Kuvhululelwa 17:1-18
-
Kulamulwa ka “Bhabhuloni wa Hombe” (1-18)
17 A yin’we ya tingilozi leti ta 7 ti nga hi ni 7 wa mingelo yi nota ka mina yi taku: “Tana ndzi ta ku komba a kulamulwa ka cibhayi leci ca hombe ci tshamileko hehla ka mati yo tala,
2 leci a tihosi ta misava ti mahileko wubhayi* naco, ni leci a vaaki va misava va popilweko hi vhinyo ya wubhayi* ga cona.”
3 Yi no ndzi teka hi moya yi ndzi yisa ciwuleni. Ndzi no wona a wasati na a khilele civandza co pswhuka ci nga tele hi mavito ya tihlamba, leci ci nga hi ni 7 wa tihloko ni 10 wa timhondzo.
4 A wasati loye i wa bohile tinguwo to dhura nguvhu* ni to pswhuka, na a ti sasekisele hi ouro ni maribye ya lisima ni maperola.* Canjeni gakwe i wa hi ni kopo ya ouro yi nga tele hi zvilo zvo nyenyeza ni zvilo zva chaka zva wubhayi* gakwe.
5 Cikandzeni* cakwe, i wa tsalilwe a vito ga fihlakalo, gaku: “Bhabhuloni wa Hombe, a mamani wa zvibhayi ni wa zvilo zvo nyenyeza zva laha misaveni.”
6 Ndzi no wona lezvaku a wasati i wa popilwe hi nkhata wa vobasa ni nkhata wa vakustumunyu va Jesu.
Laha ndzi nga mu wona ndzi no hlamala nguvhu.
7 Hikwalaho, a ngilozi yi no ndzi wutisa, yiku: “U hlamalela yini? Ndzi ta ku byela a fihlakalo wa wasati ni wa civandza leci a ci khileleko ci nga ni 7 wa tihloko ni 10 wa timhondzo:
8 A civandza leci u nga ci wona ci wa hi kona, kanilezvi a ca ha hi kona, hambulezvo ci lava ku huma hi lomu nkeleni wo eta wo kala magumo, niku ciya kulovisweni. A vaaki va misava — lava a mavito yabye ma nga kala ku tsaliwa bhukwini ga wutomi kusukela kuvangiweni ka tiko — va ta hlamala hi ku wona civandza, hakuva ci wa hi kona, kanilezvi a ca ha hi kona, hambulezvo ci ta tlhela civa kona.
9 “A mhaka leyi yi lava wutlhari ni kupimisisa: A 7 wa tihloko ti yimela a 7 wa zvitsunga, lezvi a wasati a tshamileko hehla ka zvona.
10 Ku na ni 7 wa tihosi: A ntlhanu ti wile, a yin’we yi kona, leyi yin’wani a yi se chikela; kanilezvi a cikhati yi to chikela yi ta tshama cikhatana basi.
11 A civandza leci ci nga hi kona, kanilezvi ci kalako ci nga ha hi kona, cona kambe i hosi ya wu 8 yi humako hi ka leti ta 7, kanilezvi yiya kulovisweni.
12 “A 10 wa timhondzo leti u nga ti wona ti yimela a 10 wa tihosi leti ti kalako ti nga se amukela a mufumo, kanilezvi ti ta amukela ntamu wa ku fuma zvin’we ni civandza hi hora yin’we.
13 A tihosi leti ti na ni kupima kun’we, hikwalaho ti nyika civandza a ntamu wa tona ni wuhosi.
14 Ti talwa ni Yivhana, kanilezvi kota lezvi a Yivhana yi nga Hosi ya tihosi ni Mufumeli wa vafumeli, yi ta ti hlula. Lava va nga zvin’we nayo, ku nga lava va vitanilweko ni va hlawulilweko ni vo tsumbeka, vonawu va ta hlula.”
15 A ngilozi yi te ngalo ka mina: “A mati lawa u nga ma wona, lawa a cibhayi ci tshamileko hehla ka wona, ma yimela vanhu, ni citshungu, ni matiko, ni tirimi.
16 A 10 wa timhondzo leti u nga ti wona, ni civandza, zvi ta venga a cibhayi zvi ci phanga zvi ci maha cimbyiri. Va taga a nyama ya cona va tlhela va ci hisa ndzilweni ciswa ciku bhi.
17 Hakuva Nungungulu i chelile timbilwini tabye a maalakanyo ya ku maha kurandza kakwe, va vhumelana ku nyikela a mufumo wabye ka civandza kala a magezu ya Nungungulu ma tatiseka.
18 A wasati loyi u nga mu wona i yimela a dhoropa legi ga hombe legi gi fumako hehla ka tihosi ta misava.”
Mitlhamuselo ya lahasi
^ Wona Tlhamuselo wa magezu ya Bhibhiliya.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “zviwunguwungu”.
^ Kutani: “mufazi”.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “Cimombyeni”.
