Kuvhululelwa 22:1-21
22 A ngilozi yi no ndzi komba a congo wa mati ya wutomi yo basa nguvhu ma tlhela ma vangamela, na wu huma hi citshan’wini ca wuhosi ca Nungungulu ni ca Yivhana
2 wu khulunga hi laha cikari ka ruwa ga hombe ga dhoropa. Lomu matlhelweni ya congo ku wa hi ni tisinya ta wutomi ti nga pswala mihandzu a 12 wa makhati hi lembe, hweti ni hweti. A matluka ya tisinya leto ma wa tirela ku hanyisa a matiko.
3 A dhoropa legi gi nga ta ha rukatelwa kambe. Kanilezvi a citshamu ca wuhosi ca Nungungulu ni ca Yivhana zvi tava ka gona, ni malandza yakwe ma ta mu tirela.
4 Ma ta wona a nghohe yakwe, ni vito gakwe gi ta tsaliwa zvikandzeni* zvabye.
5 A wusiku gi nga ta hava kona kambe, va nga ta ha lava a kuwonekela ka kandiya ne ka gambo hakuva Jehovha Nungungulu i ta va woningela; vona va ta fuma kala kupindzuka ni kupindzuka.
6 A ngilozi yi te ngalo ka mina: “A timhaka leti ti tsumbekile niku lisine; hakunene Jehovha, a Nungungulu loyi a pimiseleko vaphrofeti, hi yena a nga ruma a ngilozi yakwe kasi ku ya komba a malandza yakwe a zvilo lezvi zvi to maheka zvalezvanyana.
7 Ndzata hi kuhatlisa. I katekile loyi a hlayisako a timhaka ta ciphrofeto ca bhuku legi.”
8 Hi mina Johani ndzi ngazwa ni ku wona a zvilo lezvi. Laha ndzi nga zvizwa ni ku zvi wona, ndzi nowa lahasi mikondzweni ya ngilozi leyi yi nga ndzi komba a zvilo lezvi, kasi ndzi yi khozela.
9 Kanilezvi yi te ngalo ka mina: “Zvini u mahako? U nga mahi lezvo! Minawu ndzi nandza a ku fana na wena ni vamakabye va wena, ku nga vaphrofeti, ni lava va ingisako a timhaka ta bhuku legi. Khozela Nungungulu.”
10 Yi no engeta yiku ka mina: “U nga lemi a timhaka ta ciphrofeto ca bhuku legi, hakuva a cikhati ci yimisilweko ci chikele.
11 Loyi wo kala ku lulama i wa simame kungalulameni kakwe, ni loyi a nga manyaleni i wa simame manyaleni yakwe; kanilezvi a wakululama i wa simame kululameni kakwe, ni loyi a basileko i wa simame kubaseni kakwe.
12 “‘Ndzata hi kuhatlisa ni nchachazelo ndzi ta tlhelisela a mun’we ni mun’wani hi kuya hi mitiro yakwe.
13 Hi mina Alfa na Omega,* ndzi wa kusangula ni wa kugumesa, a masangulo ni magumo.
14 Va katekile lava va hlazvako tinguwo tabye, kasi va kuma ntamu wa kuya tisinyeni ta wutomi ni lezvaku va nghena dhoropeni hi tinyangwa ta gona.
15 A timbyana* ti le handle, zvin’we ni valoyi,* ni zvibhayi,* ni vadayi, ni vakhozeli va zvifananiso, ni vontlhe lava va randzako ku hemba.’
16 “‘Mina Jesu, ndzi no ruma a ngilozi ya mina lezvaku yi mu nyika wukustumunyu xungetano hi timhaka leti ti yako mabandleni. Hi mina mutsu, ni pswalo wa Dhavhidha, ni nyeleti yo ngangamela ya ni mixo.’”
17 A moya ni noivha ve ngalo: “Tana!” Ni wihi loyi a zvi zwako i wa wule aku: “Tana!” Loyi a zwako tora i wate; ni loyi a zvi lavako i wanwe a mati ya wutomi mahala.
18 “Ndza nyika wukustumunyu ni ka wihi loyi a zwako timhaka ta ciphrofeto ca bhuku legi, ndziku: Loyi a to engetela cokari ka timhaka leti, Nungungulu i ta mu engetela a zvixaniso lezvi zvi tsalilweko ka bhuku legi;
19 ni loyi a to susa cokari ka timhaka ta bhuku ga ciphrofeto leci, Nungungulu i ta susa ciavelo cakwe ci tsalilweko bhukwini legi — a nga ta mu tsika aga mihandzu ya tisinya ta wutomi, ne hambu ku nghena dhoropeni go basa.
20 “Loyi a nyikako wukustumunyu ga timhaka leti, i ngalo: ‘Ndzata hi kuhatlisa.’”
“Amen! Tana Hosi Jesu.”
21 A tipswalo ta Hosi Jesu a tive ni vobasa.
Mitlhamuselo ya lahasi
^ Kutani: “zvimombyeni”.
^ Kutani: “A ni Z”. Alfa i letra go sangula ga maletra ya ciGreki, Omega hi legi go gumesa.
^ A timbyana hi lava va mahako zvo nyenyeza mahlweni ka Nungungulu.
^ Kutani: “lava va tirako zva wudhimoni”.
^ Wona laha ka ku: “Wubhayi” ka Tlhamuselo wa magezu ya Bhibhiliya.
