Johani 12:1-50
12 Na ka ha kiyela a 6 wa masiku kasi ku mahiwa Phasika, Jesu i no chikela Bhetaniya laha ku nga tshama Lazaru, loyi Jesu a nga mu vhuxile hi ka vafileko.
2 Hikwalaho va no mu longiselela zvakuga zva kulalela ka wutshamu lego. Marta hi yena a nga va phamela, kanilezvi Lazaru i wa hi mun’we wa lava va nga kari vaga* zvin’we naye.
3 Mariya i no teka cipimo ca khihlanya ga litro ya mafura ya nardho* yo nuhela, yo dhura nguvhu, yo kala ku patselwa ni nchumu, a ma chulula mikondzweni ya Jesu, a gumesa a yi sula hi misisi yakwe. A yindlu yi no tala hi kunuhela ka mafura lawo.
4 Kanilezvi Judhasi Iskariyoti, a mun’we wa vapizani vakwe, loyi a nga lava ku mu nyikela, i te ngalo:
5 “Hikuyini a mafura lawa yo nuhela ma nga kala ku xavisiwa hi 300 wa tidhenaryo* ti nyikwa zvisiwana ke?”
6 A hi ku khwatsi i no wula lezvo hi ku zwela zvisiwana, kanilezvi hi kota ya lezvi a nga hi khamba, niku lezvi a nga hlayisa a kaxa ga mali, i wa yiva mali leyi yi nga cheliwa lomo.
7 Jesu aku ngalo: “Mu tsikeni a maha lezvi, kasi ku longisela a siku ga kulahliwa ka mina.
8 Hakuva a zvisiwana zvi na n’wina contlhe cikhati, kanilezvi a hi contlhe cikhati mu tova na mina.”
9 Ka cikhati leco, a citshungu ca hombe ca vaJudha ci no zvi tiva lezvaku Jesu i wa hi le Bhetaniya. Makunu va nota, na va nga teli ku ta wona Jesu yece kanilezvi ni ku ta wona Lazaru, loyi a nga mu vhuxile hi ka vafileko.
10 A vapristi lava va tihosana va no xuxa cikungo ca ku daya Lazaru yenawu,
11 hakuva a vaJudha vo tala va waya Bhetaniya va ya kholwa ka Jesu hi kota ya Lazaru.
12 Hi mandziko wa kona, a citshungu ca hombe leci ci nga tile festeni ci nozwa lezvaku Jesu wata Jerusalema.
13 Hikwalaho, ci no teka mahanga ya micindzu ci mu khinga, ci huwelela ciku: “Nungungulu, ha ku kombela, mu hlayise! Yi katekile a Hosi ya Izrayeli leyi yi tako vitweni ga Jehovha!”
14 Laha Jesu a nga kuma cimbongolana i no ci khilela, kota lezvi ku tsalilweko ku ngalo:
15 “U nga chavi wena nhanyana wa Ziyoni. Hi nga wona! A hosi ya wena yata na yi khilele cimbongolana.”
16 A vapizani vakwe a va tekelangi ku ti zwisisa a timhaka leti, kanilezvi a cikhati leci Jesu a nga tlakuswa, va no zvi alakanya lezvaku a zvilo lezvi zvi wa tsalilwe xungetano hi yena niku va zvi mahile kakwe.
17 A citshungu leci ci nga hi zvin’we naye a cikhati leci a nga vitana Lazaru a huma hi lomu cilahleni, a mu vhuxa hi kufeni, ci no simama ku nyika wukustumunyu.
18 Hi kota ya lezvo kambe, a citshungu ci noya kakwe hakuva ci wa zwile lezvaku i mahile ciwoniso leci.
19 Hikwalaho a vaFarisi va no wulawulisana cikari kabye vaku: “Ma zvi wona ku a hi lungi ke? A tiko gontlhe ga mu landzela.”
20 Ku wa hi ni vaGreki vo kari cikari ka lava va nga tile ku ta khozela festeni.
21 Makunu va no tshinelela Filipu, loyi a ngata hi Bhetsaidha wa Galileya, va mu kombela vaku: “Bava, hi lava ku wona Jesu.”
22 Filipu i no ya byela Andrewu. Andrewu na Filipu va noya va ya byela Jesu.
23 Kanilezvi Jesu i no va hlamula aku: “Ci chikele cikhati ca lezvaku a N’wana wa munhu a dhumisiwa.
24 Ndza tiyisa ka n’wina ndziku: Loku a mbewu ya trigo yi ngawi misaveni yifa, yi simama kuva mbewu yin’we; kanilezvi loku yifa, yi pswala mihandzu yo tala.
25 Ni wihi loyi a randzako wutomi gakwe wa gi lovisa, kanilezvi loyi a vengako wutomi gakwe tikweni legi, i ta gi hlayisa kala a kuma wutomi ga pindzukelwa.
