Kuvhululelwa 13:1-18
13 Dragawu i no nyima misaveni ya mbhiri ya bimbi a nga suki.
Ndzi no wona civandza ca 10 wa timhondzo ni 7 wa tihloko na ci huma hi lomu bimbini. Ci wa bohile a 10 wa zvidlodlo* ka timhondzo ta cona, kanilezvi tihlokweni ta cona ci wa hi ni mavito ya tihlamba.
2 A civandza leci ndzi nga ci wona ci wa fana ni yingwe, kanilezvi a mikondzo ya cona yi wa fana ni ya urso, ni nomu wa cona wu wa ku khwatsi i nomu wa nghala. Dragawu i no nyika civandza a ntamu wakwe, ni citshamu cakwe ca wuhosi, ni wuhosi ga hombe.
3 Ndzi no wona a yin’we ya tihloko ta cona na yi bayisilwe nguvhu yi ku khwatsi yi nofa, kanilezvi a cilondza ca yona ca hombe ci no hola, ni misava yontlhe yi no landzela a civandza leco na yi hlamala.
4 Va no khozela dragawu hi lezvi a nga nyika wuhosi a civandza, va tlhela va khozela a civandza, vaku: “Himani a fanako ni civandza, kona himani a zvi kotako kulwa naco ke?”
5 Ci no nyikiwa nomu wa ku wulawula zvilo zva matshandza ni tihlamba, ci tlhela ci nyikiwa a wuhosi ga ku maha kurandza a 42 wa tihweti.
6 Ci no vhulula nomu ci wulawula tihlamba ha Nungungulu ni ku rukatela a vito gakwe, ni wutshamu gakwe, ci rukatela ni lava va tshamako tilweni.
7 Ci no nyikiwa ntamu wa kulwa ni vobasa ci va hlula, ci tlhela ci nyikiwa wuhosi hehla ka tontlhe tixaka, ni mifumo, ni tirimi, ni matiko.
8 Vontlhe lava va tshamako laha misaveni va ta ci khozela. Kusukela kuvangiweni ka tiko, i hava ni mun’we wabye loyi a vito gakwe gi tsalilweko bhukwini ga wutomi ga Yivhana leyi yi nga dawa.
9 Loyi a nga ni tindleve i wa ingise.
10 Loku a munhu a fanele kuya wukhumbini, i taya wukhumbini. Loyi a dayako hi cipadha,* i ta dawa hi cipadha. Hi cigelo leco, a vobasa va fanele ku timisela, vava ni kukholwa.
11 Ndzi no wona cin’wani civandza na ci huma hi laha misaveni. Ci wa hi ni timhondzo timbiri to fana ni ta yivhana, kanilezvi ci no sangula ku wulawulisa ku khwatsi hi dragawu.
12 Ci fuma hi ntamu wontlhe wa civandza leci co sangula na ci hi phambeni ka cona, ci tlhela ci kurumeta a misava ni lava va hanyako ka yona lezvaku va khozela a civandza co sangula, leci a cilondza ca cona ca hombe ci holileko.
13 Ci maha zviwoniso zva hombe, ciza ci relelisa ni ndzilo hi le tilweni wuta laha misaveni na zvi woniwa hi vanhu.
14 Ci hambukisa lava va hanyako laha misaveni hi zviwoniso lezvi ci nyikilweko ntamu wa ku zvi maha phambeni ka civandza leci co sangula, na ci kari ci byela lava va hanyako laha misaveni lezvaku va maha cifananiso ca civandza leci ci nga tsemilwe hi cipadha ci tlhela ci hanya.
15 A civandza leci ca wumbiri ci no nyikiwa ntamu wa ku pupuxela kuhefemula* a cifananiso ca civandza leci co sangula, kasi a cifananiso ca civandza ci wulawula ci tlhela ci dayisa vontlhe lava va alako ku khozela a cifananiso.
16 Ci kurumeta a vanhu vontlhe — a vatsongwani ni vahombe, a vo ganya ni zvisiwana, a vatlhatlhekileko ni tikhumbi — lezvaku va vekiwa cifungo* canjeni gabye ga cinene kutani zvikandzeni* zvabye,
17 ni lezvaku ku ngavi na munhu a zvi kotako ku xava kutani ku xavisa, ahandle ka loyi a nga ni cifungo,* ku nga vito ga civandza kutani numero ya vito ga cona.
18 A mhaka leyi yi lava wutlhari: Loyi a nga ni kupimisisa i wa hlolisise a numero ya civandza, hakuva i numero ya munhu, niku a numero ya cona i 666.
Mitlhamuselo ya lahasi
^ Kutani: “tikorowa; zvidlodlo zva wuhosi”.
^ Zvi nga ha wula ku: “Loku zvi lava ku a munhu a dawa hi cipadha”.
^ Kutani: “moya”.
^ Kutani: “marka”.
^ Kutani: “zvimombyeni”.
^ Kutani: “marka”.
