Johani 19:1-42
19 Pilatu i no teka Jesu, a laya lezvaku a biwa.
2 A masochwa ma no luka cidlodlo* ca mimizwa ma ci tlhateka hlokweni yakwe, ma mu bohisa nguwo yo pswhuka,
3 mata kakwe ma taku: “Xewe, wena Hosi ya vaJudha!” na ma muba tipama.
4 Pilatu i no huma kambe lahandle aku kabye: “Ndzi ta mu humesa ata ka n’wina kasi mu zvi tiva lezvaku a ndzi kumi nandzu ka yena.”
5 Hikwalaho Jesu i no huma handle na a bohile cidlodlo* ca mimizwa ni nguwo yo pswhuka. Pilatu aku kabye: “Hi yaloyi!”
6 Kanilezvi, a cikhati leci a vapristi lava va tihosana ni varindzeli va nga mu wona, va no banguleka vaku: “I waye mhandzeni! I waye mhandzeni!”* Pilatu aku kabye: “Mu tekeni, mu mu daya hi n’wece,* hakuva a ndzi kumi nandzu kakwe.”
7 A vaJudha va no mu hlamula vaku: “Hi na ni nayo, niku hi nayo lowo i fanele kufa, hakuva i ti mahile n’wana wa Nungungulu.”
8 Laha Pilatu a ngazwa lezvi va nga kari va wula, i no chava nguvhu,
9 a nghena kambe ndlwini ya govhernadhori aku ngalo ka Jesu: “Uta hi kwihi?” Kanilezvi Jesu a nga mu hlamulangi nchumu.
10 Pilatu aku kakwe: “Wo ndzi miyelela? A wu zvi tivi ku ndzi na ni ntamu wa ku ku tlhatlha ni ntamu wa ku ku daya ke?”*
11 Jesu i no mu hlamula aku: “U wa nga tava ni ntamu hehla ka mina ne wutsongwani loku u wa nga nyikiwangi wona na zvita hi le hehla. Hi cigelo leco, a munhu loyi a ndzi nyikeleko ka wena i na ni nandzu wa hombe.”*
12 Hi kota ya lezvo, Pilatu i no simama ku lavetela tindlela ta ku mu tlhatlhisa, kanilezvi a vaJudha va no banguleka vaku: “Loku u tlhatlha wanuna loyi a wu munghana wa Khezari. Hakuva ni wihi a ti mahako hosi i kanyisa* Khezari.”
13 Makunu loku Pilatu a zwile lezvo, i no humesa Jesu lahandle a gumesa a ya tshama citshan’wini ca kulamula laha ku vitaniwako ku Wutshamu go Bambatelwa hi Maribye, kanilezvi hi ciHebheru i Gabhata.
14 Gi wa hi siku ga Kulongisela Phasika; kwalomu ka 12 hora.* I te ngalo ka vaJudha: “Hi leyi a hosi ya n’wina!”
15 Kanilezvi va no banguleka vaku: “Mu daye! Mu daye! I waye mhandzeni!”* Pilatu aku kabye: “Ndzi daya a hosi ya n’wina?” A vapristi lava va tihosana va no hlamula vaku: “A hi na hosi yin’wani ahandle ka Khezari.”
16 Makunu i no mu nyikela kabye lezvaku va mu daya mhandzeni. Va no teka Jesu va famba naye.
17 I no huma na a rwele a mhandze yakwe ya hlomulo* aya laha ku vitaniwako ku Wutshamu ga Cirwarwa,* kutani ku Golgota, hi ciHebheru.
18 Hi laho va nga mu belela kona mhandzeni zvin’we ni vavanuna vambiri matlhelweni yakwe: a mun’we seno, a mun’wani seniya, Jesu a tshama laha cikari.
19 Pilatu i no tsala magezu a ma vekela laha mhandzeni ya hlomulo.* I no tsala ku: “Jesu wa le Nazareta, a Hosi ya vaJudha.”
20 A vaJudha vo tala va lerile a magezu lawo, hakuva laha Jesu a nga belelwe kona ku wa gamekene ni dhoropa, niku a magezu ya kona ma wa tsalilwe hi ciHebheru, ni ciLatini, ni ciGreki.
21 Kanilezvi a vapristi lava va tihosana va vaJudha va te ngalo ka Pilatu: “U nga tsali ku: ‘Hosi ya vaJudha’, kanilezvi tsala ku i waku: ‘Ndzi Hosi ya vaJudha.’”
22 Pilatu a hlamula aku: “Lezvi ndzi tsalileko, ndzi tsalile.”
23 A cikhati leci a masochwa ma nga mbheta ku belela Jesu laha mhandzeni, ma no teka tinguwo takwe ma ti avanyisa hi mune wa zvipandze, a musochwa ni musochwa a teka cipandze cin’we. Va no teka ni nghanju yakwe kambe. Kanilezvi a nghanju yi wa nga rungiwangi, yi wa lukilwe kusukela hehla kala hasi.
24 Ma no byelana, maku: “Hi nga handzuleni, a hi beni tihlolo kasi hi tiva ku yi tava ya mani.” Lezvi zvi wa fela ku ku tatiseka a mutsalo lowu wu nge ngalo: “Va avelene tinguwo ta mina, vaba tihlolo na va bela nghanju ya mina.” Kunene, a masochwa ma zvi mahile lezvo.
