Johani 9:1-41
9 Laha Jesu a nga kari a hundza, i no wona wanuna a nga pswaliwa na a hi cikhumu.
2 A vapizani vakwe va no mu wutisa vaku: “Rabi, himani a nga wonha a kuza a wanuna loyi a pswaliwa na a hi cikhumu, hi yena kutani vapswali vakwe?”
3 Jesu i no hlamula aku: “A hi wanuna loyi a nga wonha ne a hi vapswali vakwe. Kanilezvi ku mahekile lezvi kasi a mitiro ya Nungungulu yi wonekeliswa ha yena.
4 Hi fanele ku tira mitiro ya Loyi a ndzi rumileko na ga ha hi mumu; gata wusiku laha zvi nga kotekiko ku a munhu a tira.
5 Loku ndza ha hi laha tikweni, ndzi kuwonekela ka tiko.”
6 Andzhako ka ku wula zvilo lezvi, i no phela lahasi a maha madhaka* hi mari, a tota matihlo ya wanuna loye,
7 aku kakwe: “Famba u ya hlamba citivaneni ca Silowame” (lezvi zvi wulako ku: “A Rumilweko”). I no famba a ya hlamba, a wuya na a wona.
8 Makunu, a vaakelani vakwe ni lava va nga tolovela ku mu wona na a kombela zomola va te ngalo: “A hi yena wanuna loyi a nga tolovela ku kombela zomola ke?”
9 A vokari va waku: “Ina, hi yena!” A van’wani vaku: “A hi yena, vo fana.” Kanilezvi yena wutsumbu i waku: “Hi mina futsi.”
10 Hikwalaho va no mu wutisa vaku: “Zvi mahisile kuyini a kuza a matihlo ya wena ma vhululeka?”
11 Aku kabye: “A wanuna a vitaniwako ku hi Jesu i no maha madhaka* a ndzi tota lomu ka matihlo a gumesa aku: ‘Famba Silowame u ya hlamba.’ Hikwalaho, ndzi no famba ndzi ya hlamba ndzi se wona.”
12 Va te ngalo kakwe: “A wanuna wa kona i kwihi?” Aku kabye: “Ahati.”
13 Va no famba ni wanuna loyi a nga hi cikhumu ka vaFarisi.
14 A siku legi Jesu a nga maha hi gona madhaka* a vhulula matihlo ya wanuna loye gi kotlene na ku hi sabhadho.
15 Hikwalaho, a vaFarisi vonawu va no mu wutisa lezvi ma nga vhululiswa zvona a matihlo yakwe. Yena aku kabye: “I no tota madhaka* lomu ka matihlo ya mina, ndzi hlamba, ndzi se wona.”
16 A vaFarisi vo kari va te ngalo: “A wanuna loyi a ngati hi ka Nungungulu hakuva a nga hlayisi a sabhadho.” A van’wani vaku: “Zvi nga mahisa kuyini ku a munhu a nga muwonhi a zvi kota ku maha zvilo zvo kota lezvi?” Hikwalaho ku nova ni kukanetisana cikari kabye.
17 Va no tlhela va wutisa a wanuna wa cikhumu vaku: “Wena u li yini hi wanuna loye kota lezvi a nga vhulula matihlo ya wena?” A wanuna loyi a nga hi cikhumu, aku: “Muphrofeti.”
18 Kanilezvi, a vaJudha a va kholwangi lezvaku i wa hi cikhumu niku i vhululilwe matihlo, va kala va vitana a vapswali va wanuna loyi makunu a nga kari a wona,
19 va va wutisa vaku: “Hi yaloyi a n’wana wa n’wina loyi mu nge i pswalilwe na a hi cikhumu? Hikuyini makunu a wonako?”
20 A vapswali vakwe va no hlamula vaku: “Ha zvi tiva lezvaku loyi i n’wana wa hina niku i pswalilwe na a hi cikhumu.
21 Kanilezvi a ku hikuyini makunu a wonako niku himani a nga vhulula matihlo yakwe a hi zvi tivi. Mu wutiseni, munhu wa hombe, i ta hlamula ha yece.”
