Johani 10:1-42
10 “Ndza tiyisa ka n’wina ndziku: Loyi a nga ngheniko hi nyangwa lomu rangeni ga tiyivhu kanilezvi a noma a nghena hi kun’wani, i khamba ni muphangi.
2 Kanilezvi loyi a nghenako hi laha nyangweni hi yena a nga murisi wa tiyivhu.
3 A murindzeli wa nyangwa wa mu vhululela, ni tiyivhu ta ingisa a gezu gakwe. Wa ti vitana hi mavito ya tona a ti humesa lahandle.
4 Loku a humesile tontlhe tiyivhu takwe lahandle, i ranga phambeni, tona ti mu landzela hakuva ta gi tiva a gezu gakwe.
5 Ti nga ta tshuka ti landzela munhu ti nga mu tiviko, kanilezvi ti ta mu tsutsuma hakuva a ti gi tivi a gezu ga munhu loye.”
6 Jesu i no va hlawutela mufananiso lowu kanilezvi a va zvi zwisisangi lezvi a nga kari a va byela.
7 Hikwalaho, Jesu i no engeta aku: “Ndza tiyisa ka n’wina ndziku: Mina ndzi nyangwa ya tiyivhu.
8 Vontlhe lava va ti wulako ku hi mina, lavo makhamba ni vaphangi; ni tiyivhu a ti va ingisi.
9 Mina ndzi nyangwa; ni wihi a nghenako hi laha ka mina i ta poniswa, a nghena ni ku huma, a kuma zvakuga.
10 A khamba gi tela ku ta yiva ni ku daya ni ku hohlota basi. Mina ndzi tile kasi a tiyivhu ti fela ku kuma wutomi ga pindzukelwa.
11 Mina ndzi murisi wa mu nene; a murisi wa mu nene i nyikela a wutomi gakwe hi kota ya tiyivhu.
12 A citiri leci ci nga hiko murisi, ni tiyivhu na ti nga hi ta cona, loku ci wona a hlolwa* na gita co tsika tiyivhu ci tsutsuma, a hlolwa gi sala gi khoma tiyivhu gi tlhela gi ti hangalasa;
13 i tsutsuma hi lezvi a nga citiri, a nga na mhaka ni tiyivhu.
14 Mina ndzi murisi wa mu nene. A tiyivhu ta mina ndza ti tiva, tonawu ta ndzi tiva.
15 Khwatsi hi lezvi Papayi a ndzi tivako, minawu ndza mu tiva Papayi. Ndza nyikela wutomi ga mina hi kota ya tiyivhu.
16 “Ndzi na ni tiyivhu tin’wani to kala ti nga hi ta ntlhambi lowu; tonawu ndzi fanele ku ti tisa laha, ti ta ingisa a gezu ga mina tiva ntlhambi wun’we wu nga ni murisi mun’we.
17 Papayi wa ndzi randza hakuva ndza nyikela wutomi ga mina kasi ndzi fela ku gi kuma kambe.
18 I hava a nga ni ntamu wa ku gi teka ka mina, kanilezvi ndza gi nyikela hi kuzvirandza. Ndzi na ni ntamu wa ku gi nyikela, ni ntamu wa ku tlhela ndzi gi kuma. Ndzi leletelwe lezvo hi Papayi.”
19 Ku nova ni kukanetisana kambe cikari ka vaJudha hi kota ya magezu lawa.
20 A kutala ka vona va waku: “Inaloyi i na ni dhimoni niku wa hlanya. Hikuyini mu mu ingiselako?”
21 A van’wani va waku: “A magezu lawa a hi ya munhu wa dhimoni. A dhimoni gi nga zvi kota ku vhulula matihlo ya zvikhumu ke?”
22 Ku nova ni Festa ya ku Nyikela tempeli le Jerusalema. Yi wa hi nguva ya cirami,
23 Jesu i wa kari a famba lomu tempeleni ka vharanda ga Solomoni.
24 A vaJudha va no mu randzela vaku kakwe: “U ta hi jikajikisela kala rini? Loku u hi wena Kristu tekela ku hi byela zviku dlunya.”
25 Jesu i no va hlamula aku: “Ndzi mu byelile, kanilezvi a mu kholwi. A mitiro leyi ndzi mahako hi vito ga Papayi wa mina ya ndzi kustumunyela.
26 Kanilezvi a mu kholwi hakuva a mu tiyivhu ta mina.
27 A tiyivhu ta mina ta ingisa a gezu ga mina; ndza ti tiva niku ta ndzi landzela.
28 Ndza ti nyika wutomi ga pindzukelwa, ti nga ta tshuka ti loviswa niku a nga kona a to ti wutla mandleni ya mina.
29 Lezvi Papayi wa mina a ndzi nyikileko zva hombe a ku hundza zvontlhe zvilo zvin’wani, a nga kona a nga ni ntamu wa ku zvi wutla mandleni ya Papayi.
30 Mina na Papayi hi mun’we.”*
31 A vaJudha va no tlhela va rola maribye kasi ku mu gandla hi wona.
32 Jesu aku kabye: “Ndzi mu kombile mitiro yo tala ya yi nene yi tako hi ka Papayi. Mu lava ku ndzi gandla hi kota ya ntiro wihi wa kona?”
33 A vaJudha va no mu hlamula vaku: “A hi lavi ku ku gandla hi kota ya mitiro ya yi nene, kanilezvi hi lezvi u nga rukatela. Hakuva hambu lezvi u nga munhu, u ti maha nungungulu.”
34 Jesu i no va hlamula aku: “Kasi a zvi tsaliwangi lomu Nayweni wa n’wina lezvaku: ‘Ndzi ngalo: “N’wina mu vanungungulu”’?*
35 Loku Nungungulu a va wula ‘vanungungulu’ lava va koniwako hi mhaka yakwe kasi lezvo a mitsalo a yi ciciwi,
36 mu wulisa kuyini ka mina loyi Papayi a ndzi basisileko a tlhela a ndzi rumela tikweni muku: ‘Wena wa rukatela’, hi lezvi ndzi ngaku: ‘Ndzi N’wana wa Nungungulu’ ke?
37 Loku ku hi lezvaku a ndzi mahi a mitiro ya Papayi, mu nga kholwi ka mina.
38 Kanilezvi loku ndzi yi maha, hambu lezvi mu nga kholwiko ka mina, kholwani ka yona kasi mu zvi tiva ni ku kholwa lezvaku Papayi i zvin’we na mina ni lezvaku mina ndzi zvin’we na Papayi.”
39 Hikwalaho va no zama ku mu khoma kambe, kanilezvi i no pswhonyomoka.*
40 I no famba kambe le tlhatuko wa Jordhani a ya tshama laha Johani a nga bhabhatisa kona kusanguleni.
41 Ku nota vanhu vo tala kakwe va taku: “Johani a nga mahangi ne ciwoniso cin’we, kanilezvi zvontlhe lezvi a zvi wulileko hi wanuna loyi lisine.”
42 A votala va nga hi laho va no kholwa kakwe.
Mitlhamuselo ya lahasi
^ Kutani: “lobo”.
^ Kutani: “hi zvin’we”.
^ Kutani: “mu fana ni nungungulu”.
^ Kutani: “nyemuka”.
