Filemoni 1:1-25
1 Mina Pawule, ndzi nga cibochwa hi kota ya Kristu Jesu, ndzi nga na Timote a makabye wa hina, ndza ku tsalela wena Filemoni, a mutiri-kulori wo randzeka,
2 na Apfiya a makabye wa hina, na Arkipusi a musochwa-kulori, ni bandla legi gi tlhanganako laha mutini wa wena, ndziku:
3 A tipswalo ni kurula zvi tako hi ka Nungungulu a Papayi wa hina, ni ka Hosi Jesu Kristu, a zvive na n’wina.
4 Ndza bonga Nungungulu wa mina contlhe cikhati ndzi ku kumbukako mikhongelweni ya mina,
5 hakuva ndzi tshamela kuzwa mahungu ya kukholwa ka wena ni lirandzo leli u nga nalo hi Hosi Jesu ni vobasa vontlhe.
6 Ndzi khongelela lezvaku a kukholwa loku wena na hina hi nga nako ku ku kuca a ku tiva zvilo zvontlhe zvo saseka lezvi hi nga nazvo hi kota ya Kristu.
7 Hakuva ndzi tsakile nguvhu ndzi tlhela ndzi chavelelwa laha ndzi ngazwa hi lirandzo la wena, hakuva a timbilu ta vobasa ti tangalisilwe hi wena, makabye.
8 Hi cigelo leco, hambu lezvi ndzi nga ni ntamu wa hombe ka Kristu wa ku ku laya lezvaku u maha lezvi zvi faneleko,
9 ndza ku khongotela hi lirandzo, mina Pawule wa cikhosana, ndzi nga cibochwa ka cikhati leci hi kota ya Kristu Jesu.
10 Ndza ku khongotela hi kota ya n’wana wa mina Onesimusi, loyi ndzi nga maha papayi wakwe na ndzi hi paxweni.*
11 A kale i wa nga vhuni nchumu ka wena, kanilezvi makunu wa vhuna ka wena ni ka mina.
12 Hi yena ndzi mu tlhelisako ka wena; loyi ndzi mu randzako nguvhu.
13 Ndzi wa lava ku tshama naye a fela ku ndzi tirela wutshan’wini ga wena ka cikhati leci ndzi vhalelweko hi kota ya mahungu ya ma nene.
14 Kanilezvi a ndzi lavi ku maha nchumu na u nga ndzi vhumelelangi, kasi a ntiro wa wena wa wu nene wu ngavi wa kukurumetwa, kanilezvi wuva wa kuzvirandza.
15 Kuzvilava hi zvona zvi nga mu maha a tsutsuma hi cikhatana,* kasi loku a wuya ka wena a ta tshamela magumo,
16 na a nga ha hi khumbi basi, kanilezvi na a hi wo hundza lezvo, na a hi makabye wo randzeka nguvhu ka mina, kanilezvi nguvhunguvhu ka wena a nga khumbi ya wena ni makabye wa wena Hosini.
17 Hikwalaho, loku ndzi hi munghana wa wena,* u ta mu amukela hi lirandzo a ku khwatsi hi lezvi u nga wa ta ndzi amukelisa zvona.
18 Ahandle ka lezvo, loku a ku gohele cokari kutani ku ku dhevha nchumu, ndzi ta hakhela mina.
19 Mina Pawule ndza tsala hi mandla ya mina, ndziku: Ndzi ta hakhela. A zvizi zvi lava ku ndzi ku byela lezvaku wa ndzi dhevha hambu a wutomi ga wena.
20 Ina makabye, ndzi size Hosini; tangalisa a mbilu ya mina ka Kristu.
21 Ndza tsumba lezvaku u ta maha lezvi ndzi ku kombelako, hikwalaho ndza ku tsalela na ndzi zvi tiva lezvaku u ta maha zvo hundza ni lezvi ndzi wulako.
22 Ahandle ka lezvo, ndzi longiselele ko tshama kona, hakuva ndza tsumba lezvaku hi kota ya mikhongelo ya n’wina, ndzi ta wuya* ka n’wina.
23 Epafrasi a cibochwa-kulori ka Kristu Jesu, wa ku rungula.
24 Marku, na Aristarkusi, na Dhemasi, na Luka, lava ndzi tirako navo, vonawu va ku rungula.
25 A tipswalo ta Hosi Jesu Kristu a tive zvin’we ni moya lowu mu wu kombisako.
Mitlhamuselo ya lahasi
^ Hi kukongoma: “na ndzi bohilwe”.
^ Hi kukongoma: “hi hora”.
^ Hi kukongoma: “loku u hlengela na mina”.
^ Kutani: “tlhatlhiswa ndzita”.
