Kuvhululelwa 20:1-15
20 Ndzi no wona a ngilozi na yi relela hi le tilweni na yi hi ni khiya ga nkele wo eta wo kala magumo ni chini* ga hombe canjeni ga yona.
2 Yi no khoma dragawu, a nyoka leyi ya kale, ku nga Sathani ni Mulumbeti, yi mu boha a 1000 wa malembe.
3 Yi no mu hoxa nkeleni wo eta wo kala magumo yi wu vhala yi tlhela yi wu tiyisa hi cifungo* kasi a nga ha kanganyisi matiko kala ku mbhela a 1000 wa malembe. Andzhako ka lezvo i ta tlhatlhiwa zva cikhatana.
4 Ndzi no wona a zvitshamu zva wuhosi, makunu lava va nga tshamile ka zvona va no nyikiwa ntamu wa ku lamula. Ndzi no wona ni mihefemulo* ya lava va nga dawa* hi ku nyika wukustumunyu ha Jesu ni ku wulawula hi Nungungulu, ni lava va nga kala ku khozela civandza kutani cifananiso ca cona ne ku amukela cifungo* zvikandzeni* zvabye ni canjeni gabye. Va no tlhela va hanya, va fuma zvin’we na Kristu a 1000 wa malembe.
5 Loku hi kona a kuvhuka ko sangula. (Lava van’wani va nga file a va hanyangi kala ku mbhela a 1000 wa malembe.)
6 Va katekile niku va basile lava va vhuxiwako kuvhukeni ko sangula; hehla kabye a kufa ka wumbiri a ku na ntamu, kanilezvi va tava vapristi va Nungungulu ni va Kristu, va fuma zvin’we naye a 1000 wa malembe.
7 Zvalezvi a 1000 wa malembe ma to mbhela, Sathani i ta tlhatlhiwa paxweni gakwe.
8 I ta huma a ya kanganyisa matiko ka mune wa matlhelo ya misava — ku nga Goge na Magoge — a va hlengeletela kasi kulwa. A ntsengo wabye wu fana ni misava ya bimbi.
9 Va no hangalaka misaveni yontlhe va ya randzela a wugovelo ga vobasa ni dhoropa go randzeka. Kanilezvi ku no relela ndzilo hi le tilweni wu ta va hisa vaku bhi.
10 Sathani,* loyi a nga kari a va kanganyisa, i no hoxiwa tiveni ga ndzilo ni solufa,* ku nga lomu a civandza ni muphrofeti wa mawunwa va sinako va hi kona; va ta xanisiwa* mumu ni wusiku, kala kupindzuka ni kupindzuka.
11 Ndzi no wona a citshamu ca hombe ca wuhosi co basa ni Loyi a nga tshamile ka cona. A misava ni tilo zvi no tsutsuma mahlweni kakwe, a zva ha kumiwangi kambe.
12 Ndzi no wona vafileko, a vahombe ni vatsongwani, na va yimile mahlweni ka citshamu ca wuhosi, ku vhululiwa mabhuku. Kanilezvi ku no vhululiwa a bhuku gin’wani, gi nga bhuku ga wutomi. A vafileko va no lamuliwa hi lezvi zvi tsalilweko mabhukwini hi kuya hi mitiro yabye.
13 A bimbi gi no humesa a vafileko lava va nga hi ka gona, a kufa ni Cilahla* zvonawu zvi no humesa a vafileko lava va nga hi ka zvona, a mun’we ni mun’wani a lamuliwa hi kuya hi mitiro yakwe.
14 A kufa ni Cilahla* zvi no hoxiwa tiveni ga ndzilo. A tiva ga ndzilo hi kufa ka wumbiri.
15 Ahandle ka lezvo, ni wihi loyi a vito gakwe gi nga kala ku kumiwa bhukwini ga wutomi i no hoxiwa tiveni ga ndzilo.
Mitlhamuselo ya lahasi
^ Kutani: “korente”.
^ Kutani: “selo”.
^ Wona Tlhamuselo wa magezu ya Bhibhiliya ni tlhamuselo wa lahasi wu nga ka Kuvhululelwa 6:9.
^ Hi kukongoma: “va nga dawa hi bhewula”.
^ Kutani: “marka”.
^ Kutani: “zvimombyeni”.
^ Hi ciGreki: di·á·bo·los, zvi wulako ku “mulumbeti”.
^ Kutani: “enxofre”.
^ Kutani: “vhalelwa”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
