Jakobe 2:1-26
2 Vamakabye va mina, lezvi mu kholwako ka Hosi ya hina yo ngangamela, Jesu Kristu, hikuyini mu nga ni cihlawulela?
2 Hakuva loku kuta munhu mutlhanganweni wa n’wina na a bohile tiphera ta ouro lomu mandleni yakwe ni tinguwo to dhura, ku tlhela kuta cisiwana ci bohileko tinguwo ta chaka,
3 mu khatalela loyi a bohileko tinguwo to dhura muku: “Wena tshama hi laha ka ku nene”, ka loyi wa cisiwana muku: “Wena yima laha”, kutani ku: “Tshama lahasi ka cikhegetelo ca mikondzo ya mina”.
4 Loku mu maha lezvo, mu na ni cihlawulela cikari ka n’wina, niku mu lamula hi ndlela yo biha.
5 Vamakabye va mina va randzekako, ingisani. Kasi Nungungulu a nga hlawulangi vanhu lava va nga zvisiwana tikweni legi lezvaku vava vo ganya kukholweni ni vagi va tshomba ya Mufumo lowu a wu tsumbisileko ka lava va mu randzako ke?
6 Kanilezvi n’wina ma chepeta zvisiwana. Kasi a hi valava vo ganya va mu xanisako ni ku mu kokovisa va mu yisa titribhunali ke?
7 Kasi a hi vona va rukatelako a vito gi nene legi mu vitaniwako hi gona ke?
8 Loku ku hi ku ma hlayisa a nayo wa wuhosi lowu wu nga lomu Mitsalweni, waku: “Randza muakelani wa wena a ku fana ni lezvi u ti randzisako zvona”, ma maha khwatsi.
9 Kanilezvi loku ma ha simama ni cihlawulela, ma wonha, niku ma koniwa hi nayo lezvaku mu vahambunyeti va nayo.
10 Hakuva loku a munhu a ingisa Nayo, kanilezvi a hambunyeta a mhaka yin’we ya Nayo, i na ni nandzu ka Nayo wontlhe.
11 Hakuva loyi a ngaku: “U nga mahi wubhayi”, i tlhelile aku: “U nga dayi.” Makunu loku u nga mahi wubhayi, kanilezvi u daya, u hambunyetile a nayo.
12 Simamani ku wulawula ni ku hanya kota vanhu va to lamuliwa hi nayo wa lava vo tlhatlheka.*
13 Hakuva loyi a nga mahiko wuxinji, a nga ta mahelwa wuxinji kulamulweni. A wuxinji ga hlula kulamulweni.
14 Vamakabye va mina, zvi vhuna yini loku munhu aku i na ni kukholwa, kanilezvi na a nga hi na mitiro ke? A kukholwa loko ku nga ta mu ponisa.
15 Loku a makabye wo kari a nga hi na co boha,* ne a nga hi na zvakuga zvo enela siku,
16 hambulezvo a mun’we wa n’wina aku kakwe: “Famba hi kurula, u kufumela u tlhela u xura”, kanilezvi a nga mu nyiki lezvi zvi lavekako, zvi vhuna yini ke?
17 Hizvalezvo, a kukholwa ku nga hiko na mitiro ku file.
18 Hambulezvo a wokari i taku: “Wena u na ni kukholwa, mina ndzi na ni mitiro. Makunu ndzi kombe a kukholwa ka wena ko kala mitiro, mina ndzi ta ku komba a kukholwa ka mina hi mitiro.”
19 Wa kholwa lezvaku ku na ni Nungungulu mun’we, a hi zvona ke? U maha khwatsi. A madhimoni wonawu ma kholwa ma tlhela ma rurumela.
20 Cipumbu ndziwena, a wu zvi tivi lezvaku a kukholwa loku ku nga hiko na mitiro a ku vhuni nchumu ke?
21 Kasi a kokwani wa hina Abrahama a nga wuliwangi ku munhu wo lulama hi kota ya mitiro hi lezvi a nga nyikela Isaka, a n’wana wakwe, laha alatini ke?
22 Wona lezvaku a kukholwa kakwe ku tirile zvin’we ni mitiro yakwe; a kukholwa kakwe ku no mbheleliswa hi mitiro.
23 Makunu ku no tatiseka a mutsalo lowu wu nge ngalo: “Abrahama i no kholwa ka Jehovha, hikwalaho i no woniwa kota munhu wo lulama”, a vitaniwa ku munghana wa Jehovha.
24 Wonani lezvaku a munhu i ta wuliwa wo lulama hi kota ya mitiro na ku nga hi hi kota ya kukholwa koce.
25 Na Rahabi loyi wa cibhayi, yenawu i no wuliwa ku munhu wo lulama hi kota ya mitiro, hi lezvi a nga amukela khwatsi a zvipiyawu,* a gumesa a zvi tlhelisa hi yin’wani ndlela.
26 Hikwalaho, kota lezvi a miri lowu wu nga hava moya* wu fileko, ni kukholwa loku ku nga hiko na mitiro konawu ku file.
Mitlhamuselo ya lahasi
^ Hi kukongoma: “nayo wa kutlhatlheka”.
^ Hi kukongoma: “a hi cimbyiri”.
^ Kutani: “tihloli”.
^ Wona Tlhamuselo wa magezu ya Bhibhiliya.
