Kuvhululelwa 1:1-20
1 Kuvhululelwa ka Jesu Kristu, loku a nga nyikiwa hi Nungungulu lezvaku a tivisa a malandza yakwe lezvi zvi to maheka zvalezvanyana. Yena i no rumela a ngilozi yakwe kasi yi ku kombisa ka Johani hi zviwoniso,
2 ku nga loyi a kustumunyako hi mhaka leyi Nungungulu a yi nyikileko, ni wukustumunyu legi Jesu Kristu a gi nyikileko, ni zvilo zvontlhe lezvi a zvi wonileko.
3 I katekile loyi a gondzako a ciphrofeto leci hi gezu ga hombe ni lava va zwako a magezu ya cona va tlhela va ingisa a timhaka leti ti tsalilweko ka cona, hakuva a cikhati ci yimisilweko ci laha kusuhani.
4 Mina Johani ndza tsalela a 7 wa mabandla ma nga le provhinsya ya Azia, ndziku:
A tipswalo ni kurula a zvive na n’wina, lezvi zvi tako hi ka “Loyi a nga kona, loyi a nga hi kona, ni loyi a tova kona”, ni ka 7 wa mimoya leyi yi nga mahlweni ka citshamu cakwe ca wuhosi,
5 ni ka Jesu Kristu “a Kustumunyu wo Tsumbeka”, “a matewula ya kuvhuka hi ka vafileko”, ni “Hosi ya tihosi ta misava”.
Ka yena loyi a hi randzako, loyi a hi tlhatlhisileko zviwonhweni zva hina hi nkhata wakwe,
6 a hi yimisa a kuva mufumo, ni vapristi va Nungungulu wakwe tlhelo Papayi, a give ka yena a wudzundzo ni ntamu kala kupindzuka. Amen.
7 Wata hi marefu, a matihlo wontlhe ma ta mu wona, ni lava va nga mu tlhava va ta mu wona; a tixaka tontlhe ta laha misaveni ti ta tiba zvifuva hi kukarateka hi kota ya yena. Amen.
8 Jehovha Nungungulu i ngalo: “Hi mina Alfa na Omega,* Loyi a nga kona, loyi a nga hi kona, ni loyi a tova kona, loyi wa Ntamu Wontlhe”.
9 Mina Johani, a makabye wa n’wina, ndzi hlengeleko na n’wina kuxanisekeni, ni mufun’weni, ni kutimiseleni zvin’we na Jesu, ndzi wa hi cihlaleni* ca Patmosi hi kota ya ku wulawula hi Nungungulu ni ku nyika wukustumunyu ha Jesu.
10 A moya wo basa wu no ndzi tisa sikwini ga Hosi; makunu ndzi nozwa gezu ga hombe hi le ndzhako ka mina go fana ni mpundzu,
11 giku: “Lezvi u zvi wonako zvi tsale bhukwini u gi rumela ka mabandla lawa ya 7, ku nga Efesusi, ni Smirna, ni Pergamumi, ni Tiyatira, ni Sardhisi, ni Filadhelfiya, ni Lawodhikeya.”
12 Ndzi no hundzuluka kasi ndzi wona loyi a nga kari a wulawula na mina. Laha ndzi nga hundzuluka, ndzi no wona a 7 wa minenge ya ouro yo veka tikandiya.
13 Laha cikari ka yona ku wa hi ni wokari a fanako ni n’wana wa munhu, a nga bohile nguwo yo leha yo chikela ni le mikondzweni, ni libhandi la ouro laha cifuveni cakwe.
14 Ahandle ka lezvo, a hloko yakwe ni misisi yakwe zvi wa basile a ku khwatsi i woya go basa ni gapongo,* a matihlo yakwe ma wa ku khwatsi i ndzilo wu vhurako,
15 a mikondzo yakwe yi wa ku khwatsi i kobre ya yi nene yi hisilweko ndzilweni, ni gezu gakwe gi wa ku khwatsi i guwa ga mati yo tala.
16 I wa hi ni 7 wa tinyeleti canjeni gakwe ga cinene; lomu non’wini wakwe ku no huma a cipadha co leha, co kariha, ci tsemako seno ni seno, ni nghohe yakwe yi wa ku khwatsi i gambo loku gi woninga hi ntamu wa gona wontlhe.
17 A cikhati leci ndzi nga mu wona ndzi nowa mikondzweni yakwe ndzi ku khwatsi ndzi nofa.
Kanilezvi i no ndzi tlhateka a canja gakwe ga cinene, aku: “U nga chavi. Hi mina wa Kusangula ni wa Kugumesa,
18 loyi a hanyako; ndzi wa file kanilezvi makunu ndza hanya kala kupindzuka ni kupindzuka niku ndzi na ni makhiya ya kufa ni ya Cilahla.*
19 Hikwalaho, tsala a zvilo lezvi u zvi wonileko, ni zvilo lezvi zvi mahekako ni zvilo lezvi zvi to maheka andzhako ka lezvi.
20 Xungetano hi cihundla co basa ca 7 wa tinyeleti leti u ti wonileko canjeni ga mina ga cinene, ni 7 wa minenge ya ouro yo veka tikandiya, a tlhamuselo wa kona hi lowu: A 7 wa tinyeleti ti yimela a tingilozi ta 7 wa mabandla; a 7 wa minenge ya ouro yo veka tikandiya yi yimela a 7 wa mabandla.
Mitlhamuselo ya lahasi
^ Kutani: “A ni Z”. Alfa i letra go sangula ga maletra ya ciGreki, Omega hi legi go gumesa.
^ Kutani: “cilundzweni ca mati; ilha”.
^ Kutani: “neve”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
