Johani 17:1-26
17 Andzhako ka loku Jesu a wulile timhaka leti, i no tlakusa matihlo a cuwuka tilweni, aku: “Papayi, a cikhati ci chikele. Dhumisa a n’wana wa wena kasi a n’wana wa wena a fela ku ku dhumisa,
2 kota lezvi u mu nyikileko ntamu hehla ka vanhu* vontlhe, kasi a va nyika wutomi ga pindzukelwa vontlhe lava u mu nyikileko.
3 Kasi va kuma wutomi ga pindzukelwa va fanele ku ku tiva wena Nungungulu wece wa lisine, na Jesu Kristu loyi u mu rumileko.
4 Ndzi ku dhumisile misaveni, niku ndzi mbhetile a ntiro lowu u ndzi nyikileko ku maha.
5 Makunu Papayi, ndzi dhumise reveni ga wena hi wudzundzo legi ndzi nga hi nago na ndza ha hi zvin’we na wena a tiko na gi nga seva kona.
6 “Ndzi tivekisile a vito ga wena ka vanhu lava u ndzi nyikileko tikweni. Va wa hi va wena, makunu u ndzi nyikile, niku va ingisile a mhaka ya wena.
7 Zvalezvi va zvi tiva lezvaku a zvilo zvontlhe lezvi u ndzi nyikileko zvita hi ka wena;
8 hakuva ndzi va nyikile a timhaka leti u ndzi nyikileko, va ti amukele. Va zvi tiva lezvaku ndzi tile hi ka wena niku va kholwa lezvaku hi wena u nga ndzi ruma.
9 Ndza va kombelela, a ndzi kombeleli a tiko, kanilezvi ndzi kombelela lava u ndzi nyikileko, hakuva va wena;
10 zvontlhe lezvi zvi nga zva mina zva wena ni zva wena zva mina; ndzi dhumisilwe cikari kabye.
11 “A ndza ha hi tikweni, kanilezvi vona va laha tikweni; mina ndzita ka wena. Papayi wa Kubasa, va hlayise hi kota ya vito ga wena legi u ndzi nyikileko, kasi vava mun’we,* a ku khwatsi hi lezvi hina hi nga mun’we.*
12 Na ndza ha hi zvin’we navo, ndzi wa va hlayisa ni ku va vhikela hi kota ya vito ga wena legi u ndzi nyikileko. I hava ni mun’we cikari kabye a lovisilweko, saseka n’wana wa kulova, kasi a mitsalo yi tatiseka.
13 Kanilezvi makunu ndzata ka wena, ndza wula timhaka leti tikweni kasi va kuma litsako la mina hi kumbhelela.
14 Ndzi va nyikile a mhaka ya wena, kanilezvi a tiko ga va venga hakuva a hi va tiko, khwatsi hi lezvi minawu ndzi nga hiko wa tiko.
15 “A ndzi kombeli lezvaku u va susa tikweni, kanilezvi ndzi kombela lezvaku u va hlayisa hi kota ya loyi wa kubiha.
16 Vona a hi va tiko khwatsi hi lezvi minawu ndzi nga hiko wa tiko.
17 Va basise* hi lisine; a mhaka ya wena lisine.
18 A ku fana ni lezvi u ndzi rumeleko tikweni, minawu ndza va rumela tikweni.
19 Ndza ti basisa hi kota ya vona kasi vonawu va basiswa hi lisine.
20 “A ndzi kombeleli lava voce, kanilezvi ndzi kombelela ni lava va to kholwa ka mina hi kota ya kugondzisa kabye,
21 kasi vontlhe vava mun’we a ku khwatsi hi lezvi wena Papayi u nga zvin’we na mina, na mina ndzi nga zvin’we na wena, kasi vonawu vava zvin’we na hina, lezvaku a tiko gi kholwa ku hi wena u nga ndzi ruma.
22 Ndzi va nyikile a kungangamela loku u ndzi nyikileko kasi vava mun’we, khwatsi hi lezvi mina na wena hi nga mun’we.
23 Mina ndzi zvin’we na vona, na wena u zvin’we na mina, kasi va fela ku mbhelela vava mun’we,* ni tiko gi zvi tiva lezvaku hi wena u nga ndzi ruma ni lezvaku u va randzile a ku fana ni lezvi u ndzi randzileko.
24 Papayi, ndzi lava lezvaku lava u ndzi nyikileko vava na mina laha ndzi nga kona, kasi va wona a kungangamela loku u ndzi nyikileko, hakuva u ndzi randzile a tiko na gi nga se vangiwa.
25 Papayi wa Kululama, a tiko a gi ku tivi ne ni kutsongwani, kanilezvi mina ndza ku tiva, ni lava va zvi tiva lezvaku hi wena u nga ndzi ruma.
26 Ndzi va tivisile a vito ga wena, ndza ha ta gi tivekisa, kasi a lirandzo leli u ndzi randzileko hi lona li fela kuva kabye, minawu ndziva zvin’we navo.”
Mitlhamuselo ya lahasi
^ Hi kukongoma: “nyama”.
^ Kutani: “zvin’we”.
^ Kutani: “zvin’we”.
^ Kutani: “Va veke hi tlhelo”.
^ Kutani: “kasi va fela ku bohana khwatsi”.
