2 Va Le Tesalonika 3:1-18
3 Hikwalaho, vamakabye, simamani ku hi khongelela, kasi a mhaka ya Jehovha yi simama ku andza hi kuhatlisa yi tlhela yi dhumisiwa, kota lezvi zvi mahekako cikari ka n’wina,
2 ni lezvaku hi tlhatlhiswa ka vanhu va xapi ni vo biha, hakuva a hi vanhu vontlhe va nga ni kukholwa.
3 Kanilezvi a Hosi yi tsumbekile, yi ta mu tiyisa ni ku mu vhikela ka loyi wa kubiha.
4 Ahandle ka lezvo, ha tsumba Hosini lezvaku n’wina ma ingisa zvileletelo zva hina niku mu ta simama ku zvi ingisa.
5 A Hosi yi wa simame ku rangela timbilu ta n’wina, kasi mu randza Nungungulu mu tlhela mu timisela ha Kristu.
6 Makunu ha mu nyika zvileletelo, vamakabye, vitweni ga Hosi ya hina Jesu Kristu, lezvaku mu tsawukana ni vamakabye vontlhe lava va fambako hi vhilinganya, na va nga landzeli a tigondzo leti hi mu* gondzisileko.
7 N’wina ma zvi tiva lezvi mu faneleko ku hi pimanyisisa zvona, hakuva hina a hi hanyangi hi vhilinganya cikari ka n’wina,
8 ne a hi gangi ca munhu mahala,* kanilezvi hi no tira yi nga chayi wusiku ni mumu kasi hi nga bindziseli ne mun’we wa n’wina.
9 A hi ku khwatsi zvi wo kala zvi nga hi faneli a ku nyikiwa zvilo hi n’wina, kanilezvi hi wa lava kuva cikombiso ka n’wina kasi mu hi pimanyisa.
10 A cikhati leci hi nga hi na n’wina, hi wa tala ku mu laya hiku ngalo: “Loku a munhu a ala ku tira, a nga faneli kuga.”
11 Hakuva hizwa lezvaku a vokari cikari ka n’wina va famba hi vhilinganya, va ala ku tira kanilezvi va nghenela zvilo zvo kala zvi nga va lumbi.
12 Makunu ha laya a vanhu lavo ni ku va nyika wusungukati vitweni ga Hosi Jesu Kristu lezvaku va fanele ku tira hi kurula, vaga zvakuga zva nyuko wabye.
13 Makunu n’wina vamakabye, mu nga karali ku maha zva zvi nene.
14 Kanilezvi loku a wokari a nga ingisi a magezu ya hina ma nga ka papilo legi, ti woneleni ka yena, mu tsika kuva vanghana vakwe, kasi awa tingana.
15 Hambulezvo mu nga mu mahisi ku khwatsi i nala, kanilezvi simamani ku mu nyika wusungukati kota makabye.
16 Makunu hi khongelela lezvaku a Hosi ya kurula yi mu nyika kurula contlhe cikhati zvilweni zvontlhe. A Hosi a yive zvin’we na n’wina n’wentlhe.
17 Hi lawa a marungula ya mina Pawule, lawa ndzi ma tsalileko hi canja ga mina wutsumbu. A mapapilo ya mina wontlhe ndzi ma tsalisa lezvi kasi mu zvi tiva lezvaku hi mina ndzi nga tsala.
18 A tipswalo ta Hosi ya hina Jesu Kristu a tive na n’wina n’wentlhe.
