Kuvhululelwa 2:1-29
2 “Tsalela a ngilozi ya bandla ga le Efesusi, uku: Loyi a khomileko a 7 wa tinyeleti canjeni gakwe ga cinene, loyi a fambako cikari ka 7 wa minenge ya ouro yo veka tikandiya, i ngalo:
2 ‘Ndza yi tiva a mitiro ya wena, ni kutitsitsirita ka wena, ni kutimisela ka wena, ni lezvaku a wu nyenyeleteli a vanhu va kubiha, niku u ringile lava va ti byelako ku vapostoli kasi lezvo a hi vona, u kuma lezvaku vo hemba.
3 Wa timisela, u xaniseka hi kota ya vito ga mina, a wu karali.
4 Hambulezvo ndzi na ni cisolo leci ka wena, ku nga lezvaku u tsikile a lirandzo leli u nga hi nalo kusanguleni.
5 “‘Hikwalaho, alakanya lezvi u nga tshamisile zvona na u nga sewa, u ti sola, u maha a mitiro leyi u nga kari u yi maha kusanguleni. Loku u nga mahi lezvo, ndzi ta ku tela ndzi ta susa a nenge wa wena wo veka tikandiya laha wu nga kona, loku u nga ti soli.
6 Hambulezvo, ku na ni nchumu lowu wa wu nene ka wena, ku nga lezvaku wa venga a mitiro ya wukhongeli ga vaNikolatani, yi nga yaleyi minawu ndzi yi vengako.
7 Loyi a nga ni tindleve i wa ingise lezvi a moya wu byelako mabandla, wuku: Loyi a hlulako ndzi ta mu tsika aga a sinya ya wutomi leyi yi nga paradhiseni ga Nungungulu.’
8 “Tsalela a ngilozi ya bandla ga Smirna, uku: ‘Loyi wa Kusangula ni wa Kugumesa’, loyi a nga file a tlhela a hanya, i ngalo:
9 ‘Ndza ku tiva a kuxaniseka ka wena ni wusiwana ga wena, kanilezvi u ganyile, ni lezvaku wa rukatelwa hi lava va ti byelako ku vaJudha, kasi lezvo a hi vona, vova sinagoga ga Sathani.
10 U nga chavi hi kota ya tixanisa leti u to kumana nato. Sathani* i ta simama ku vhalela vokari va n’wina paxweni kasi mu fela ku ringiwa hi kumbhelela; mu ta xaniseka a 10 wa masiku. Tsumbeka kala kufeni, ndzi ta ku nyika a cidlodlo* ca wutomi.
11 Loyi a nga ni tindleve i wa ingise lezvi a moya wu byelako mabandla, wuku: Loyi a hlulako a nga ta ku wona a kufa ka wumbiri.’
12 “Tsalela a ngilozi ya bandla ga Pergamumi, uku: Loyi a khomileko a cipadha co leha, co kariha, ci tsemako seno ni seno, i ngalo:
13 ‘Ndza ku tiva laha u tshamako kona, ku nga laha ku nga ni citshamu ca wuhosi ca Sathani; hambulezvo wa ha simama ku khoma zvi tiya vitweni ga mina, a wu tsikangi ku kholwa ka mina, hambu masikwini ya Antipasi, a kustumunyu wa mina wo tsumbeka, loyi a delweko reveni ga wena, laha Sathani a tshamako kona.
14 “‘Kanilezvi ndzi na ni zvisolo zvi tsongwani ka wena, ku nga lezvaku cikari ka wena ku na ni lava va namarelako ka gondzo ya Bhalami, loyi a gondzisileko Bhalaki a ku veka mahlweni ka vana va ka Izrayeli a nchumu wa ku va wisa, kasi vaga a zvilo zvi phahlelweko zvifananiso va tlhela va maha a wubhayi.*
15 Ahandle ka lezvo, cikari ka wena ku na ni lava va namarelako a gondzo ya wukhongeli ga vaNikolatani.
16 Hikwalaho, ti sole. Loku u nga mahi lezvo ndzi ta hatla ndzita ka wena, ndzi talwa navo hi cipadha co leha leci ci humako hi non’wini wa mina.
17 “‘Loyi a nga ni tindleve i wa ingise lezvi a moya wu byelako mabandla, wuku: Loyi a hlulako ndzi ta mu nyika a mana ma fihlilweko ni ribye go basa; ka ribye lego ku tsalilwe a vito giswa ga ku a ku na munhu a gi tivako, saseka loyi a gi amukelako.’
18 “Tsalela a ngilozi ya bandla ga Tiyatira, uku: A N’wana wa Nungungulu, loyi a nga ni matihlo yo khwatsi i ndzilo wu vhurako, ni mikondzo yo khwatsi i kobre ya yi nene, i ngalo:
19 ‘Ndza yi tiva a mitiro ya wena, ni lirandzo la wena, ni kukholwa ka wena, ni ntiro wa wena, ni kutimisela ka wena, ni lezvaku a mitiro ya wena leyi yo gumesa yi hundza leyi u yi mahileko kusanguleni.
20 “‘Hambulezvo, ndzi na ni cisolo leci ka wena, ku nga lezvaku wa nyenyeletela Jezebheli, loyi a ti byelako ku muphrofeti, a gondzisako ni ku kalavela a malandza ya mina kasi ma maha wubhayi* ma tlhela maga a zvilo zvi phahlelweko zvifananiso.
21 Ndzi mu nyikile cikhati kasi a ti sola, kanilezvi a nga zvi lavi ku ti sola ka wubhayi* gakwe.
22 Hikwalaho, ndzi lava ku mu babyisa laha ka kuza a tsandzeka ni ku vhuka, ni lava va mahileko wubhayi naye ndzi ta va hoxa kuxanisekeni ka hombe loku va nga ti soli mitirweni yabye.
23 Ndzi ta daya a vana vakwe hi ntungu wu dayako, kasi a mabandla wontlhe ma fela ku zvi tiva lezvaku hi mina loyi ndzi hlolako a maalakanyo ma fihleleko, ni timbilu, niku ndzi ta nyika a mun’we ni mun’wani hi kuya hi mitiro yakwe.
24 “‘Kanilezvi, ka lava van’wani va nga Tiyatira, vontlhe lava va nga landziko a gondzo leyi, va nga kala ku tiva lezvi va nge “zvilo zvo eta zva Sathani”, ndzi ngalo: Ndzi nga ta mu rwexa a ndzhwalo wun’wani.
25 Ntsena lezvaku simamani ku khoma zvi tiya ka lezvi mu nga nazvo kala ndzita.
26 Loyi a hlulako a tlhela a hlayisa a mitiro ya mina kala magumo, ndzi ta mu nyika a ntamu hehla ka matiko,
27 kota lezvi ndzi nyikilweko ntamu hi Papayi. I ta risa vanhu hi nhonga ya simbi kasi va fayetelwa a ku khwatsi zvibya zva wumba.
28 Ndzi ta tlhela ndzi mu nyika a nyeleti ya ni mixo.
29 Loyi a nga ni tindleve i wa ingise lezvi a moya wu byelako mabandla.’
Mitlhamuselo ya lahasi
^ Hi ciGreki: di·á·bo·los, zvi wulako ku “mulumbeti”.
^ Kutani: “korowa”.
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Hi ciGreki: porneía. Wona Tlhamuselo wa magezu ya Bhibhiliya.
