuvako ku maha hi ntamu wakwe ni lezvaku a katekisa a mitiro yontlhe ya kukholwa ka n’wina
12 kasi a vito ga Hosi ya hina Jesu gi fela ku dhumisiwa ka n’wina, n’winawu mu dhumisiwa ka yena, hi kota ya tipswalo ta Nungungulu wa hina ni ta Hosi Jesu Kristu.
