Johani 6:1-71
6 Andzhako ka lezvo, Jesu i no tlhatuka Bimbi ga Galileya, kutani Bimbi ga Tibheriya.
2 I no simama ku landzelwa hi citshungu ca hombe, hakuva ci wa wona a zviwoniso lezvi a nga kari a zvi maha zva ku hanyisa vababyi.
3 Hikwalaho Jesu i no kandziha citsungeni a ya tshama laho ni vapizani vakwe.
4 Makunu a Phasika, gi nga festa ya vaJudha, gi wa hi kusuhani.
5 Laha Jesu a nga tlakusa matihlo a wona citshungu ca hombe leci ci nga kari cita kakwe, i te ngalo ka Filipu: “Hi ta xava kwihi a tipawa ta ku nyika vanhu lava vaga?”
6 Kanilezvi i wa wula lezvo kasi ku mu ringa, hakuva i wa zvi tiva lezvi a nga lava ku maha.
7 Filipu i no mu hlamula aku: “A tipawa ta 200 wa tidhenaryo* a ti eneli ku gisa vanhu lava hambu loku a mun’we ni mun’wani o khema kutsongwani basi.”
8 Andrewu, a mun’we wa vapizani vakwe, a makabye wa Simoni Pedro, i te ngalo kakwe:
9 “Ku na ni cifanyana laha ci nga ni ntlhanu wa tipawa ta sevhadha ni zvinjhanjhana zvimbiri. Kanilezvi, zvi ta siza yini ka vanhu vo talisa lezvi ke?”
10 Jesu aku: “Va tshamiseni hasi.” Lezvi ku nga hi ni byanyi go tala ka wutshamu lego, a vavanuna va no tshama lahasi; va wa hi cipimo ca 5000.
11 Jesu i no teka tipawa, laha na a bongile, i no avela lava va nga tshamile laho. I no maha lezvo kambe hi zvinjhanjhana, vaga kala va xura.
12 Laha va nga gile va xura, Jesu i te ngalo ka vapizani vakwe: “Hlengeletelani a zvikhemu lezvi zvi seleko kasi ku nga luzi nchumu.”
13 Hikwalaho, va no hlengeletela a zvikhemu lezvi zvi nga siyilwe hi lava va nga gile a ntlhanu wa tipawa ta sevhadha, va tata a 12 wa zvindzala.*
14 A cikhati leci a vanhu va nga wona a cihlamaliso leci a nga maha, va te ngalo: “Loyi hakunene hi yena a Muphrofeti loyi a nga wa tata tikweni.”
15 Makunu Jesu na a zvi tiva lezvaku va lava kuta kakwe va ta mu kurumeta ku maha hosi yabye, i no nyemuka aya kambe citsungeni na a hi yece.
16 Laha gi nga pelile, a vapizani vakwe va no relela bimbini,
17 va ya nghena ngalaveni va tsemakanya bimbi vaya Kapernawume. Ka cikhati leco gi wa phumile, kanilezvi Jesu i wa nga seya kabye.
18 A bimbi gi wa vhindluka hi kota ya moya wa hombe lowu wu nga kari wuba.
19 Loku va fambile a cipimo ca 5 kutani 6 wa tikilometro,* va no wona Jesu na a famba hehla ka bimbi, a tshinela ngalaveni, va se chava.
20 Kanilezvi i te ngalo kabye: “Mu nga chavi, hi mina!”
21 Hikwalaho va no mu tsika a nghena ngalaveni. Zvalezvo a ngalava yi no chikela lomu va ngaya kona.
22 Hi mandziko wa kona, a citshungu leci ci nga sele ka tlhelo legi gin’wani ga bimbi ci no wona lezvaku ku wa nga ha hi na ngalava yin’wani saseka leyi ya yitsongwani, ni lezvaku Jesu i wa nga nghenangi ngalaveni zvin’we ni vapizani, kanilezvi a vapizani vakwe va wa fambile voce.
23 Kanilezvi ku no chikela tingalava ta le Tibheriya, kusuhani ni laha va nga gele kona tipawa andzhako ka loku a Hosi yi bongile.
24 Makunu laha a citshungu ci nga wona lezvaku Jesu ni vapizani vakwe va wa nga hi kona laho, va no nghena tingalaveni tabye vaya Kapernawume va ya lavetela Jesu.
