2 Va Le Tesalonika 2:1-17
2 Makunu vamakabye, hi ku wulawula hi cikhati leci a Hosi ya hina Jesu Kristu a tova kona cikari ka hina, ni kuva hi tlhanganisiwa zvin’we naye, ha mu kombela
2 lezvaku mu nga hatlisi ku jujeka kupima hambu ku chava hi kuzwa mahungu ya ku khwatsi mata hi ka Nungungulu,* kani ya ku byeliwa hi nomu, kutani hi papilo go khwatsi gita hi ka hina, giku a siku ga Jehovha gi chikele.
3 Mu nga tsiki munhu a mu hambukisa,* hakuva na gi nga se chikela a siku lego, ku ta ranga hi ku humelela kudhuka,* ku tlhela ku wonekeliswa a citlula-milayo, ci nga n’wana wa kulova.
4 A citlula-milayo leci, ci ti maha nala ni ku ti tlakusa hehla ka zvontlhe zvi vitaniwako ku vanungungulu kutani lezvi zvi khozelwako, laha ka kuza ci tshama tempeleni ya Nungungulu, ci ti wula ku i nungungulu.
5 A mu zvi alakanyi lezvaku a cikhati leci ndzi nga ha hi na n’wina ndzi wa tala ku mu byela a timhaka leti ke?
6 Makunu n’wina ma ci tiva leci ci ci vhalelako; hikwalaho ci ta wonekeliswa loku a cikhati ca cona ci chikela.
7 Hakuva a mitiro ya citlula-milayo leci, leyi ya ha hiko cihundla, yi sina yi sangulile; kanilezvi yi ta simama yiva cihundla kala ku susiwa loyi a yi vhalelako ka cikhati leci.
8 Andzhako ka lezvo, a citlula-milayo ci ta wonekeliswa, leci Hosi Jesu a to ci daya hi moya wa nomu wakwe, a ci lovisa hi kutiwonekelisa kakwe cikhatini leci a tova cikari ka hina.
9 Kanilezvi a citlula-milayo ci kona hi kota ya kutira ka Sathani, na ci hi ni mitiro yontlhe ya ntamu, ni zviwoniso ni zvihlamaliso zva mawunwa,
10 ni kukanganyisa kontlhe ka hava kasi ku kalavela lava va lovako, kota tsayiselelo wa lezvi va nga ala ku randza lisine leli li nga wa ta va maha va ponisiwa.
11 Hikwalaho Nungungulu i va tsika va kanganyisiwa hi tigondzo ta mawunwa, va kholwa mawunwa,
12 kasi vontlhe va fela ku lamuliwa hi kota ya lezvi va nga kala ku kholwa lisine, va tsakisiwa hi kungalulami.
13 Kanilezvi contlhe cikhati ha kurumeteka ku bonga Nungungulu hi kota ya n’wina vamakabye mu randziwako hi Jehovha, hakuva kusukela kusanguleni Nungungulu i no mu hlawula kasi mu ponisiwa, hi ku mu basisa hi moya wakwe ni lezvi mu kholwako lisine.
14 Hi zvalezvo a nga mu vitanela zvona hi mahungu ya ma nene lawa hi ma kanelako, kasi mu ta kuma kungangamela ka Hosi ya hina Jesu Kristu.
15 Hikwalaho vamakabye, tiyani mu ku nde, mu namarela ka tigondzo leti mu gondzisilweko, kani mu gondzisilwe hi nomu kutani hi papilo hi nga mu rumelela.
16 Ahandle ka lezvo, Nungungulu a Papayi wa hina wa hi randza, niku hi kota ya tipswalo takwe, wa hi nyika kuchavelelwa ka pindzukelwa ni kutsumba ka ku nene. Hi khongelela lezvaku Nungungulu ni Hosi ya hina Jesu Kristu
17 va chavelela a timbilu ta n’wina ni ku mu tiyisa mitirweni yontlhe ya yi nene ni kuwulawuleni kontlhe ko saseka.
Mitlhamuselo ya lahasi
^ Kutani: “mahungu ya moya”. Wona laha ka ku: “Moya” ka Tlhamuselo wa magezu ya Bhibhiliya.
^ Kutani: “xengetela”.
^ A kudhuka zvi wula a ku fularela ni ku vhukela a wukhozeli ga lisine.
