3 Johani 1:1-14
1 Mina wanuna a kulileko,* ndza tsalela Gayusi, a makabye wa mina a randzekako, loyi ndzi mu randzako nguvhu.
2 Makabye wa mina a randzekako, ndzi khongelela lezvaku a zvilo zvontlhe zvi ku fambela khwatsi, u hanya khwatsi, kota lezvi zvi ku fambelako khwatsi.
3 Hakuva ndzi tsakile nguvhu a cikhati leci a vamakabye va ngata va ta ndzi hlawutela lezvaku u khomile zvi tiya lisineni, niku ndza tsaka hi lezvi wa ha simamako ku famba lisineni.
4 A ndzi na litsako la hombe* lo hundza leli: La kuzwa lezvaku a vana va mina va ha famba lisineni.
5 Makabye wa mina a randzekako, wa tsumbeka ka lezvi u mahelako vamakabye, hambu lezvi u kalako u nga va tivi.
6 Vona va kustumunya hi lirandzo la wena lomu bandleni. A cikhati leci va to suka, va vhune ka zvontlhe va zvi lavako hi ndlela yi to tsakisa Nungungulu.
7 Hakuva va fambile hi kota ya vito gakwe, na va nga teki nchumu ka vamatiko.
8 Hikwalaho hi fanele ku va amukela khwatsi a vanhu vo kota lavo, kasi hiva vatiri-kulori lisineni.
9 Ndzi tsalele bandla a timhaka to kari kanilezvi Dhiyotrefesi, loyi a randzako ku ti maha wo sangula cikari kabye, a nga na cichavo hi timhaka leti hi wulako.
10 Hikwalaho, loku ndzita, ndzi ta mu alakanyisa a mitiro leyi a yi mahako ya ku hangalasa mawunwa hi hina.* Ahandle ka lezvo, a nga vhumeli ku amukela vamakabye hi cichavo; i betela ni lava va zvi lavako ku va amukela a tlhela a va hlongola lomu bandleni.
11 Makabye wa mina a randzekako, u nga pimanyisi lezvi zvakubiha kanilezvi pimanyisa lezvi zva zvi nene. Loyi a mahako zva zvi nene ita hi ka Nungungulu. Loyi a mahako zvakubiha a nga mu wonangi Nungungulu.
12 Dhemetriyusi wa dzundziwa hi vona vontlhe; a lisine lonawu la mu kustumunyela. Kunene hinawu ha nyika wukustumunyu ha yena, niku ma zvi tiva lezvaku a wukustumunyu legi hi gi nyikako lisine.
13 Ndzi wa hi ni timhaka to tala ta ku ku tsalela, kanilezvi a ndzi lavi ku ya hi ku tsala hi papilo.
14 Kanilezvi ndzi alakanya ku ndzi ta ku endzela zvalezvanyana kasi hi fela ku wulawula nghohe ni nghohe.
A kurula a kuve na wena.
A vanghana va hina seno va ku rungula. Rungula a vanghana va hina seyo hi mavito.
Mitlhamuselo ya lahasi
^ Kutani: “Mina dhota”.
^ Zvi nga ha wula ku: “A ndzi na cigelo ca hombe co bonga”.
^ Hi kukongoma: “ya ku hi hleva hi timhaka ta kubiha”.