25 Laha kusuhani ni mhandze ya hlomulo* ya Jesu ku wa yimile a mamani wakwe ni makabye* wa mamani wakwe; na Mariya a sati wa Klopasi, na Mariya wa le Magdhala.
26 Makunu laha Jesu a nga wona mamani wakwe ni mupizani loyi a nga mu randza na va yimile kusuhani, i no byela mamani wakwe aku: “Wasati, a n’wana wa wena hi loyi!”
27 Hi kulandzela, i no byela mupizani loye aku: “A mamani wa wena hi loyi!” Kusukela kwalaho, a mupizani loye i no mu teka a ya tshama naye mutini wakwe.
28 Andzhako ka lezvo, na a zvi tiva lezvaku kala ka cikhati leco zvontlhe zvi wa tatisekile, Jesu i no wula magezu lawa kasi ku tatiseka a mutsalo, aku: “Ndzizwa tora.”
29 Ku wa vekilwe cifukwana co tala hi vhinyo yo dzunga. Hikwalaho, va no tlhomeka ciponja co tala hi vhinyo yo dzunga ka lihlanga la hisope* va li tlakusa kala non’wini wakwe.
30 Andzhako ka ku ringa a vhinyo leyo yo dzunga, Jesu i te ngalo: “Zvi mbhelile!” a gowota hloko afa.*
31 Kota lezvi ku nga hi siku ga Kulongisela Phasika, na zvi nga laveki lezvaku a zvirumbi zvi simama timhandzeni hi sabhadho (hakuva a sabhadho lego gi wa hi sabhadho ga hombe), a vaJudha va no kombela Pilatu lezvaku ku tshoviwa minenge ya lava va nga belelwe, ni lezvaku a zvirumbi zvabye zvi susiwa.
32 Hikwalaho, a masochwa ma nota ma ta tshova minenge ya wanuna wo sangula ni ya loyi mun’wani a nga hi mhandzeni reveni ga Jesu.
33 Kanilezvi, a cikhati leci ma nga chikela ka Jesu, ma no wona lezvaku i wa sina a file, hikwalaho a ma mu tshovangi minenge.
34 Kanilezvi a gin’we ga masochwa gi no mu tlhava laha reveni hi tlhari, ku tekela ku huma nkhata ni mati.
35 Makunu loyi a zvi wonileko wa kustumunya ha zvona, niku a wukustumunyu gakwe lisine; wa zvi tiva lezvaku i wula lisine, kasi n’winawu mu fela ku kholwa.
36 Kunene, a zvilo lezvi zvi mahekile kasi ku tatiseka a mutsalo lowu wu nge ngalo: “Gi hava ni rambu gin’we gakwe gi to tshoviwa.”*
37 Ku na ni mutsalo wun’wani wu nge ngalo: “Va ta cuwuka loyi va nga mu tlhava.”
38 Andzhako ka zvilo lezvi, Josefa wa le Arimateya, loyi a nga hi mupizani wa Jesu kufihlaleni hi kota ya ku chava vaJudha, i noya ka Pilatu a ya mu kombela lezvaku a mu tsika a hawula a cirumbi ca Jesu; Pilatu i no vhumela. Hikwalaho, Josefa i nota a ta susa cirumbi.
39 Nikodhemusi, loyi a nga rangile aya ka Jesu ni wusiku, yenawu i nota ni mira ni alosi na zvi patselwe,* zva cipimo ca 33 kilo.
40 Hikwalaho va no teka a cirumbi ca Jesu va ci phutsela ka tinguwo ta wukene* ti nga chelilwe mafura yo nuhela, kota malahlela ya vaJudha.
41 Ku wa hi ni simu* ka wutshamu legi a nga dayelwa kona.* Ka simu lego ku wa hi ni cilahla ca ciswa ca ku ku wa nga se lahliwa munhu ka cona.
42 Kota lezvi gi nga hi siku ga vaJudha ga Kulongisela, ni lezvi ku nga hi ni cilahla laha kusuhani, va no mu lahla laho.
Mitlhamuselo ya lahasi
^ Kutani: “korowa”.
^ Kutani: “korowa”.
^ Kutani: “Mu daye mhandzeni! Mu daye mhandzeni!”
^ Kutani: “mu mu daya hi n’wece mhandzeni”.
^ Kutani: “ku ku daya mhandzeni ke”?
^ Hi kukongoma: “ciwonho ca hombe”.
^ Kutani: “vhukela”.
^ Hi kukongoma: “kwalomu ka hora ya wu 6”.
^ Kutani: “Mu daye mhandzeni!”
^ Kutani: “Cikodo; Cikuwa”.
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ A makabye loyi wa cisati.
^ Wona Tlhamuselo wa magezu ya Bhibhiliya.
^ Hi kukongoma: “a nyikela moya”.
^ Kutani: “fayiwa”.
^ Zvi nga ha wula ku: “na zvi hi cibubu”.
^ Kutani: “linyo”.
^ Kutani: “jardhim”.
^ Kutani: “a nga dayelwa kona laha mhandzeni”.
