Jakobe 4:1-17
4 Kasi cini ci vangako a tiyimpi ni kulwa loku ku nga kona cikari ka n’wina? A zviti hi ka kunavela ka nyama loku ku lwako cikari ka zviro zva n’wina ke?
2 Ma navela kanilezvi a mu na nchumu. Ma daya ni ku mbilukela kanilezvi a mu zvi kumi. Mu tshama hi ku holova ni kulwa tiyimpi. A mu zvi kumi hakuva a mu kombeli.
3 Loku mu kombela a mu nyikiwi hakuva mu kombela hi kungo ga hava kasi mu fela ku zvi xakela kunaveleni ka n’wina ka nyama.
4 Zvibhayi ndzin’wina,* kasi a mu zvi tivi lezvaku a wunghana ni tiko wulala na Nungungulu ke? Hikwalaho, ni wihi loyi a nga munghana wa tiko i ti maha nala wa Nungungulu.
5 Mu alakanya lezvaku a mutsalo wu wula mahala loku wuku: “A moya lowu wu nga ndzeni ka hina wu tele hi ciluse”?
6 Kanilezvi a tipswalo leti Nungungulu a nyikako ta hombe. Hikwalaho a mutsalo wu ngalo: “Nungungulu wa venga lava va ti tlakusako, kanilezvi wa va nyika tipswalo lava va ti koramisako.”
7 Hikwalaho, ti koramiseni ka Nungungulu; kanetani Sathani* i ta mu tsutsuma.
8 Tshinelani ka Nungungulu, yenawu i ta tshinela ka n’wina. Hlambani mandla n’wina vawonhi, mu basisa a timbilu ta n’wina, n’wina va timbilu timbiri.
9 Tsuvani, muba nkosi mu rila. A kuhleka ka n’wina ku wa hundzuke kuva kurila, ni kutsaka ka n’wina kuva kubayiseka.
10 Ti koramiseni mahlweni ka Jehovha, yena i ta mu kulisa.
11 Vamakabye, tsikani ku lumbetana. Ni wihi loyi a lumbetako makabye wakwe kutani ku lamula makabye wakwe, i vhukela nayo a tlhela a lamula a nayo. Makunu loku wena u lamula nayo, a wu mahi lezvi a nayo wu wulako kanilezvi u mulamuli.
12 Kova ni mun’we basi loyi a nga Muyimisi wa nayo ni Mulamuli, loyi a nga ni ntamu wa ku ponisa ni ku lovisa. Kanilezvi wena ke, kova wena mani wo kala u lamula a muakelani wa wena ke?
13 Makunu hi nga zwani lezvi, n’wina mu nge ngalo: “Nyamutlha kutani mandziko hi taya ka dhoropa legiya, hi ya tshama lembe seyo hi maha mabhindzu hi kuma mali”,
14 kuveni a mu zvi tivi lezvaku a wutomi ga n’wina gi ta tshamisa kuyini mandziko. Hakuva n’wina mu hunguva leyi yi wonekako hi cikhatana yi gumesa yi nyamalala.
15 Kanilezvi mu fanele ku zvi wulisa lezvi: “Loku Jehovha a zvi randza, hi ta hanya, hi maha lezvi kutani lezviyani.”
16 Hambulezvo, n’wina ma ti kulisa matshandzeni ya n’wina. A matshandza lawo wontlhe ma bihile.
17 Hikwalaho, loyi a tivako ku maha zva zvi nene, kanilezvi a nga zvi mahi, wa wonha.
Mitlhamuselo ya lahasi
^ Kutani: “N’wina vo kala kutsumbeka”.
^ Hi ciGreki: di·á·bo·los, zvi wulako ku “mulumbeti”.