Johani 2:1-25
2 Hi siku ga wunharu, ku no mahiwa festa ya muchadho le Kana wa Galileya; a mamani wa Jesu i wa hi kwalaho.
2 Jesu ni vapizani vakwe vonawu va wa rambilwe festeni leyo ya muchadho.
3 A cikhati leci a vhinyo yi nga mbhela, a mamani wa Jesu i te ngalo kakwe: “A va na vhinyo.”
4 Kanilezvi Jesu i no mu hlamula aku: “Wasati, mina na wena hi nghena kwihi ka zvona zvezvo?* A cikhati ca mina a ci se chikela.”
5 A mamani wakwe i no byela lava va nga kari va tira aku: “Mahani ni cihi a to mu byela.”
6 Ku wa hi ni 6 wa tifuko to mahiwa hi maribye ti nga vekilwe laho kota kulaya ka nayo wa vaJudha wa kutibasisa. A fuko yin’we ni yin’wani yi waya mabarera* mambiri kutani manharu.
7 Jesu aku kabye: “Tatani tifuko hi mati.” Va no ti tata ti ku khapa.
8 Andzhako ka lezvo i te ngalo kabye: “Makunu khanani mu ya nyika murangeli wa festa.” Va nokha va ya mu nyika.
9 A cikhati leci a murangeli wa festa a nga ringa mati lawa makunu ma nga cicilwe ma maha vhinyo, na a nga zvi tivi ku yi wata hi kwihi (hambu lezvi a zvitiri lezvi zvi ngakha mati zvi nga zvi tiva), i no vitana noivho
10 aku kakwe: “A van’wani vanhu va ranga hi ku humesa vhinyo leyi yo nandziha, makunu loku a vanhu va popilwe, va humesa leyi yo biha. Kanilezvi wena u vekile leyi yo nandziha kala lezvi.”
11 Jesu i mahile zvilo lezvi le Kana wa Galileya kota masangulo ya zviwoniso zvakwe, a kombisa a ntamu wakwe; ni vapizani vakwe va no kholwa kakwe.
12 Andzhako ka lezvo, Jesu ni mamani wakwe, ni vamakabye vakwe, ni vapizani vakwe, va no relela vaya Kapernawume, kanilezvi va no ya tshama masiku ma tsongwani.
13 Makunu a Phasika ga vaJudha gi wa tshinele, hikwalaho Jesu i no kwela aya Jerusalema.
14 I no ya kuma lava va nga kari va xavisa tihomu ni tiyivhu ni matuva lomu tempeleni, ni vacicisi va mali na va hi matshan’wini yabye.
15 I no luka musephu wa tingoti, a hlongola vontlhe lomu tempeleni zvin’we ni tiyivhu tabye ni tihomu tabye, a hangalasa a mali ya vacicisi va mali, a khubhunyeta timeza tabye.
16 Hi kulandzela i no byela lava va nga xavisa matuva aku: “Susani zvilo lezvi laha! Tsikani ku teka yindlu ya Papayi wa mina mu yi maha yindlu ya mabhindzu!”*
17 A vapizani vakwe va no alakanya lezvi zvi tsalilweko zvaku: “A ku randza a yindlu ya wena ka ndziga.”
18 Hikwalaho a vaJudha va no mu hlamula vaku: “Ciwoniso muni ca ku u nga hi mahela kasi ku komba lezvaku u nyikilwe ntamu wa ku maha zvilo lezvi?”
19 Jesu i no va hlamula aku: “Hahlulani a tempeli leyi, ndzi ta yi vhuxa hi masiku manharu.”
20 A vaJudha vaku: “A tempeli leyi yi akilwe hi 46 wa malembe, u nga yi vhuxa wena hi masiku manharu ke?”
21 Kanilezvi a tempeli leyi Jesu a nga yi wula ku wa hi miri wakwe.
22 Hikwalaho, a cikhati leci a nga vhuxiwa hi ka vafileko, a vapizani vakwe va no zvi alakanya lezvaku i wa tala ku wula magezu lawo, hikwalaho va no kholwa a mitsalo ni lezvi Jesu a nga zvi wulile.
23 Kanilezvi na a ha hi Jerusalema festeni ya Phasika, a vanhu vo tala va no kholwa vitweni gakwe hi ku wona zviwoniso lezvi a nga kari a maha.
24 Hambulezvo Jesu i wa nga va tsumbi hakuva i wa va tiva vontlhe,
25 niku i wa ngazi a lava lezvaku a wokari a mu tlhamusela nchumu hi munhu, hakuva i wa zvi tiva lezvi zvi nga ka munhu.
Mitlhamuselo ya lahasi
^ Hi kukongoma: “Cini ka mina ni ka wena, wasati?” A magezu lawa i vingu ga ku komba kungazvilavi. A ku wula ku “wasati” a hi ku mu kanyisa.
^ A barera gin’we gi waya a 22 wa tilitro.
^ Kutani: “merkadho”.