25 A cikhati leci va nga mu kuma le tlhatuko wa bimbi, va te ngalo kakwe: “Rabi, u chikele rini laha?”
26 Jesu i no va hlamula aku: “Ndza tiyisa ka n’wina ndziku: A mu ndzi lavi hi lezvi mu nga wona zviwoniso, kanilezvi mu ndzi lava hi lezvi mu ngaga tipawa mu xura.
27 Mu nga tireli a zvakuga lezvi zvi mbhelako, kanilezvi tirelani zvakuga lezvi zvi simamako kala wutomini ga pindzukelwa, lezvi a N’wana wa munhu a to mu nyika; hakuva hi yena a vekelweko cifungo* hi Papayi, a nga Nungungulu, ca lezvaku wa xalala hi yena.”
28 Vaku ngalo kakwe: “Hi fanele ku maha yini kasi hi maha mitiro ya Nungungulu ke?”
29 Jesu i no va hlamula aku: “A ntiro wa Nungungulu hi lowu wa kuva mu kholwa ka loyi a mu rumeleko.”
30 Hi kulandzela va no mu wutisa vaku: “Ciwoniso muni u to maha kasi hi fela ku ci wona hi kholwa ka wena ke? I ntiro muni u to maha?
31 A vakokwani va hina va gile mana ciwuleni, kota lezvi zvi tsalilweko zvaku: ‘I no va nyika pawa ya le tilweni kasi vaga.’”
32 Jesu aku kabye: “Ndza tiyisa ka n’wina ndziku: Mosi a nga mu nyikangi a pawa ya le tilweni, kanilezvi a Papayi wa mina wa mu nyika a pawa ya lisine ya le tilweni.
33 Hakuva a pawa ya Nungungulu hi loyi a relelako hi le tilweni a ta nyika wutomi ka tiko.”
34 Vaku ngalo kakwe: “Hosi, hi nyike a pawa leyo contlhe cikhati.”
35 Jesu aku kabye: “Mina ndzi pawa ya wutomi. Ni wihi a tako ka mina a nga ta hazwa ndlala, ni loyi a kholwako ka mina a nga ta hazwa tora.
36 Kanilezvi khwatsi hi lezvi ndzi mu byelileko, mu sina mu ndzi wonile hambulezvo a mu kholwi.
37 Vontlhe lava Papayi a ndzi nyikako va tata ka mina, ni loyi a tako ka mina ndzi nga ta tshuka ndzi mu hlongola;
38 hakuva ndzi relele hi le tilweni kasi ku ta maha a kurandza ka loyi a ndzi rumileko na ku nga hi kurandza ka mina.
39 A kurandza ka loyi a ndzi rumileko hi lezvaku ndzi nga lahli ne mun’we ka vontlhe lava a ndzi nyikileko, kanilezvi ndzi va vhuxa hi siku go gumesa.
40 Hakuva a kurandza ka Papayi wa mina hi lezvaku ni wihi a vhumelako N’wana, a kholwa kakwe, a kuma wutomi ga pindzukelwa; niku ndzi ta mu vhuxa hi siku go gumesa.”
41 Hikwalaho, a vaJudha va no sangula ku mu ngurangurela hi lezvi a ngaku: “Ndzi pawa yi releleko hi le tilweni.”
42 Vaku ngalo: “A hi yena Jesu loyi, a n’wana wa Josefa, loyi a papayi wakwe ni mamani wakwe hi va tivako? Makunu hikuyini a wulako ku: ‘Ndzi relele hi le tilweni’?”
43 Jesu i no va hlamula aku: “Hi nga tsikani ku ngurangura.
44 A ku na munhu a zvi kotako kuta ka mina, loku a nga kokiwi hi Papayi loyi a ndzi rumileko, niku ndzi ta mu vhuxa hi siku go gumesa.
45 Lomu ka Vaphrofeti ku tsalilwe ku ngalo: ‘Vontlhe va ta gondzisiwa hi Jehovha.’ Ni wihi a ingisako Papayi, a gondza kakwe, wata ka mina.
46 A ku na munhu a wonileko Papayi, saseka loyi a tako hi ka Nungungulu; hi yena a wonileko Papayi.
47 Ndza tiyisa ka n’wina ndziku: Loyi a kholwako i na ni wutomi ga pindzukelwa.
48 “Mina ndzi pawa ya wutomi.
