Jakobe 3:1-18
3 Vamakabye va mina, a hi votala cikari ka n’wina va faneleko kuva vagondzisi, kota lezvi hi to amukela a kulamulwa ka hombe.
2 Hakuva hontlheni ha phazama makhati yo tala. Loku a munhu a nga phazami kuwulawuleni, yaloye munhu a mbheleleko, loyi a zvi kotako ku fumela a miri wakwe wontlhe hi matomu.
3 Loku hi boha matomu minon’wini ya mahaxi* kasi ma hi ingisa, hi fambisa kambe ni mimiri ya wona yontlhe.
4 Cuwukani ni zvitimela:* Hambu lezvi zvi nga zva hombe nguvhu ni lezvi zvi kukuletwako hi mimoya ya hombe, zvi fambisiwa hi lemi* ya yitsongwani nguvhu zviya ni kwihi lomu a marinyero a ku lavako.
5 A lirimi lonawu, ciro ca citsongwani ca miri, kanilezvi la ti kulisa hi zvilo zva hombe. A mu zvi tivi lezvaku a ndzilo wutsongwani wa hisa a khwati ga hombe ke?
6 A lirimi lonawu i ndzilo. Cikari ka zviro zva miri wa hina, a lirimi i tiko gi teleko hi kungalulami hakuva li chakisa a miri wontlhe, li dzivela a kuhanya kontlhe ka munhu, lona wutsumbu li dzivelwa hi ndzilo wa Gehena.*
7 Hakuva zvontlhe a zvihari zva khwati, ni zvinyanyani, ni zvikokakoka,* ni zvihari zva bimbi, zvi nga fumelwa niku hakunene zva fumelwa hi vanhu.
8 Kanilezvi a ku na munhu a zvi kotako ku fumela lirimi. A lirimi a li fumelwi, li bihile niku li tele hi vhenene yi dayako.
9 Hi lirimi, ha dhumisa Jehovha, a Papayi, kanilezvi hi tlhela hi rukatela hi lona a vanhu lava va mahilweko “hi mufananiso wa Nungungulu”.
10 Hi ka nomu walowu wa wun’we, ku huma kudhumisa ni kurukatela.
Vamakabye va mina, a zvilo a zvi faneli ku tshamisa lezvo.
11 Kasi ku nga huma mati yo nandziha* ni mati yo bava hi kwalaha ka cibuka* caleci ca cin’we ke?
12 Vamakabye va mina, a nkuwu wu nga pswala maolivha ke, kutani a vhina* wu nga pswala makuwu ke? Hizvalezvo, a cibuka ca mati yo bava a ci nge humesi mati yo nandziha.
13 Himani a tlharihileko, a tivako cikari ka n’wina ke? Hi mahanyela yakwe ya ma nene i wa kombise a mitiro yi mahiwako hi kurula loku ku tako hi ka wutlhari.
14 Kanilezvi loku mu hi ni ciluse ni kubangana* timbilwini ta n’wina, mu nga ti kulisi mu hembela lisine.
15 A wutlhari legi a giti hi le hehla; ga laha misaveni, ga nyama, niku ga madhimoni.
16 Hakuva laha ku nga ni ciluse ni kubangana,* kwalaho kambe ku na ni vhilinganya ni tixaka tontlhe ta zvilo zva kubiha.
17 Kanilezvi a wutlhari ga le hehla, a ku ranga gi basile, gi na ni kurula kambe, ni kuolova, ga ingisa, gi tele hi wuxinji ni mihandzu yi nene, a gi na cihlawulela, a gi na kukanganyisa.
18 Ahandle ka lezvo, a handzu wa kululama wu byaliwa kuruleni ka* lava va mahako kurula.
Mitlhamuselo ya lahasi
^ Kutani: “cavalos”.
^ Kutani: “mapaketi; tinavhiyo”.
^ Kutani: “chukila”.
^ Wona Tlhamuselo wa magezu ya Bhibhiliya.
^ Kutani: “zviharana zvo famba hi rumbu”.
^ Hi kukongoma: “yo tsombela”.
^ Kutani: “hlowo”.
^ A vhina i sinya leyi yi pswalako mauvha.
^ Zvi nga ha wula ku: “wunavenave”.
^ Zvi nga ha wula ku: “wunavenave”.
^ Zvi nga ha wula ku: “hi”.
