Johani 16:1-33
16 “Ndzi mu byelile timhaka leti kasi mu nga mbhelelwi hi kukholwa.*
2 Va ta mu hlongola masinagogeni. Kunene, cata cikhati leci ni wihi loyi a ta nga mu daya a to alakanya lezvaku i tirela Nungungulu.
3 Kanilezvi va ta maha zvilo lezvi hakuva a va mu tivi Papayi ne mina.
4 Hambulezvo, ndzi mu byelile a timhaka leti kasi loku ci chikela a cikhati ca lezvaku ti maheka, mu fela ku zvi alakanya lezvaku ndzi wa mu byelile.
“A ndzi mu byelangi a timhaka leti kusanguleni, hakuva ndzi wa ha hi na n’wina.
5 Kanilezvi zvezvi ndza famba ka Loyi a ndzi rumileko; hambulezvo i hava ni mun’we cikari ka n’wina a ndzi wutisako aku: ‘Uya kwihi?’
6 Kanilezvi kota lezvi ndzi mu byelileko a timhaka leti, a timbilu ta n’wina ti tele hi kukarateka.
7 Hambulezvo, ndza mu byela lisine ndziku: Zvi ta vhuna n’wina lezvi ndzi fambako. Hakuva loku ndzi nga fambi, a muvhuni* a nga tata ka n’wina; kanilezvi loku ndzi famba, ndzi ta mu rumela ka n’wina.
8 A cikhati leci a muvhuni a to chikela, i ta komba ka vontlhe zviku dlunya lezvaku cini a ciwonho, ni kululama, ni kulamula:
9 A co sangula ciwonho, hakuva a va kholwi ka mina;
10 ku landzela kululama, hakuva ndza famba ka Papayi niku mu nga ta ha ndzi wona;
11 a co gumesa kulamula, hakuva a hosana ya tiko legi yi lamulilwe.
12 “Ndza hi ni timhaka to tala kasi ndzi mu byela, kanilezvi a mu nge ti zwisisi zvezvi.
13 Hambulezvo, a cikhati leci a to chikela muvhuni, ku nga moya wa lisine, i ta mu rangela lisineni lontlhe, hakuva a nga ta zvi randza a wulawula hi kutisangulela kakwe, kanilezvi i ta wulawula lezvi a zvi zwileko, a mu hlawutela zvilo zva ha tako.
14 Loye i ta ndzi dhumisa hakuva i ta amukela lezvi zvi nga zva mina a zvi kanela ka n’wina.
15 Zvontlhe lezvi Papayi a nga nazvo zva mina. Hi cigelo leco ndzi ngaku a muvhuni i amukela lezvi zvi nga zva mina a zvi kanela ka n’wina.
16 Zvalezvanyana mu nga ta ha ndzi wona, kanilezvi, zvalezvanyana mu ta tlhela mu ndzi wona.”
17 Laha va ngazwa lezvo, a vokari cikari ka vapizani vakwe va no wutisana vaku: “Kasi i lava ku wula yini ka hina loku aku: ‘Zvalezvanyana mu nga ta ha ndzi wona, kanilezvi, zvalezvanyana mu ta tlhela mu ndzi wona’, niku ‘hakuva ndza famba ka Papayi’ ke?”
18 Hikwalaho, va waku: “I lava ku wula yini loku aku: ‘zvalezvanyana’? A hi zvi tivi lezvi a zvi wulako.”
19 Jesu i no zvi tiva lezvaku va wa lava ku mu wutisa, hikwalaho i te ngalo kabye: “Mu wutisana hi kota ya lezvi ndzi ngaku: ‘Zvalezvanyana mu nga ta ha ndzi wona, kanilezvi, zvalezvanyana mu ta tlhela mu ndzi wona’ ke?
20 Ndza tiyisa ka n’wina ndziku: Mu ta rila muba huwa, kanilezvi a tiko gi ta tsaka; mu tava kuxanisekeni, kanilezvi a kuxaniseka ka n’wina ku ta hundzuluswa kuva kutsaka.
21 Loku a wasati a ha lun’wa wa xaniseka hakuva ci chikele a cikhati cakwe ca ku pswala, kanilezvi loku a pswalile n’wana a nga ha ku alakanyi a kubayisa hi kota ya litsako la lezvi ku pswalilweko munhu tikweni.
22 Hizvalezvo, n’winawu ma karateka ka cikhati leci, kanilezvi ndzi ta tlhela ndzi mu wona, ni timbilu ta n’wina ti ta tsaka, a nga kona a to mu tekela a litsako la n’wina.
23 Ka siku lego, mu nga ta ha ndzi wutisa nchumu. Ndza tiyisa ka n’wina ndziku: Ni cihi leci mu ta nga kombela ka Papayi hi vito ga mina, i ta mu nyika.
24 Kala lezvi a mu se kombela nchumu hi vito ga mina. Kombelani mu ta nyikiwa, kasi a kutsaka ka n’wina ku fela ku mbhelela.
25 “Ndzi kanele a timhaka leti ka n’wina hi mifananiso. A cikhati cata leci ndzi to kala ndzi nga ha wulawuli na n’wina hi mifananiso, kanilezvi ndzi ta wulawula na n’wina zviku dlunya xungetano hi Papayi.
26 Ka siku lego mu ta kombela ka Papayi hi vito ga mina; a ndzi wuli ku hi mina ndzi to mu kombelela.
27 Hakuva Papayi wa mu randza hi lezvi n’wina mu ndzi randzako ni lezvi mu kholwako lezvaku ndzi tile hi ka Nungungulu.
28 Ndzi tile tikweni na ndzita hi ka Papayi. Makunu ndza suka tikweni ndzi tlhela ka Papayi.”
29 A vapizani vakwe va te ngalo: “Lezvi u wulawula zviku dlunya, a wa ha wulawuli hi mifananiso.
30 Makunu ha zvi wona lezvaku wa zvi tiva a zvilo zvontlhe niku a zvi lavi ku kala u wutisiwa hi munhu. Hikwalaho ha kholwa lezvaku u tile hi ka Nungungulu.”
31 Jesu i no va hlamula aku: “Makunu ma kholwa?
32 Cata cikhati, niku ci chikele, laha n’wentlhe mu to hangalaka, a mun’we ni mun’wani a ti yela kaya kakwe, mu ndzi siya ndzoce. Kanilezvi a ndzi ndzoce, hakuva Papayi i zvin’we na mina.
33 Ndzi mu byelile a timhaka leti kasi mu fela kuva ni kurula hi kota ya mina. Mu ta xaniseka tikweni, kanilezvi tiyani hlana! Mina ndzi hlulile tiko.”
Mitlhamuselo ya lahasi
^ Hi kukongoma: “kasi mu ngawi”.
^ A gezu legi ga ku “muvhuni” ka vhesi 7, ni ka vhesi 8, ni ka vhesi 13, ni legi ga ku “loye” ka vhesi 14, ma wula a moya wo basa. Jesu i tirisile a gezu legi ga ku “muvhuni” kasi ku fananisa a moya wo basa ni munhu, kanilezvi a moya wo basa a hi munhu, i ntamu.
