Johani 13:1-38
13 Kota lezvi Jesu a nga zvi tiva na yi nga se chikela a festa ya Phasika lezvaku ci chikele a cikhati cakwe ca kuva a suka tikweni legi aya ka Papayi, na a randzile lava va nga vakwe va nga hi tikweni, i no va randza kala magumo.
2 Laha va nga kari va lalela,* Sathani* i wa sina a nghenisile mbilwini ya Judhasi Iskariyoti, n’wana Simoni, a maalakanyo ya ku nyikela Jesu.
3 Makunu Jesu na a zvi tiva lezvaku Papayi i vekile zvilo zvontlhe mandleni yakwe ni lezvaku i tile hi ka Nungungulu niku i waya ka Nungungulu,
4 i no suka laha kugeni a tlhatlha a bhaji gakwe, a teka thahula a boha ciwunwini cakwe.
5 Andzhako ka lezvo, i no chela mati lomu ka basiya a sangula ku va hlambisa mikondzo a vapizani a gumesa a yi sula hi thahula legi a nga ti bohile ciwunwini.
6 I no chikela ka Simoni Pedro. Pedro aku kakwe: “Hosi, u lava ku ndzi hlambisa mikondzo ke?”
7 Jesu i no mu hlamula aku: “Lezvi ndzi mahako u nga ta zvi zwisisa zvezvi, kanilezvi u ta zvi zwisisa hi kufamba ka cikhati.”
8 Pedro aku kakwe: “U nga ta tshuka u ndzi hlambisa mikondzo.” Jesu i no mu hlamula aku: “Loku ndzi nga ku hlambisi, a wu na ciavelo zvin’we na mina.”
9 Simoni Pedro aku kakwe: “Hosi, u nga ndzi hlambisi mikondzo basi, kanilezvi ndzi hlambise ni mandla ni hloko.”
10 Jesu aku kakwe: “Loyi a nga hlamba i basile a mbhelela, a ka ha laveki ku a hlamba zvin’wani zviro, saseka mikondzo basi. N’wina mu basile, kanilezvi a hi n’wina n’wentlhe mu basileko.”
11 Hakuva i wa mu tiva loyi a nga lava ku mu nyikela. Hi cona ci nga mu maha aku: “A hi n’wina n’wentlhe mu basileko.”
12 Loku a mbhetile ku va hlambisa mikondzo a tlhela a boha bhaji gakwe, i no ya tshama kambe mezeni aku kabye: “Ma zvi tiva ku zvi wula yini lezvi ndzi mu maheleko ke?
13 N’wina mu ndzi vitana ku ‘Mugondzisi’ ni ku ‘Hosi’; mu wula zvona hakuva zvi tano.
14 Hikwalaho, loku mina ndzi nga Hosi ni Mugondzisi ndzi mu hlambisile mikondzo, n’winawu hlambisanani* mikondzo.
15 Hakuva ndzi mu nyikile cikombiso, kasi na n’winawu mu fela ku maha kota lezvi ndzi mahileko ka n’wina.
16 Ndza tiyisa ka n’wina ndziku: A nandza a hi ga hombe ku hundza a hosi ya gona, hambu a cirun’wa a hi ca hombe a ku hundza loyi a ci rumileko.
17 Loku mu tiva a timhaka leti, mu katekile loku mu ti maha.
18 A ndzi wulawuli hi n’wina n’wentlhe; ndza va tiva lava ndzi va hlawulileko. Kanilezvi zvive tano kasi wu fela ku tatiseka a mutsalo lowu wu nge ngalo: ‘Loyi a nga kari aga pawa ya mina, i ndzi jikele.’
19 Kusukela lezvi, ndza mu byela na zvi nga se maheka, kasi loku zvi maheka mu fela ku kholwa lezvaku hi mina yena.
20 Ndza tiyisa ka n’wina ndziku: Ni wihi a amukelako loyi ndzi mu rumileko i amukela na minawu, ni loyi a ndzi amukelako i amukela ni Loyi a ndzi rumileko.”
21 Andzhako ka ku wula timhaka leti, Jesu i no karateka moyeni, a kustumunya aku: “Ndza tiyisa ka n’wina ndziku: A mun’we wa n’wina i ta ndzi xavisa.”
22 A vapizani va no sangula ku cuwukana, na va nga zvi tivi ku i wula mani.
23 A mun’we wa vapizani, loyi Jesu a nga mu randza, i wa khigele cifuveni ca Jesu.
24 Hikwalaho, Simoni Pedro i no khweneta a mupizani loye hi hloko aku kakwe: “Hi byele ku i wula mani.”
25 A mupizani loye i no khigela cifuveni ca Jesu aku kakwe: “Hosi, himani?”
26 Jesu i no hlamula aku: “Hi loyi ndzi to mu nyika a cikhemu ca pawa leci ndzi petako lomu ngelweni.” Hikwalaho, loku a petile pawa lomu ngelweni, i no teka a nyika Judhasi, n’wana wa Simoni Iskariyoti.
27 Loku Judhasi a tekile a cikhemu ca pawa, Sathani i no nghena mbilwini yakwe. Jesu aku kakwe: “Lezvi u mahako, zvi mahe hi kuhatlisa.”
28 Kanilezvi, i hava ni mun’we wa lava va nga tshamile mezeni a nga zvi tiva ku i mu byela lezvo hi kuyini.
29 Kunene, kota lezvi Judhasi a nga hi muhlayisi wa kaxa ga mali, a vokari va wa alakanya ku Jesu i ngalo: “Xava lezvi hi zvi lavako laha festeni”, kutani ku i wa nyike zvokari a zvisiwana.
30 Zvalezvi a nga amukela a cikhemu ca pawa, i no tekela ku huma. Gi wa hi wusiku.
31 Hikwalaho, laha a nga humele, Jesu i te ngalo: “Makunu a N’wana wa munhu wa dhumiswa, na Nungungulu wa dhumiswa ha yena.
32 Nungungulu wutsumbu i ta mu dhumisa, niku i ta tekela ku mu dhumisa.
33 Vana vanga, ndza ha tava na n’wina zva cikhatana. Mu ta ndzi lavetela; kanilezvi kota lezvi ndzi wulileko ka vaJudha ndziku: ‘Lomu ndzi yako kona mu nga ta zvi kota kuta’, makunu ndza wula ka n’winawu.
34 Ndza mu nyika a nayo wuswa, wa lezvaku mu randzana; khwatsi hi lezvi ndzi mu randzileko, n’winawu randzanani.
35 Loku mu randzana, a vanhu vontlhe va ta zvi tiva lezvaku mu vapizani va mina.”
36 Simoni Pedro i te ngalo kakwe: “Hosi uya kwihi?” Jesu a hlamula aku: “Lomu ndzi yako kona u nga ta zvi kota ku ndzi landza zvezvi, kanilezvi u ta ndzi landza hi ndzhako ka cikhati.”
37 Pedro aku kakwe: “Hosi, hikuyini ndzi nga zvi kotiko ku ku landza zvezvi? Ndzi ta nyikela wutomi ga mina hi kota ya wena.”
38 Jesu i no hlamula aku: “U ta nyikela wutomi ga wena hi kota ya mina? Ndza tiyisa ka wena ndziku: A nkuku wu nga taba na u nga se ndzi kaneta kunharu.”
Mitlhamuselo ya lahasi
^ Kutani: “jantara”.
^ Hi ciGreki: di·á·bo·los, zvi wulako ku “mulumbeti”.
^ Kutani: “mu fanele ku hlambisana”.
