Jakobe 1:1-27
1 Mina Jakobe, a nandza ga Nungungulu ni ga Hosi Jesu Kristu, ndza tsalela a 12 wa tixaka leti ti hangalakileko ndziku:
Ndza mu losa!
2 Vamakabye va mina, tsakani nguvhu loku mu welwa hi mindzhingo yo tsalangana,
3 hakuva ma zvi tiva lezvaku a kukholwa ka n’wina ku ringilweko ku pswala kutimisela.
4 Kanilezvi tsikani a kutimisela ku mbhetisa a ntiro wa kona kasi mu mbhelela, mu nga hi na cisolo matlhelweni wontlhe mu tlhela mu nga kiyelelwi hi nchumu.
5 Hikwalaho, loku a hi kona cikari ka n’wina loyi a kalako a nga hi na wutlhari, i wa kombele ka Nungungulu,* i ta nyikiwa hakuva yena i nyika vontlhe na a nga feleli ne ku sola.
6 Kanilezvi i wa kombele hi kukholwa* na a nga kanakani ne ni kutsongwani, hakuva loyi a kanakanako i fana ni vingo* ga bimbi gi kukuletwako hi moya giya seno ni seno.
7 Kunene, a munhu loye a nga faneli ku rindzela ku i ta nyikiwa nchumu hi Jehovha;
8 i na ni timbilu timbiri niku a nga tiyangi tindleleni takwe tontlhe.
9 Kanilezvi, a makabye loyi a nga cisiwana i wa tsake* hi kutlakuswa kakwe,
10 ni loyi wo ganya i wa tsake hi kutsongahatwa kakwe, hakuva i ta nyamalala a ku fana ni citsangi ca lomu masin’wini.
11 Hakuva a ku fana ni lezvi a gambo gi humako gi neha mumu lowu wu womisako sinya, a zvitsangi zva yona zviwa lahasi, ni kusaseka ka yona ku nyamalala, a munhu wo ganya yenawu i ta nyamalala mitirweni yakwe yontlhe.
12 I katekile a munhu loyi a simamako ku timisela mindzhingo, hakuva loku a yi hlula i ta kuma a cidlodlo* ca wutomi, leci Jehovha a tsumbisako lava va simamako ku mu randza.
13 Loku munhu a ringiwa, a nga faneli ku wula ku: “Ndzi ringiwa hi Nungungulu.” Hakuva Nungungulu a nga ringiwi hi zvilo zvo biha, ne a nga ringi munhu.
14 Kanilezvi a munhu ni munhu i ringiwa hi ku kokiwa ni ku xengiwa* hi kunavela kakwe wutsumbu.
15 Makunu loku a kunavela ku xurile nyimba ku pswala ciwonho, hi kugumesa a ciwonho ci pswala kufa.
16 Vamakabye va mina va randzekako, mu nga ti kalaveli.
17 A zvinyikiwo zvontlhe zvo saseka ni zvinyikiwo zvontlhe zvo mbhelela zvita hi le hehla, zvi relela hi ka Papayi wa kuwonekela ka le tilweni, loyi a nga hundzukiko kutani ku cica a ku fana ni ndzhuti wu cicacicako.
18 Hi kota ya kurandza kakwe, i no hi tisa wutomini hi mhaka ya lisine kasi hiva mihandzu yo sangula ya zvivangwa zvakwe.
19 Vamakabye va mina va randzekako, tivani lezvi: A mun’we ni mun’wani i fanele ku hatlisa kuzwa, a nonoka ku wulawula, a tlhela a nonoka ku zangara,
20 hakuva a zanga ya munhu a yi mahi a kululama ka Nungungulu.
21 Hikwalaho, tsikani a kunyenyeza kontlhe ni kubiha kontlhe, mu vhumela hi kurula a mhaka leyi Nungungulu a yi byalako ka n’wina, leyi yi zvi kotako ku mu ponisa.
22 Kanilezvi mahani vamahi va mhaka, mu ngavi vazwi basi, mu ti kanganyisa hi maalakanyo ya hava.
23 Hakuva loku a munhu azwa mhaka, kanilezvi a nga yi mahi, i fana ni munhu loyi a cuwukako a nghohe yakwe laha ka woni.*
24 Hakuva wa ti cuwuka, kanilezvi neti a suka i rivala lezvaku munhu wo tshamisa kuyini.
25 Kanilezvi loyi a hlolako nayo wu mbheleleko, lowu wa kutlhatlheka, a simama ka wona, i tava mumahi wa ntiro na ku nga hi muzwi a rivalako; i ta tsaka ka lezvi a mahako.
26 Loku a wokari aku wa khozela Nungungulu* kanilezvi na a nga khomi lirimi lakwe, wa kanganyisa a mbilu yakwe, ni kukhozela kakwe a ku vhuni nchumu.
27 A kukhozela loku ku* basileko ni ku nga solekiko mahlweni ka Nungungulu tlhelo Papayi wa hina, hi loku: Ku vhuna a zvisiwana ni vavasati vo felwa hi vanuna kuxanisekeni kabye, ni ku tshama hi nga hi na noda ya zva tiko.
Mitlhamuselo ya lahasi
^ Hi kukongoma: “i wa kombele ka Nungungulu a nga tsiki”.
^ Hi kukongoma: “i wa kombele hi kukholwa a nga tsiki”.
^ Kutani: “byandlati; vimbi”.
^ Hi kukongoma: “i wa ti dzundze”.
^ Kutani: “korowa”.
^ Kutani: “a ku khwatsi o phasiwa hi cimemba”.
^ Kutani: “cibuko”.
^ Kutani: “aku mukhongeli”.
^ Kutani: “A wukhongeli legi gi”.
