Jakobe 5:1-20
5 Makunu n’wina lava vo ganya, rilani muba huwa hi kota ya hlomulo lowu wu tako hehla ka n’wina.
2 A titshomba ta n’wina ti hinile, ni tinguwo ta n’wina ti gilwe hi muhlwa.
3 A ouro ya n’wina ni prata ya n’wina zvi kurukile. A kukuruka ka zvona ku tava wukustumunyu go mu vhukela, ku tlhela kuga a nyama ya n’wina. Lezvi mu zvi hlengeleteleko zvi ta fana ni ndzilo masikwini yo gumesa.
4 A muholo lowu mu nga kala ku nyika vatiri lava va nga tshovela masimu ya n’wina wu tshamela ku rila, niku a kurila ka vatshoveli lava va kombelako ku vhuniwa ku chikele tindleveni ta Jehovha wa tiyimpi.
5 N’wina mu wa hanya mafureni na mu hanyela ku ti tsakisa laha misaveni. A timbilu ta n’wina ti fana ni zvihari zvi tsikiwako zvi kuluka kasi zvi dawa.
6 Mu konile mu tlhela mu daya a munhu a lulamileko. A nga ta mu vhukela ke?
7 Vamakabye va mina, timiselani kala cikhatini leci a Hosi yi tova kona cikari ka hina. A murimi i rindzela a mihandzu yo saseka ya misava hi lihlazva-mbilu kala kuna vhula yo sangula ni leyi yo gumesa.
8 N’winawu kombisani lihlazva-mbilu, mu tiyisa a timbilu ta n’wina hakuva a cikhati ca kuva a Hosi yiva kona cikari ka hina ci tshinele.
9 Vamakabye, mu nga ngurangurelani kasi mu nga lamuliwi. A Mulamuli i yimile laha tinyangweni.
10 Vamakabye, laha mu timiselako a tixanisa ni ku kombisa lihlazva-mbilu, pimanyisani a cikombiso ca vaphrofeti lava va nga wulawula vitweni ga Jehovha.
11 Hi ngalo va katekile lava va timiseleko. Mu zwile hi kutimisela ka Joba mu tlhela mu wona lezvi Jehovha a nga mu chachazelisa zvona; mu zvi wonile lezvaku Jehovha i na ni tipswalo ta hombe ni wuxinji.
12 Vamakabye va mina, a ku hundza zvontlhe lezvi, tsikani ku hlambanya, kani hi tilo kutani hi misava, hambu hi nchumu wun’wani. Kanilezvi a “Ina” wa n’wina i wave ina, ni “Ahihi” wa n’wina ava ahihi, kasi mu nga lamuliwi.
13 Loku a hi kona cikari ka n’wina loyi a xanisekako, i wa khongele a nga tsiki. Loku a hi kona cikari ka n’wina loyi a tsakileko, i wa yimbelele Tisimu.
14 Loku a hi kona cikari ka n’wina loyi a babyako, i wa vitane a madhota ya bandla lezvaku ma ta mu khongelela, ma mu tota mafura vitweni ga Jehovha.
15 Makunu a mukhongelo wa kukholwa wu ta hanyisa loyi a babyako* niku Jehovha i ta mu vhuxa. Hambu loku a wonhile i ta tsetselelwa.
16 Hikwalaho, wulelani a zviwonho zva n’wina mun’we ka mun’wani mu tlhela mu khongelelana kasi mu hanyiswa. A mukhongelo wa munhu wo lulama wa vhuna nguvhu.
17 Elija i wa hi munhu wo fana na hina, hambulezvo a cikhati leci a nga khongela a khongotela Nungungulu lezvaku ku ngani vhula, hakunene a yi nangi misaveni hi malembe manharu ni 6 wa tihweti.
18 Makunu laha a nga khongela kambe, a tilo gi no nisa vhula, a misava yi pswala mihandzu.
19 Vamakabye va mina, loku a wokari cikari ka n’wina a hambukisiwa lisineni, kanilezvi ku humelela wokari a mu wuyisa,
20 tivani lezvaku loyi a wuyisako a muwonhi hi ndleleni yakwe ya kuwonha i ta mu ponisa kufeni a tlhela a khubhunyeta zviwonho zvinyingi.
Mitlhamuselo ya lahasi
^ Zvi nga ha wula ku: “a kareleko”.
