Kuvhululelwa 21:1-27
21 Ndzi no wona a tilo giswa ni misava yiswa, hakuva a tilo ga kale ni misava ya kale zvi wa hundzile, ni bimbi gi wa nga ha hi kona.
2 Ndzi no wona ni dhoropa go basa, ku nga Jerusalema giswa, na gi relela hi le tilweni ka Nungungulu, na gi longiselwe kota noivha yi sasekiselweko nuna wa yona.
3 Makunu ndzi nozwa a gezu ga hombe na gi huma citshan’wini ca wuhosi, giku: “A tabhernakeli* ga Nungungulu gi cikari ka vanhu. I ta tshama zvin’we navo, vona va tava vanhu vakwe. Nungungulu wutsumbu i tava zvin’we navo.
4 I ta kulula mihloti yontlhe matihlweni yabye, ku nga ta hava ni kufa, hambu ni hlomulo,* kutani kurila, ni kubayisa, hakuva a zvilo zva kale zvi hundzile.”
5 Loyi a tshamileko citshan’wini ca wuhosi i te ngalo: “Hi nga wona! Ndzi maha zvilo zvontlhe zviva zviswa.” A tlhela aku: “Tsala hakuva a timhaka leti ti tsumbekile niku lisine.”
6 I no engeta aku ka mina: “Zvi mbhelile! Hi mina Alfa na Omega,* a masangulo ni magumo. Ni wihi loyi a zwako tora ndzi ta mu nyika kunwa mati ya cibuka ca mati ya wutomi mahala.
7 Ni wihi loyi a hlulako i taga tshomba ya zvilo lezvi, mina ndzi tava Nungungulu wakwe, yena ava n’wana wa mina.
8 Kanilezvi a matoya, ni vangakholwiko, ni lava va puluwundzako manyaleni yabye, ni vadayi, ni zvibhayi,* ni valoyi,* ni vakhozeli va zvifananiso, ni vontlhe vahembi, va ta hoxiwa tiveni gi vhurako ndzilo ni solufa.* Loku hi kona a kufa ka wumbiri.”
9 Ku nota yin’we ya tingilozi leti ta 7 ti nga hi ni 7 wa mingelo yi nga tele hi 7 wa zvixaniso lezvi zvo gumesa, yi ta wulawula na mina, yiku: “Tana ndzi ta ku komba a noivha, a sati wa Yivhana.”
10 Hikwalaho, yi no ndzi teka hi moya yi ndzi yisa citsungeni ca hombe co leha, yi ya ndzi komba a dhoropa go basa ga Jerusalema na gi relela hi le tilweni ka Nungungulu,
11 na gi hi ni kungangamela ka Nungungulu. A kuhatima ka gona ku wa ku khwatsi hi loku ka ribye ga lisima ku hundza wontlhe; ku wa ku khwatsi i ribye ga jasperi, gi vangamelako nguvhu ku khwatsi i vhidro.
12 Gi wa hi ni muro wa hombe wo tlakuka, ni 12 wa tinyangwa, ni 12 wa tingilozi lomu tinyangweni ta gona. Lomu tinyangweni ku wa tsalilwe mavito ya 12 wa tixaka ta vana va ka Izrayeli.
13 Hi tlhelo ga mutsuwuka-gambo ku wa hi ni tinyangwa tinharu, le n’walungu* ku wa hi ni tinyangwa tinharu, le dzongeni* ku wa hi ni tinyangwa tinharu, ni le mupela-gambo ku wa hi ni tinyangwa tinharu.
14 A muro wa dhoropa wu wa hi ni 12 wa maribye ya ciseketelo, hehla ka wona ku wa tsalilwe a 12 wa mavito ya 12 wa vapostoli va Yivhana.
15 Loyi a nga kari a wulawula na mina i wa hi ni lipimo lo khwatsi lihlanga la ouro kasi ku pima a dhoropa ni tinyangwa ta gona ni muro wa gona.
16 A dhoropa lego gi wa hi ni mune wa makhona. A kuleha ka gona ku wa ringana ni kuanama. I no pima a dhoropa hi lihlanga a kuma cipimo ca 2220 wa tikilometro.* A kuleha ka gona ni kuanama ni kutlakuka zvi wa ringana.
17 I no pima ni muro wa gona a kuma cipimo ca 64 wa timetro* hi kuya hi lipimo la munhu, li nga lipimo la tingilozi kambe.
18 A muro wu wa hi wa jasperi, a dhoropa gi wa hi ga ouro yi hlutilweko khwatsi yi fana ni vhidro go vangamela.
19 A zviseketelo zva muro wa dhoropa zvi wa mahilwe hi maribye ya lisima ya tixakaxaka: A ciseketelo co sangula ci wa hi ca jasperi, a ca wumbiri ci wa hi ca safira, a ca wunharu ci wa hi ca kalkedhoni, a ca wumune ci wa hi ca esmeraldha,*
20 a ca wuntlhanu ci wa hi ca sardhoni, a ca wu 6 ci wa hi ca sardhisi, a ca wu 7 ci wa hi ca krisolite, a ca wu 8 ci wa hi ca bherile, a ca wu 9 ci wa hi ca topazi, a ca wu 10 ci wa hi ca krisopase, a ca wu 11 ci wa hi ca jakinte, ni ca wu 12 ci wa hi ca ametista.
21 Lomu ka 12 wa tinyangwa konawu ku wa hi ni 12 wa maperola;* a nyangwa yin’we ni yin’wani yi wa hi perola gin’we. A ruwa ga hombe ga dhoropa legi gi wa hi ga ouro yi hlutilweko khwatsi, yo vangamelisa ku khwatsi i vhidro.
22 A ndzi wonangi tempeli ndzeni ka gona, hakuva Jehovha Nungungulu wa Ntamu Wontlhe hi yena tempeli ya gona, ni Yivhana yonawu.
23 A dhoropa legi gi wa nga lavi gambo ne hweti kasi ku gi woningela, hakuva gi wa woningelwa hi kungangamela ka Nungungulu, ni kandiya ya gona ku wa hi Yivhana.
24 A vamatiko va ta famba kuwonekeleni ka gona, ni tihosi ta misava ti ta neha wudzundzo ga tona ka dhoropa legi.
25 A tinyangwa ta gona ti nga ta vhaliwa siku gontlhe hakuva ku nga tava ni wusiku.
26 Va ta neha wudzundzo ni titshomba ta vamatiko ka gona.
27 Ku nga ta tshuka ku nghena ndzeni ka gona ni cihi cilo co nyenyeza, ne hambu loyi a mahako zvilo zva manyala ni ku kanganyisa; saseka lava va tsalilweko bhukwini ga wutomi ga Yivhana hi vona va to nghena.
Mitlhamuselo ya lahasi
^ Kutani: “tenda”.
^ Kutani: “cirilo”.
^ Kutani: “A ni Z”. Alfa i letra go sangula ga maletra ya ciGreki, Omega hi legi go gumesa.
^ Wona laha ka ku: “Wubhayi” ka Tlhamuselo wa magezu ya Bhibhiliya.
^ Kutani: “lava va tirako zva wudhimoni”.
^ Kutani: “enxofre”.
^ Kutani: “norte”.
^ Kutani: “sul”.
^ Hi kukongoma: “12 000 wa maestadhyu”. A estadhyu cin’we ci wa hi ni 185 wa timetro.
^ Hi kukongoma: “144 wa mikono”.
^ Kutani: “emeraldhi”.
^ Kutani: “mufazi”.
