Kuvhululelwa 15:1-8
15 Ndzi no wona cin’wani ciwoniso le tilweni, ca hombe ni co hlamalisa, ca 7 wa tingilozi ti nga hi ni 7 wa zvixaniso. A zvixaniso lezvo hi zvona zvo gumesa, hakuva ha zvona a zanga ya Nungungulu yi ta chikela magumo.
2 Ndzi no wona co khwatsi i bimbi ga vhidro gi patseneko ni ndzilo, ni lava va hlulileko a civandza ni cifananiso ca cona ni numero ya vito ga cona, na va yimile mbhirini ya bimbi ga vhidro. Va wa welele a zvitende zva Nungungulu,
3 na va kari va yimbelela a lisimu la Mosi a nandza ga Nungungulu, ni lisimu la Yivhana, vaku:
“A mitiro ya wena ya hombe, niku ya hlamalisa, wena Jehovha Nungungulu wa Ntamu Wontlhe. A tindlela ta wena ti lulamile niku ti tsumbekile, wena Hosi ya pindzukelwa.
4 Jehovha, himani a to kala ku ku chava, a nga dhumisi a vito ga wena ke? Hakuva hi wena wece u tsumbekileko. A matiko wontlhe ma tata ma ta khozela mahlweni ka wena, hakuva a milayo ya wena yo lulama yi tivisilwe.”
5 Andzhako ka lezvo, ndzi no wona a Wutshamu go Basabasa ga tenda ga wukustumunyu na gi vhululekile le tilweni.
6 Ku no huma a 7 wa tingilozi hi ka wutshamu lego go basa na ti hi ni 7 wa zvixaniso; ti wa bohile a tinguwo to basa to hatima ni tibhandi ta ouro zvifuveni zva tona.
7 A cin’we ca mune wa zvivangwa zvi hanyako ci no teka a 7 wa mingelo ya ouro yi nga tele hi zanga ya Nungungulu, loyi a hanyako kala kupindzuka ni kupindzuka, ci nyika a 7 wa tingilozi.
8 Makunu a Wutshamu go Basabasa gi no tala hi musi hi kota ya kungangamela ka Nungungulu ni hi kota ya ntamu wakwe. A ku na munhu a nga zvi kota ku nghena ka Wutshamu go Basabasa, kala ku mbhela a 7 wa zvixaniso zva 7 wa tingilozi.