22 A vapswali vakwe va wulile lezvo hi ku chava vaJudha, hakuva a vaJudha va wa bohile lezvaku loku a wokari a vhumela ku Jesu hi Kristu i ta hlongoliwa sinagogeni.*
23 Hi caleco ci nga maha vapswali vakwe vaku: “Munhu wa hombe, mu wutiseni.”
24 Hikwalaho va no mu vitana hi khati ga wumbiri a wanuna loyi a nga hi cikhumu va taku kakwe: “Dhumisa Nungungulu; ha zvi tiva lezvaku a wanuna loyi muwonhi.”
25 I no hlamula aku: “A ku muwonhi niku a hi muwonhi a ndzi zvi tivi. Leci ndzi ci tivako ku ndzi wa hi cikhumu kanilezvi makunu ndza wona.”
26 Vaku kakwe: “Zvini a nga maha ka wena? I ma vhululisile kuyini a matihlo ya wena?”
27 I no va hlamula aku: “Ndzi sina ndzi mu byelile, a mu se zvizwa? Hikuyini mu lavako ku zvizwa kambe? N’winawu mo lava ku maha vapizani vakwe?”
28 Hikwalaho va no mu chepeta vaku: “Wena u mupizani wa wanuna loye kanilezvi hina hi vapizani va Mosi.
29 Ha zvi tiva lezvaku Nungungulu i wulawulile na Mosi, kanilezvi a wanuna loyi a hi ku tivi lomu a tako hi kona.”
30 I no va hlamula aku: “Hakunene zva hlamalisa lezvi mu nga ku tiviko lomu a tako hi kona, kasi lezvo i vhululile matihlo ya mina.
31 Ha zvi tiva lezvaku Nungungulu a nga ingisi vawonhi, kanilezvi ni wihi a chavako Nungungulu, a maha kurandza kakwe, yaloye wa mu ingisa.
32 Cima a ku se tshuka ku zwala lezvaku a wokari i vhululile matihlo ya munhu wo pswaliwa na a hi cikhumu.
33 Loku a wanuna loyi i wa ngati hi ka Nungungulu, na a nga mahangi nchumu.”
34 Va te ngalo kakwe: “Wena u na se pswalelwa kuwonheni, u nga hi gondzisa yini?” Va no mu hoxa lahandle!
35 Jesu i nozwa lezvaku va mu hoxile lahandle. Laha a nga mu kuma i te ngalo: “Wa kholwa ka N’wana wa munhu ke?”
36 A wanuna loye i no hlamula aku: “Bava, hi yena mani kasi ndzi fela ku kholwa kakwe?”
37 Jesu aku kakwe: “U mu wonile. Hi yaloyi a wulawulako na wena.”
38 Yena aku: “Hosi, ndza kholwa kakwe.” A se mu khizamela.
39 Jesu aku: “Ndzi tile tikweni lezvaku a tiko gi lamuliwa, kasi lava va kalako va nga woni, va wona, ni lava va wonako va maha zvikhumu.”
40 A cikhati leci a vaFarisi lava va nga yimile laho va ngazwa lezvo, va te ngalo kakwe: “Hinawu hi zvikhumu ke?”
41 Jesu aku kabye: “Loku mu wa hi zvikhumu, na mu nga hi na ciwonho. Kanilezvi, kota lezvi mu nge ngalo: ‘Ha wona’. Mu simama ni ciwonho ca n’wina.”
Mitlhamuselo ya lahasi
^ Kutani: “ndzhope”.
^ Kutani: “ndzhope”.
^ Kutani: “ndzhope”.
^ Kutani: “ndzhope”.
^ Wona laha ka ku: “Sinagoga” ka Tlhamuselo wa magezu ya Bhibhiliya.