26 Loku a wokari a lava ku ndzi tirela, i wa ndzi landzele; ni laha ndzi nga kona loyi a ndzi tirelako i tava laho. Loku a wokari a lava ku ndzi tirela, Papayi i ta mu nyika wudzundzo.
27 Makunu ndza* karateka, ndzi ta kuyini? Papayi, ndzi ponise ka cikhati leci. Hambulezvo, hi zvona zvi ndzi mahileko ndzita ka cikhati leci.
28 Papayi, dhumisa a vito ga wena.” Ku no zwala gezu na gita hi le tilweni giku: “Ndzi gi dhumisile, ndzi ta tlhela ndzi gi dhumisa.”
29 A citshungu leci ci nga hi laho ci no gizwa ciku: Ku dzindzile. A van’wani vaku: “I ngilozi yi nga wulawula naye.”
30 Jesu i no hlamula aku: “A gezu legi a gi zwalangi hi kota ya mina, kanilezvi gi zwele hi kota ya n’wina.
31 A tiko legi ga lamuliwa; ni hosana ya tiko legi yi ta hlongolwa.
32 Hambulezvo, loku ndzi hayekiwa mhandzeni, ndzi ta koka vanhu va tixaka tontlhe vata ka mina.”
33 I wulile lezvo kasi ku komba lezvi a nga lava ku fisa zvona.
34 A citshungu ci no mu hlamula ciku: “Hi zwile Nayweni lezvaku Kristu i ta tshama kala kupindzuka. Makunu hikuyini u nge a N’wana wa munhu i fanele ku hayekiwa mhandzeni? A N’wana loye wa munhu kasi hi mani?”
35 Hikwalaho Jesu i te ngalo kabye: “A kuwonekela ka ha ta tshama na n’wina zva cikhatana. Fambani na ma ha hi ni kuwonekela, kasi mu nga hluliwi hi munyama. Ni wihi a fambako munyameni a nga ku tivi lomu a yako.
36 Loku ma ha hi ni kuwonekela, kholwani ka kuwonekela, kasi muva vana va kuwonekela.”
Jesu i no wula timhaka leti a gumesa a ya fihlala.
37 Hambu lezvi a nga mahile zviwoniso zvo tala nguvhu mahlweni kabye, a va kholwangi kakwe,
38 kasi ku tatiseka a mhaka ya muphrofeti Isaya, yaku: “Jehovha, himani a nga kholwa lezvi hi nga wula? Ahati a woko ga Jehovha ke, gi wonekelisilwe ka mani?”
39 Leci ci nga va maha va nga kholwi hi lezvaku Isaya i wa wulile kambe aku:
40 “I va vhalile matihlo, a nonohisa ni timbilu tabye, kasi va nga tshuki va wona hi matihlo yabye ni ku zwisisa hi timbilu tabye, va hundzuluka ndzi va hanyisa.”
41 Isaya i wulile timhaka leti hakuva i wonile a kungangamela kakwe, a wulawula hi yena.
42 Kanilezvi hambu a tihosana to tala ti wa kholwa kakwe, hambulezvo ti wa nga zvi kombisi kubaseni hi kota ya vaFarisi kasi ti nga hlongoliwi sinagogeni;
43 hakuva ti wa randza nguvhu a wudzundzo ga vanhu a ku hundza a wudzundzo ga Nungungulu.
44 Jesu i no tlakusa gezu aku: “Ni wihi loyi a kholwako ka mina a nga kholwi ka mina ndzoce, kanilezvi i kholwa ni ka loyi a ndzi rumileko;
45 ni loyi a ndzi wonako, i wona ni Loyi a ndzi rumileko.
46 Ndzi tile kota kuwonekela tikweni kasi ni wihi loyi a kholwako ka mina a nga ha tshami munyameni.
47 Kanilezvi loku a munhu azwa timhaka ta mina a nga ti hlayisi, a ndzi mu lamuli hakuva a ndzi telangi ku ta lamula tiko, kanilezvi ndzi tele ku ta gi hanyisa.
48 Ni wihi loyi a ndzi kanyisako a tlhela a nga amukeli a timhaka ta mina, ku na ni loyi a to mu lamula. A mhaka leyi ndzi yi kaneleko hi yona yi to mu lamula ka siku go gumesa.
49 Hakuva a ndzi wulawulangi zva hloko ya mina, kanilezvi Papayi loyi a ndzi rumileko hi yena a ndzi layileko lezvi ndzi faneleko ku wula ni ku kanela.
50 Ndza zvi tiva lezvaku a kulaya kakwe ku yisa wutomini ga pindzukelwa. Hikwalaho, ni cihi leci ndzi wulako, ndzi ci wulisa zvalezvi Papayi a nga ndzi byelisa zvona.”
Mitlhamuselo ya lahasi
^ Kutani: “va nga tshamile mezeni”.
^ A nardho i sinya yo nuhela.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “a muhefemulo wa mina wa”.