49 A vakokwani va n’wina va gile a mana ciwuleni hambulezvo va file.
50 Leyi i pawa yi relelako hi le tilweni, kasi ni wihi a yi gako a ngafi.
51 Mina ndzi pawa yi hanyako yi releleko hi le tilweni. Loku munhu aga a pawa leyi i ta hanya kala kupindzuka; kunene, a pawa leyi ndzi to mu nyika i nyama ya mina leyi ndzi to yi nyikela kasi a tiko gi hanya.”
52 A vaJudha va no sangula ku kanetisana vaku: “A wanuna loyi a nga hi nyikisa kuyini a nyama yakwe higa ke?”
53 Jesu i no va hlamula aku: “Ndza tiyisa ka n’wina ndziku: Loku mu ngagi a nyama ya N’wana wa munhu ni kunwa a nkhata wakwe a mu na wutomi ndzeni ka n’wina.
54 Ni wihi a gako nyama ya mina ni kunwa nkhata wa mina i na ni wutomi ga pindzukelwa, niku ndzi ta mu vhuxa hi siku go gumesa;
55 hakuva a nyama ya mina i zvakuga zva lisine, ni nkhata wa mina kunwa ka lisine.
56 Ni wihi a gako nyama ya mina ni kunwa nkhata wa mina i simama zvin’we na mina, minawu ndzi simama zvin’we naye.
57 Khwatsi hi lezvi Papayi loyi a hanyako a ndzi rumileko, ni lezvi ndzi hanyako hi kota ya Papayi, loyi a ndzi gako yenawu i ta hanya hi kota ya mina.
58 Leyi i pawa yi releleko hi le tilweni. A yi koti leyi a vakokwani va n’wina va ngaga va gumesa vafa. Loyi a gako a pawa leyi i ta hanya kala kupindzuka.”
59 I wulile timhaka leti a cikhati leci a nga gondzisa sinagogeni* le Kapernawume.
60 A cikhati leci a vapizani vakwe va ngazwa lezvo, a kutala ka vona va te ngalo: “A timhaka leti ta tshisa; himani wa ku a nga ti ingisela ke?”
61 Kanilezvi, Jesu na a zvi tiva mbilwini yakwe lezvaku a vapizani vakwe vo ngurangura hi mhaka leyi, i te ngalo kabye: “A mhaka leyi ya mu khunguvanyisa ke?
62 Makunu ahati loku mu wo wona a N’wana wa munhu na a tlakuka aya lomu a nga hi kona kusanguleni?
63 A moya hi wona wu nyikako wutomi, a nyama a yi vhuni nchumu. A timhaka leti ndzi nga mu byela i moya ni wutomi.
64 Kanilezvi ku na ni vokari cikari ka n’wina va nga kholwiko.” Hakuva Jesu i wa va tiva kusukela kusanguleni lezvaku hi vamani lava va nga kala va nga kholwi niku himani loyi a to mu xavisa.
65 I no engeta aku: “Hi caleci ci nga ndzi maha ndzi mu byela, ndziku: A ku na munhu a zvi kotako kuta ka mina loku Papayi a nga zvi lavi.”
66 Hi kota ya lezvo, a vapizani vakwe vo tala va no tlhela ka zvilo lezvi va nga zvi tsikile, a va ha fambangi naye.
67 Hikwalaho Jesu i te ngalo ka lava va 12: “N’winawu mu lava ku famba ke?”
68 Simoni Pedro i no mu hlamula aku: “Hosi, hi taya ka mani? Wena u na ni timhaka ta wutomi ga pindzukelwa.
69 Hi kholwile niku ha zvi tiva lezvaku wena u Loyi wa Kubasa wa Nungungulu.”
70 Jesu i no va hlamula aku: “Ndzi hlawulile n’wina va 12, a hi zvona ke? Hambulezvo a mun’we wa n’wina i sathani.”*
71 I wa wula Judhasi, a n’wana wa Simoni Iskariyoti, hakuva hi yena a nga lava ku mu nyikela hambu lezvi a nga hi mun’we wa lava va 12.
Mitlhamuselo ya lahasi
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “zvirundzu”.
^ Hi kukongoma: “25 kutani 30 wa maestadhyu”.
^ Kutani: “marka”.
^ Kutani: “laha ku nga hlengeletene vanhu”.
^ Hi ciGreki: di·á·bo·los, zvi wulako ku “mulumbeti”.
