Judha 1:1-25
1 Mina Judha, a nandza ga Jesu Kristu, ndzi nga makabye wa Jakobe, ndza tsalela vahlawulilweko lava va randziwako hi Nungungulu, a Papayi wa hina, lava va hlayiselweko Jesu Kristu, ndziku:
2 Ndzi khongelela lezvaku Nungungulu a mu engetela tipswalo, ni kurula, ni lirandzo.
3 Varandzekako, hambu lezvi ndzi nga zvi lavile nguvhu a ku mu tsalela ndzi wulawula hi kuhanyiswa ka hina, ndzi zvi wonile na zvi hi chukwana a ku mu tsalela ndzi mu kuca lezvaku mulwa hi ntamu wa n’wina wontlhe mu lwela kukholwa loku ku nyikilweko vobasa khati gin’we zvi enela.
4 A cigelo hi lezvaku ku nyanimele vanhu va nghena cikari ka n’wina, lava va yimiselweko ku lamuliwa hi Mitsalo cima ka kaleloko. A vanhu lavo, va nga ingisiko Nungungulu, va ti yimelela hi tipswalo takwe kasi va landzela mahanyela ya tingana* va tlhela va kaneta Jesu Kristu, a Hosi ni n’winyi wa hina.
5 Hambu lezvi mu yi tivako khwatsi a mhaka leyi, ndzi lava ku mu alakanyisa lezvaku Jehovha i tlhatlhisile vanhu tikweni ga Gibhite, kanilezvi i gumesile a lovisa lava va nga hi hava kukholwa.
6 Hambu a tingilozi leti ti nga kala ku hlayisa ciyimo ca tona, ti tsika wutshamu legi ti nga mahelwe ku hanya ka gona, i no ti boha a ti vhalela munyameni wa pindzukelwa, ti hlayiselwa siku ga hombe ga kulamula.
7 Hikwalaho, a madhoropa ya Sodhoma ni Gomora ni ya laha kusuhani nawo, ma no ti nyikela wubhayini* ga tshisela ga cima ni ka mahanyela ya tingana; ma lamuliwa hi ndzilo wa pindzukelwa kasi zviva citlharihiso ka hina.
8 Hambulezvo, a vanhu lavo vonawu va ti kanganyisa, va nyenyezisa nyama, va kanyisa wuhosi, va tlhela va chepeta lava va dzundziwako hi Nungungulu.
9 Kanilezvi a cikhati leci Mikayeli, a ngilozi ya hombe, a nga hambana kupima na Sathani,* va kanetisana hi cirumbi ca Mosi, Mikayeli a nga tsutsumelangi ku mu lamula hi ku mu hlamula zvobiha, kanilezvi i te ngalo: “Jehovha i wa ku kawuke.”
10 Kanilezvi a vanhu lavo va wulawula zvobiha hi zvilo zvontlhe lezvi va nga zvi zwisisiko. A mahanyela yabye ma fana ni ya zvihari zvi nga pimisiko kasi ku maha nchumu. Ni cihi va ci mahako ci va yisa kulovisweni.
11 A vanhu lavo va le khombyeni hakuva va landzele ndlela ya Kana va tlhela va ti peta mahanyeleni ya hava ya Bhalami hi ku fela nchachazelo, ni ku tlhela va ti nehela kulovisiwa ha voce hi ku wulawula kubiha va fana na Kora.
12 Lomu ka tifesta leti mu ti mahako kasi ku komba lezvaku ma randzana, a vanhu lavo va fana ni maribye ma tumbeleko matini; varisi lava va ti karatelako ku tata makhwiri yabye ntsena; marefu ma nga hiko na mati ma kukuletwako hi moya maya lomu wu ku lavako niku tisinya ti nga pswaliko mihandzu hambu loku ku chikela nguva, leti ti feleko magumo ti tlhela ti tsuwuliwa.
13 Va fana ni mavingo* ya hombe ya bimbi, ma hlatako a khuvi ga tingana ta wona; tinyeleti ti pepetsekako, niku a magumo yabye ku hoxiwa munyameni wa pindzukelwa.
14 Enoki yenawu, a nga wa cizukulwana ca wu 7 kusukela ka Adhamu, i phrofetile hi vona aku: “Wonani! Jehovha i tile ni tingilozi takwe ta ntamu ta tsandza-vahlayi*
15 kasi ku ta lamula vontlhe, ni ku kona lava va nga chaviko Nungungulu hi kota ya mitiro yontlhe yo biha leyi va yi mahileko, ni zvilo zvo biha lezvi va zvi wulileko hi yena.”
16 Vanhu vo ngurangura, va nga xalaliko hi lezvi va nga nazvo, va mahako kunavela kabye ko biha, va wulawula hi ndlela ya ku ti kulisa na va dzundza van’wani mahala* hi ku fela ku bhindzula.
17 Kanilezvi, n’wina varandzekako, alakanyani timhaka leti ti sinako ti wulilwe ka n’wina hi vapostoli va Hosi ya hina Jesu Kristu,
18 lava va nga tshamela ku mu byela ku: “Cikhatini co gumesa ku tava ni vatseketseli lava va hanyako hi kunavela kabye ko biha.”
19 A vanhu lavo va vanga kuhambana, na va hi ni mahanyela ya wuhari,* niku a va rangelwi hi Nungungulu.*
20 Kanilezvi, n’wina vamakabye, tiyisani kukholwa ka n’wina ku basileko, mu khongela na mu nyikiwa ntamu hi moya wo basa,
21 kasi mu simama lirandzweni la Nungungulu, na mu rindzela a wuxinji ga Hosi ya hina Jesu Kristu, legi gi yisako wutomini ga pindzukelwa.
22 Ahandle ka lezvo, simamani ku va mahela wuxinji lava va kanakanako;
23 va hanyiseni hi ku va humesa ndzilweni. Simamani ku va mahela wuxinji a vanhu van’wani, kanilezvi na mu ti wonela; mu nga henyi hambu ni nguwo leyi yi chakisilweko hi mitiro yabye yo biha.
24 Makunu, ka Nungungulu wo ngangamela loyi a mu vhikelako lezvaku mu ngawi ni ku ngavi na noda mahlweni kakwe na mu hi ni litsako la hombe,
25 ka yena yece Nungungulu a Muhanyisi wa hina ha Jesu Kristu a Hosi ya hina, a give kona wudzundzo, ni wudhumo, ni ntamu ni wuhosi zvikhatini zvontlhe zvi hundzileko, ni zvalezvi, ni kala kupindzuka. Amen.
Mitlhamuselo ya lahasi
^ Hi ciGreki: asélgeia. Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Hi ciGreki: di·á·bo·los, zvi wulako ku “mulumbeti”.
^ Kutani: “mabyandlati; mavimbi”.
^ Kutani: “makume ya makume ya mazana”.
^ Kutani: “va hlamala vanhu”.
^ Kutani: “na va pimisa hi ka nyama”.
^ Kutani: “moya wa Nungungulu”.
